1 О Авраам лиляс пэски аврэ ромня, сави бучёлас Хетура. 2 Лэски латэ аракхлило о Зимран, о Йокшан, о Медан, о Мадиан, о Ишбак тай о Шуах. 3 О Йокшан сас о дад э Шэваско тай э Деданеско; о пуя э Деданески сас о ашшурея, о летушэя тай леуммея. 4 О чявэ э Мадианески: о Эфа, о Эфер, о Ханох, о Авида тай о Элдаа — алаи он о пуя э Хетураски.

5 О Авраам ачявдяс алаи, со сас лэстэ, э Исаакески. 6 Дага кана сас дживиндо, ов диняс э иргатинкенги чявэнги багалыдэс шэя тай бичялдяс пэ чявэстар катар Исаак ко вастоки, андэ вастокески пху.

7 Алаи о Авраам бэшло шэл эфтадэша пандж брэш. 8 Ов мукляс по тэнышы тай муло бут пхуро, чяло бэшымаса, тай гело пэ тухумендэ. 9 Лэски чявэ о Исаак тай о Измаил пароскердэ лэс андэ пищера Махпела паш ко Мамрэ, опэр ливади ки хетески э Эфронески, э чявэски э Цохарески, 10 сави о Авраам киндяс ко хетея. Отхэ о Авраам сас паромэ паш пэ ромнятэ ки Сарра. 11 Пал ко мэрипэ ки Авраамеско о Дэл о Яхвэ алгышты лэски чявэс э Исаакес, саво озаман бэшэлас паш ко Бээр-Лахай-Рои.

12 Аки э порода э Измаилески, э Авраамески чявэски, саво аракхлило э Авраамески ки Сарраки иргатинка, ки египтянка Агарь. 13 Аки о нава э Измаилески чявэнги, пхэнлэ пал екхаврэстэ лэнго аракхлима: о Невайот, о баштутно э Измаилеско, о Кедар, о Адбеэл, о Мивсам, 14 о Мишма, о Дума, о Масса, 15 о Хадад, о Тема, о Етур, о Нафиш тай о Кедма. 16 Адава о нава э Измаилески чявэнги, о нава э дэшудо сагбудэнго породэс, катэ он бэшэнас тай катэ качюискерэнас.

17 О Измаил бэшло 137 брэш. Ов мукляс по тэнышы тай муло, тай гело пэ тухумендэ. 18 Лэски пуя накхлэ андэ области катар Хавила джи ки Шур, паш ки граница ки Египтески, опэр дром ко Ашшур. Он бэшэнас андэ душманлыки алаи э пхралэнца.

19 Аки о пхукаипэ катар Исаак, ко чяво ки Авраамеско, тай лэски пуендар.

Ко Авраам аракхлило о Исаак. 20 Э Исаакески сас саранда брэш, кана ов прандосаило опэр Рэвэка, э чяй арамеески э Бетуилески андар Паддан-Арам, э пхэн э арамеески э Лаванески.

21 О Исаак мангелас э Сагбус э Яхвэс андар пэ ромнятэ, вай ой сас би пуенги. О Сагбус о Яхвэ кердяс, со о Исаак мангляс Лэстэ, тай лэски ромни э Рэвэка насвалили пуёстэ. 22 О пуя лилэ тэ дэн бутуря екхаврэс андэ латэ, тай ой пхэнляс:

— Андар состэ манги адава?

Тай ой гели тэ пхучел ко Сагбус ко Яхвэ. 23 О Сагбус о Яхвэ пхэнляс лаки:

— Дуй породэс андэ тутэ, дуй дюнядэс кан овэн тутар тай кан палящиенпэс. О екх кан овэл зорало аврэстар, тай о баро кан керэл иргатлыки э тикнэски.

24 Кана ало вахыти латэ тэ аракхлён о пуя, андэ латэ чячес сас чяворэ-огизя. 25 О екх аракхлило лоло, тай алаи о тэни лэско сас учярдо балэнца, сар балалэ савутенца. Оничин лэс тхэдэ Исав. 26 Дэчи сикавдяспэс лэско пхрал, ов астарэласпэс вастэса ки патум ки Исавески. Оничин ов сас тхэдо Яков*Авг. евр. нав «Яков» шунлёл сар збора «якев» (патум).. Э Исаакески сас 60 брэш, кана он аракхлилэ ки Рэвэка.

27 О чяворэ барилэ. О Исав сас лачё ахотники, мануш э ливаденго, ай о Яков сас мануш тэныки, ов бэшэлас машкарэ ко катунэс. 28 О Исаак, саво дэхэлас о дами э вэшэнги гайваненго, зиядэ дэхэлас э Исавес, ай э Рэвэка зиядэ дэхэлас э Яковес.

29 Екхвар, кана о Яков тавэлас чёрба, о Исав ало катар ливади бут бокхало. 30 Ов пхэнляс э Яковески:

— Чяльти, дэ ман тэ хав набут одова лоло, со ту тавэс! Мэ мэрав катар бокх!

(Аки соски лэс динэ нав Эдом†Авг. евр. нав «Эдом» шунлёл сар збора «адом» (лоло).).

31 О Яков пхэнляс:

— Хани бикин манги то баштутно аракхлипэ.

32 — Мэ мэрав катар бокх, — пхэнляс о Исав. — Со манги файдас катар баштутно аракхлипэ?

33 О Яков пхэнляс:

— Хани ха совля.

Ов халяс совля, тай аякха бикиндяс по баштутно аракхлипэ э Яковески.

34 Дэчи о Яков диняс э Исавэс манро тай чечевични чёрба. Ов халяс, пиляс, ущино тай гело. Аякха о Исав ачявдяс по баштутно аракхлипэ.