1 Э Сарра бэшли шэлу биш эфта брэш — адава о брэша э Сарраки. 2 Ой мули андэ Кирьят-Арба (самким Хеврон), андэ пху Ханаан, тай о Авраам ало тэ керэл касывэти пал Сарра тай тэ ровэл пал латэ. 3 Дэчи о Авраам ачявдяс пэ мулэ ромня тай гело ко хетеенги. Ов пхэнляс:

4 — Мэ машкарэ тумэндэ джяти аврэ пхуятар. Бикнэн манги тхан тэ пароскерав э муля.

5 О хетея пхэнлэ э Авраамески:

6 — Сагбуса, шун, ту — Дэвлэско мануш машкарэ амэндэ. Пароскер э муля андэ зиядэ андар амарэ паромаски тханэндэ. Никхон андар амэндэ на кан пхэнэл туки, на дав тхан тэ пароскерэс э муля.

7 Дэчи о Авраам ущино, бангило э манушэнги одолэ пхуякерэнги, э хетеенги. 8 Ов пхэнляс лэнги:

— Тэ мукен тумэ тэ пароскерав э муля, дэчи шунэн ман тай манген андар мандэ э Эфронес, э чявэс э Цохарескерэс, 9 ов тэ бикнэл манги э пищера э Махпела, сави си лэски тай си ко чети лэски ливадятэ. Мэ бикнэл ла манги э кимяки, сар керэл о тхан, катэ пароскерэс машкарэ тумэндэ.

10 О хетеи о Эфрон бэшло машкарэ пэ дюнястэ тай пхэнляс э Авраамески ангал алаи ко хетея, савэ алэ ки бар лэски дизатэ. 11 Ов пхэнляс:

— На, мо сагбуса, шун ман. Мэ дав тут э ливади тай дав тут э пищера, сави си опэр латэ. Мэ дав тут адава ангал мэ дюнястэ. Пароскер тэ муля.

12 О Авраам генэ бангило э манушэнги одолэ пхуякерэнги 13 тай пхэнляс э Эфронески ангал лэндэ:

— Шун акана ту ман. Мэ кан покинав руп э ливадяки. Лэ лэс мандар, мэ тэ пароскерав отхэ э муля.

14 О Эфрон пхэнляс э Авраамески:

15 — Шун ман, мо сагбус. Э пху кай керэл штаршэл шэкеля руп. Та со, адава бут туки я манги? Пароскер тэ муля.

16 О Авраам тхэдяс кан э Эфронес тай алды э кими э ливадяки, кай пхэнлили ангал хетея: штаршэл шэкеля руп, сар кинэн о кинимаря.

17 Аякха э ливади э Эфронески андэ Махпела паш Мамрэ — тай ливади, тай э пищера опэр латэ, тай алаи о тэрэкя опэр ливади — улэ 18 э Авраамески ангал алаи ко хетея, савэ алэ ки дизаки бар. 19 Пал атхэ о Авраам пароскердяс пэ ромня э Сарра андэ пищера опэр ливади Махпела паш ки Мамрэ (кай андэ Хеврон), андэ пху Ханаан. 20 Э ливади, тай э пищера опэр латэ ули э Авраамески катар хетея сар тхан паромаски.