1 О мануша лилэ тэ бутён опэр пху, тай лэндэ аракхлёнас чяя. 2 О чявэ э Дэвлэски дикхлэ, кай о манушыканэ чяя шукара, тай лилэ тэ лэн пэски ромнен лэн, кажын савя мангляс.

3 О Сагбус о Яхвэ пхэнляс:

— На екхараи кан овэл о Духос Минро андэ мануш. О мануш э си тэни; мэ овэн о деса лэнги шэлу биш брэш.

4 Андэ адала деса (тай пал адалэ десендэ) опэр пху сас нефилимя*Адая авг. евр. збора «нефилим» на лачес галяв. Адая збора шунлёл сар авг. евр. збора «нафал» (пэрэс тэлэ). Гинэн, кай адала нефилимя сас бут-бут уче., кана о чявэ э Дэвлэски лэнас э манушыканэ чяян тай овэнас лэндар пуя. Адава сас муршаря намлыдэс авгутнэ вахытендар.

5 О Сагбус о Яхвэ дикхляс, кай о мануша опэр пху улэ бут канлыдэс, тай алаи лэнги тюшундиматэс екхараи бангёнас карин канлылыки. 6 О Сагбус о Яхвэ аяды, кай кердяс манушэс опэр пху, тай о ило Лэско пхэрдило дукх.

7 Тай пхэнляс о Сагбус о Яхвэ:

— Мэ кан кхосав опрал муй ки пхуяко э манушыкани порода, сави Мэ кердём. Мэ кан мударав ли э манушэн, ли э гайванен, тай кай балакадиен, тай э чириклен опрунэн, вай Мэ аядияв, кай кердём лэн.

8 Ай о Ной аракхляс мила андэ якха ки Сагбуски Яхвэски.

9 Аки о пхукаипэ катар Ной тай лэски пуендар.

Машкарэ ко мануша одолэ вахытески екх о Ной сас чячё тай бидошако; ов пхерэлас э Дэвлэса. 10 Ко Ной сас трин чявэ: о Сим, о Хам тай о Яфет.

11 Андэ Дэвлэски якха э пху паровдили, пхэрдили джюнгалипэ. 12 О Дэл дикхляс, сар паровдили э пху андар одолэстэ, кай алаи о мануша опэр пху гелэ опэр налаче дрома.

13 Дэчи о Дэл пхэнляс э Ноески:

— Мэ кан тхав бытима алаески, со бэшэл опэр пху, вай андар лэндэ э пху пхэрдили джюнгалимаса. Мэ кан кхосав лэн екхетханэ алаи э пхуяса. 14 Кер туки кавчеги катар тэрэки гофер, тай кер андэ лэстэ тхана, тай мак смоласа лэс андар тай аврял. 15 Аки сар ту камэл лэс тэ керэс: о кавчеги камэл тэ овэл 150 куня андэ дулгипэ, 25 куня андэ буглипэ тай 15 куня андэ учипэ†Авг. евр. «300 амма, 50 амма, 30 амма»; екх амма — паш ко 0,5 метра.. 16 Кер лэс опрал пханло тай э крыша опрал кер учи катар кавчеги екхпаш куни. Тхэ катар риг удар тай кер тэлуно, машкаруно тай опруно этажа. 17 Мэ кан бичялав опэр пху паня бугулдимаски, тэ мэрэл алаи, со бэшэл тал булутя, алаи о дживиндо, андэ савэстэ тэнышы бэшымаско. Алаи, со си опэр пху, кан мэрэл. 18 Ай туса Мэ кан керав завети, тай ту кан дэс андэ кавчеги — ту тай тэ чявэ, тай ти ромни, тай о ромня тэ чявэнги. 19 Гел андэ кавчеги алаи э гайванен по дон, муршэс тай джювля, тэ ачён он дживиндэ екхетханэ туса. 20 Тутэ кан авэн, тэ ачён ли он дживиндэ, по дуй алаи андар вэрсавэ породэс андар чирикля, гайваня тай алаи о породэс, савэ балакадиен. 21 Лэ бут туса вэрсаво хапэ, тай тхэ екхетханэ, тэ хас ли ту, ли он.

22 О Ной кердяс алаи аякха, сар пхэнляс лэски о Дэл.