4
1 Anglo Devel hem anglo Hrist Isus, kova ka sudini hem e dživdenđe hem e mulenđe, lesere avibnaja hem lesere carstvoja hava tut sovli: 2 propovedin o Lafi, spremno hem kadi pravo vreme hem kad nane, ispravin, ukorin, hrabrin, ani sa i strpljivost hem sikavibnaja. 3 Adalese so ka avel o vreme kad o manuša naka mangen te šunen o sasto sikaviba, nego palo pumare požude, ka čeden uzala pumende bute učiteljen kola vaćerena okova soi šukar lengere kanenđe, 4 i ka ciden pumare kana e čačipnastar hem ka irinen pe e paramizenđe. 5 A tu ko sa ov trezveno, nakhav o nevolje, ćer i buti sar evanđelista, ćer pherdeste ti služba.
E Pavlesere završna lafija hem pozdravija
6 Adalese so me već ovava žrtvujime, hem pašei o vreme te ačhavav akava dživdipe.
7 Šukar mariba marđum, i trka đi o kraj prastandiljum, i vera ićerđum. 8 Akanai maje pripremime i kruna oti pravednost, savaja ko okova Dive ka nagradini man o Gospod, o pravedno Sudija, hem na samo man nego hem sarijen kola mangipnaja adžićerde lesoro aviba.
9 Dikh po sig te ave mande. 10 Adalese so, o Dimas ačhavđa man adalese so gudlilo lese akava sveto. Ov dželo ko Solun, o Kriskent ki Galatija, o Tit ki Dalmacija. 11 Samoi o Luka mancar. Le e Marko hem ana le tuja, adalese soi maje korisno ani služba. 12 E Tihike bičhalđum ko Efes. 13 Kad ka ave, ana maje o ogrtači savo ačhavđum koro Karpa ani Troada, hem o lila, najangle o pergamentija*pergamentija Adavai koža e životinjakiri ki savi šaj ine te pisini pe. .
14 O kovači o Aleksandar ćerđa maje but bišukaripa. O Gospod ka irini lese premalo lesere delja. 15 Hem tu arakh tut olestar, adalese so but protivinđa pe amare lafenđe.
16 Kad prvo puti braninđum man anglo sudo, niko na inele uzala mande, nego sare ačhavde man. O Devel te na računini adava protiv olende. 17 Ali o Gospod inele uzala mande hem dinđa man zoralipe te šaj prekala mande pherdeste te vaćeri pe o evanđelje hem te šunen le sa o manuša kola na džanen e Devlese; hem injumle ikaldo taro danda e lavesere. 18 O Gospod ka ikali man taro svako bišukaripe hem bezbedno ka legari man ko plo carstvo e nebosoro.
19 Pozdravin e Priska hem e Akila hem e Onisiforosere čherutnen. 20 O Erast ačhilo ano Korint, a e Trofime ačhavđum ano Milet adalese so inele namborme. 21 Dikh te ave angleder o jevend. Pozdravinena tut o Euvul, o Pud, o Lin, i Klaudija hem sa o phralja hem o phenja.
22 O Gospod te ovel te duhoja. I milost tumencar!