1 О Исус пхэнляс пэ сиклярдэнги:

— Со зумавэл э манушэс нащи тэ на овэл, ай касэвэти одолэски, кон дэл бутуря э манушэн андэ бэзя. 2 Одолэски, кон хоч екхес андар адалэ тикнэндэ кан дэл бутуря андэ бэзя, сас би зиядэ, лэски тэ урявэн ки мэн мельницако бар тай тэ чен андэ пани. 3 Оничин сакёвэн! То пхрал тэ керэл бэзя, тэрдяр лэс, тай ов тэ ачявэла о бэзя, апувикер лэс. 4 Тай джи ов тэ кердяс бэзя туки эфтавар андэ дес тай эфтавар тэ авэла тутэ тай тэ пхэнэла: «Мэ сом дошало», — апувикер лэс.

5 О апостоля сар-то манглэ э Сагбус:

— Баряр амаро пакяпэ!

6 О Сагбус пхэнляс:

— Тумэндэ тэ си пакяпэ, сар гэрчицако гугуси, тумэ дэчи тэ пхэнэна акалэ дюдяки тэрэкески: «Чиндё э коринеса тай бэшав тут андэ пани», — ов тумэн кан тхэл кан.

7 Кастэ-то андар тумэндэ си иргати, саво храндэл э пху я чярярэл бакрэн. Кан пхэнэн тумэ лэски, кана ов кан авэл катар ливади: «Эла, бэш тай ха»? 8 На, тумэ дэба кан пхэнэн: «Газырлыдие манги хапэ, дэчи пхандэ тут опрал тай кер иргатлыки манги, бискай мэ хав тай пияв, ай дэчи кан хас, кан пиес коркоро». 9 Махтадиел о сагбус э иргатес андар одолэстэ, со одова керэл, со лэски пхэнлило? 10 Аякха ли тумэ, кана кан керэн алаи, со тумэнги сас пхэнло, пхэнэн: «Амэ сам иргатя, савэ на керэн лэн тэ махтадиес. Амэ кердям екх одова, со камэлас тэ керас».

11 Опэр дром ко Иерусалими о Исус накхелас машкарэ ки Самария тай ки Галилея. 12 Кана Ов дэлас андэ екх гав, Лэс дикхлэ дэш гералэ, савэ тэрдилэ надур 13 тай лачес дэнас бэбэря:

— Исус, Сикляримарина, аядие амэн!

14 Кана о Исус лэн дикхляс, Ов пхэнляс:

— Джян тай сикавэн тумэн э попазенги.

Одола гелэ тай опэр дром сас аиндимэна. 15 О екх андар лэндэ, сар дикхляс, кай аинды, болдиняспэс, бэбэренца махтадиелас э Дэвлэс. 16 Ов пэло ко чянга ки Исусески тай пхэнляс Лэски: «Бах мэ дэл тут о Дэл!» Тай адава мануш сас самаряни.

17 — Та со, на дэш мануша сас шужардэ? — пхучляс о Исус. — Кай авэра эня? 18 Соски никхон андар лэндэ, булуб акалэ джяти пхуяки манушэстар, на ало, тэ махтадиел э Дэвлэс?

19 Тай пхэнляс э самарянески:

— Ущи тай джя, то пакяпэ кутарды тут.

20 Екхвар о фарисея пхучлэ ко Исус, кана кан авэл э Дэвлэско Патишайлыки. Ов пхэнляс:

— Э Дэвлэско Патишайлыки на кан авэл аякха, кай кан дикхес лэс якхенца. 21 Никхон нащи кан пхэнэл: «Аки, ов акатэ!» я «Ов окотэ!» Э Дэвлэско Патишайлыки машкарэ тумэндэ.

22 Дэчи Ов пхэнляс э сиклярдэнги:

— Кан авэл асавко вахыти, кана тумэ кан манген тэ дикхен хоч екх андар деса э Чявэс э Манушыканэс, тай на кан дикхен. 23 Тумэнги кан пхэнэн: «Аки, Ов окотэ!» я «Аки, Ов акатэ!» Ай тумэ ма прастан тэ дикхен. 24 Сар э страпи, кана тхабол, сикавэл алаи опрэ, катар чети джи ко чети, аякха кан овэл ли о Чяво о Манушыкано андэ дес, кана Ов кан авэл. 25 Ай ханик Лэски камэл тэ даяндиел бут касэвэти, тай кан болдэнпэс Лэстар о мануша адалэ вахытески. 26 Сар сас андэ деса ки Ноескерэ, аякха кан овэл ли андэ деса ки Чявэско ки Манушыканэско. 27 О мануша ханас, пиенас, прандозэнас тай джянас ромэстэ джи одолэ десестэ, кана о Ной бэшло андэ кавчеги. Дэчи ваздиндило баро пани тай алаен мудардяс.

28 Аякха сас андэ деса ки Лотески. О мануша ханас, пиенас, кинэнас тай бикнэнас, барярэнас тай керэнас. 29 Ай андэ дес, кана о Лот мукляс о Садом, опрал чёрдили яг тай сера тай алаен лэн мудардяс.

30 Аякха кан овэл ли одова дес, кана кан авэл о Чяво о Манушыкано. 31 Одова дес кон-то тэ овэла опэр кхер, ай лэски шэя — андэ кхер, мэ на фулел тэлэ пал шэя. Тай кон ки ливади, мэ на авэл палэ.

32 Мэ овэл тумарэ годятэ э ромни э Лотески! 33 Кон мангел тэ гаравэл по бэшыпэ, одова кан нашавэл лэс, тай кон кан нашавэл по бэшыпэ, одова кан гаравэл лэс. 34 Пхэнав тумэнги, кай одоя рат дуй кан овэн опэр екх тхан, тай о екх кан овэл линдо, ай авэр ачявдо. 35-36 Дуй джювля паш екх аврэстэ кан ронискерэн гив, э екха кан лэн, э екха кан ачявэн.*Андэ сарсавэ гречески лилэндэ аякха жэ си адала зборэс: «Тай кан овэн дуй мануша ки ливади, тай о екх кан овэл линдо, ай авэр ачявдо».

37 — Кай, Сагбуса? — пхучлэ о сиклярдэ.

О Исус пхэнляс:

— Катэ си муло, отхэ кан кидэнпэс ли арёля-стервятникя.