1 О Сагбус о Яхвэ, сар Ов пхэнляс, сас миласа ки Сарра тай кердяс, со пхэнлясас. 2 Э Сарра насвалили пуёстэ, тай э пхурэ Авраамески аракхлило чяво, андэ одова вахыти, сар пхэнляс лэски о Дэл. 3 Пэ чявэс, саво аракхлило ки Сарра, о Авраам тхэдяс Исаак*Опэр авг. евг. чиб адава нав си «ов асал».. 4 Кана лэски чявэски э Исаакески уло охто дес, о Авраам абрезал лэс, сар пхэнляс лэски о Дэл. 5 Кана аракхлило о Исаак, э Авраамески сас шэл брэш.

6 Э Сарра пхэнляс:

— О Дэл тхэдяс ман тэ асав. Кажын, кон кан шунэл адалэстар, кан асал екхетханэ манца.

7 Тай генэ пхэнляс:

— Кон би пхэнлясас э Авраамески, кай э Сарра кан хавдярэл колиндэса? Ай мандэ аракхлило чяво лэски андэ лэски пхуримастэ.

8 О пуёс барило тай сас линдо катар колин. Одова дес, кана о Исаак сас линдо катар колин, о Авраам кердяс баро хабэ.

9 Э Сарра дикхляс, кай о чяво, саво аракхлило ки египтянка Агарь э Авраамески, асал катар Исаак, 10 тай пхэнляс э Авраамески:

— Кувдие адалэ иргатинка тай лаки чявэс, вай о чяво адалэ иргатинкако на кан палящиел о мангин мэ чявэса э Исаакеса.

11 О Авраам сас бут касывэтлыс, вай адава сас лэско чяво. 12 Ай о Дэл пхэнляс лэски:

— Ма ов касывэтлыс андар чяворо тай иргатинка. Шун э Сарра тай кер алаи, сар ой пхэнэл, вай катар Исаак тутэ кан овэн пуя, савэндар Мэ туки пхэнлёмас. 13 Ай Мэ кан керав дюняс ли катар чяво ки иргатинкако, вай ли ов — то чяво.

14 Авэр дес эртэс сабахтан о Авраам лиляс хапэ тай моркхяко гоно панеса тай диняс ки Агарь, тхэдяс лэн лаки опэр пхике тай бичялдяс ла екхетханэ э пуёса. Ой гели ко дром тай пхерэлас андэ ливади Бээр-Шэва. 15 Кана о пани андэ гоно быты, ой ачявдяс э чяворэс тал кущёки 16 тай гели, бэшли надур, о дурипэ, сар кай мукес стрилас, вай тюшундиелас: «На мангав тэ дикхав, сар о чяворо мэрэл». Ой бэшли отхэ надур тай руни.

17 О Дэл шунляс о роипэ э чяворэско, тай о миляики э Дэвлэско болдиняспэс карин Агарь опрал булутя тай пхэнляс лаки:

— Со уло, Агарь? Ма траша! О Дэл шунляс, сар ровэл о чяворо отхэ, катэ ов пашло. 18 Ущи, ваздэ э чяворэс тай лэ лэс вастэстар, вай Мэ кан керав лэстар баро дюняс.

19 Тай о Дэл пхутэрдяс лаки якха, тай ой дикхляс ханинг панеса. Ой гили, пхэрдяс о гоно панеса тай пиявдярдяс э чяворэс.

20 О Дэл сас э чяворэса. О Измаил барило, бэшэлас ки ливади тай уло одова, кай мукел стрилас. 21 Ов бэшэлас ки ливади Паран, тай э дай лиляс лэски ромня андар Египти.

22 Андэ одова вахыти о Авимелех тай о Пихол, о баро лэски армияко, пхэнляс э Авраамески:

— О Дэл туса андэ алаестэ, со ту керэс. 23 Ха совля манги атхэ ангал Дэл, кай ту на кан керэс джюнгалипэ нэ манца, нэ мэ пуенца, нэ мэ породаса. Кер манги тай э пхуяки, андэ савятэ ту бэшэс, мила, сави кердём мэ туки.

24 О Авраам пхэнляс:

— Хав совля.

25 Дэчи о Авраам пхэнляс э Авимелехески катар ханинг э панеса, сави лилэ о иргатя э Авимелехески. 26 Ай о Авимелех пхэнляс:

— Мэ на джянав, кон адава кердяс. Ту на пхэнлянас манги, тай джи адалэ десески мэ на шунлёмас адалэстар.

27 О Авраам андяс э тикнэ тай э барэ гайванен тай диняс ко Авимелех, тай он кердэ завети машкарэ пэстэ. 28 О Авраам лиляс андар атара эфта тэрнэ бакрэн, 29 тай о Авимелех пхучляс ко Авраам:

— Со си адала эфта тэрнэ бакрэ, савэн ту лилян аврэндар?

30 Ов пхэнляс:

— Лэ мэ эфта тэрнэ бакрэн. Мэ овэн он сикаипэ кай мэ хранлём адая ханинг.

31 Аки соски одова тхан сас тхэдо Бээр-Шэва†Авг. евр. «Бээр-Шэва» си «ханинг эфтанги» тай «ханинг совленги».: вай он о дуй отхэ халэ совля.

32 Кана он кердэ завети машкарэ пэстэ андэ Бээр-Шэва, о Авимелех тай о Пихол, о баро лэски армияко, алэ палэ андэ пху ки филистимляненги. 33 О Авраам барярдяс андэ Бээр-Шэва тэрэки тамариски тай мангляс о нав э Сагбуско э Яхвэско, э Дэвлэс, Саво си Сальтя‡Авг. евр. «Эль-Олам». . 34 О Авраам бэшэлас опэр пху ки филистимляненги бут вахыти.