1 Э Рахиль дикхелас, кай латэ на аракхлён пуя э Яковески, тай кизганды пэ пхэня э Лия. Ой пхэнляс э Яковески:

— Дэ ман пуен, я мэ кан мэрав!

2 О Яков холясаило лаки тай пхэнляс:

— Та со, мэ о Дэл, Саво на дэл тут пуен?

3 Ой пхэнляс:

— Аки э Билха, ми иргатинка. Пашлё ласа, латэ тэ аракхлёл пуёс, савэс мэ кан лав опэр мэ кочендэ, тай мэ кан гинав лэс минрэс. Аякха мандэ кан овэн пуя латар.

4 Аякха ой диняс лэс ромня пэ иргатинка э Билха. О Яков пашлило ласа, 5 ой насвалили пуёстэ, тай аракхлило лэски чяво. 6 Дэчи э Рахиль пхэнляс: «О Дэл кердяс манги чячё цындос. Ов шунляс мо мангипэ тай диняс ман чявэс». Оничин ой тхэдяс лэс Дан*Авг. евр. нав «Дан» шунлёл сар «данани» (ов кердяс манги чячё цындос)..

7 Э Билха, э иргатинка Рахиляки, генэ насвалили пуёстэ, тай аракхлило латэ дуйто чяво э Яковески. 8 Дэчи э Рахиль пхэнляс: «Барэ маримаса маравасман мэ мэ пхэняса тай улём ангал». Тай ой тхэдяс лэс Неффалим†Авг. евр. нав «Нафталий» шунлёл сар «нафтуле» (ушарипэ)..

9 Э Лия дикхляс, кай латэ на аракхлён пуя, лиляс пэ иргатинка э Зилпя тай диняс ла ко Яков ромня. 10 Ки Лияки иргатинка ки Зилпа аракхлило чяво э Яковески.

11 Дэчи э Лия пхэнляс: «Со бахт!» Тай ой тхэдяс лэс Гад‡Адава авг. евр. нав си «гад» (бахталипэ)..

12 Ки Лияки иргатинка ки Зилпа аракхлило дуйто чяво э Яковески. 13 Дэчи э Лия пхэнляс: «Со мэ бахтали! О джювля кан пхэнэн манги бахталие!» Тай ой тхэдяс лэс Асир§Авг. евр. нав «Ашер» шунлёл сар «ошер» (лачипэ)..

14 О вахыти, кана кидэнас о гив, о Рувим никлисто ки ливади, аракхляс мандрагоря тай андяс лэн пэ дэяки. Э Рахиль пхэнляс э Лияки:

— Мангав, тут дэ ман мандрагоря тэ чявэски.

15 Ай одоя пхэнляс лаки:

— Ту ли аякха лилян мэ ромэс. Мангес акана тэ лэс ли о мандрагоря мэ чявэски?

— Лачё, — пхэнляс э Рахиль, — мэ пашлёл ов туса авдес рати, ай ту дэ ман о мандрагоря тэ чявэски.

16 Кана бэлвэле о Яков ало катар ливадя, э Лия никлисти тэ ишандиел лэс тай тэ пхэнэл:

— Ту камэл тэ пашлёс манца. Мэ покиндём андар тутэ о мандрагоря мэ чявэски.

Тай ов пашлило ласа одоя рат. 17 О Дэл шунляс э Лия, ой насвалили пуёстэ, тай латэ аракхлило э Яковески панджто чяво. 18 Дэчи э Лия пхэнляс: «О Дэл алгышты ман андар одолэстэ, кай мэ динём мэ ромэс мэ иргатинка». Тай ой тхэдяс лэс Иссахар*Авг. евр. нав «Йиссахар» шунлёл сар «сахари» (ов ман диняс, вай мэ казандым). .

19 Э Лия генэ насвалили пуёстэ, тай латэ аракхлило э Яковески шовто чяво. 20 Дэчи ой пхэнляс: «О Дэл башлады ман багалыс башладипэ. Акана мо ром кан гинэл ман, вай мандэ аракхлилэ лэски шов чявэ». Тай ой тхэдяс лэс Завулон†Авг. евр. нав «Зевулон» шунлём сар «йизбэлэни» (ов кан гинэл ман). .

21 Савэ-то вахытестар латэ аракхлили чяй, тай тхэдяс ла Дина. 22 Дэчи о Дэл тюшунды катар Рахиль. Ов шунляс ла тай пхутэрдяс ла. 23 Ой насвалили пуёстэ, тай латэ аракхлило чяво. Ой пхэнляс: «О Дэл лиляс мо ладжяво». 24 Ой пхэнляс: «Мэ дэл ман о Сагбус о Яхвэ генэ екхе чявэс», тай тхэдяс лэс Иосиф‡Авг. евр. нав шунлёл сар «йосеф» (мэ дэл ов генэ). .

25 Пал отхэ сар ки Рахиль аракхлило о Иосиф, о Яков пхэнляс э Лаванески:

— Мук ман тэ джяв палэ мэ чяче ригендэ. 26 Дэ ман мэ ромнен тай мэ пуен, андар савэндэ мэ кердём туки бути, тай мэ кан джяв ко дром. Ту джянэс, сар бут мэ керавас бути туки.

27 Ай о Лаван пхэнляс лэски:

— Мэ тэ аракхлём мила андэ тэ якхендэ, мангав тут, ачё. Мэ галилём андар дорикерипэ, кай о Сагбус о Яхвэ алгыштиел ман булуб туки. 28 — Тай пхэнляс: — Пхэн ти кими, мэ кан покинав ла.

29 О Яков пхэнляс лэски:

— Ту джянэс, сар мэ керавас бути туки тай касавке си тэ атарэс булуб мэ бутяки. 30 Лэн сас набут ангал отхэ, кай мэ алём, ай акана он бутилэ. О Сагбус о Яхвэ алгыштиел тут андар мандэ. Кана мэ кан кидав шо-то мэ кхерэски?

31 О Лаван пхучляс:

— Со тэ дав тут?

— Манги ништо на камэл, — пхэнляс о Яков. — Кер манги екх, тай мэ англэ кан чярярав тай кан кутардияв тэ атарэс: 32 мук ман тэ накхав алаи тэ атарэс тай тэ лав отхар э тапенги бакрэн, алаи э калэ бакрорэн тай алаи э тапенги бузнэн. Он да кан овэн ми кими. 33 Асавке палящимаса ту сальтя кан джянэс, алаи о чячипэ. Тэ дикхеса андэ мэ атаратэ бузнэн би тапенги я би полоскенги я парнэ бакрэн, тэ джянэс — кай адала чёрдиканэ.

34 -— Лачё, — пхэнляс о Лаван. — Мэ овэл аякха, сар ту пхэнлян.

35 Одова жэ дес ов паляшты алаи э бузнэн э тапенца, алаи э тапенги бузнян — одолэн, опэр савэндэ сас парно, — тай алаи э калэ бакрорэн тай диняс лэн тэ дикхел пал лэндэ о чявэ. 36 Ов пхэнляс тэ овэл машкарэ лэстэ тай ко Яков дурипэ трин дес дром. Ай о Яков англэ чярярэлас э Лаванески авэрэн бакрэн тай бузнен.

37 О Яков чингердяс веткес катар парно топаль, миндали тай чинари тай кердяс опэр лэндэ парнэ полоскес, шужардяс опрал тай нангярдяс о парно кашт андар. 38 Ов тхэдяс о чингердэ веткес алаи андэ копанэс, тэ овэн он доврус ангал бакрэ тай бузня, кана о гайваня авэнас тэ пиен. О вахыти о гайваня лэнаспэс. 39 Он лэнаспэс ангал веткес, тай о гайваня аракхлёнас тапенца. 40 Генэ о Яков болдэлас лэн карин тапенги тай карин калэ бакрэ тай бузня, савэ сас э Лаванески, ай э тэрнэн тхэлас аврэтхэ. Аякха лэстэ улэ лэски атарэс, тай ов астарэлас лэн аврэтхэ катар атарэс ки Лаванески. 41 Кана авэнас тэ пиен о зоралэ гайваня, о Яков тхэлас ангал лэндэ андэ копана веткес, он тэ лэнпэс ангал веткес. 42 Ай о гайваня тэ на сас зоралэ, ов на тхэлас веткес. О назоралэ гайваня ачёнас э Лаванески, ай о зоралэ — э Яковески. 43 О Яков лиляс тэ барвалёл, лэстэ акана сас барэ атарэс, тай генэ иргатинкес, иргатя, камилэс тай джёрэ.