1 “E anđeose e khanđirjakere ano Efes pisin:

‘Akava vaćeri Okova kova ićeri o efta čerenja ano plo desno vas hem kova phirela maškaro efta zlatna svećnjaci: 2 Džanav te delja, to trud hem ti istrajnost hem so našti te trpine e bišukare manušen. Iskušinđan okolen kola pese vaćerena dai apostolja, ali nane, hem arakhljan len dai hovavne. 3 Istrajno injan, but patinđan zako mlo anav hem na odustajinđan.

4 Ali, isi man nešto protiv tute: ačhavđan to prvo mangipe. 5 Adalese, setin tut kotar peljan. Pokajin tut hem ćer okova so ano početak ćerđan. Te na pokajinđan tut, ka avav hem ka cidav to svećnjako lesere thanestar maškaro khanđirja. 6 A palem, akava ćereja šukar: mrzineja o delja e nikolaitengere save hem me mrzinava.

7 Kas isi kana, nek šunel so o Duho vaćeri e khanđirjenđe. E pobednikose ka dav te hal taro kaš e dživdipnasoro, savoi e Devlese ano raj.’ ”

8 “E anđeose e khanđirjakere ani Smirna pisin:

‘Akava vaćeri o Prvo hem o Poslednjo, okova kova inele mulo, ali uštino: 9 Džanav ti nevolja hem to čororipe, ali tu injan barvalo. Džanav hem zako bišukar vaćeriba save vaćerena će okola kola zako pumenđe vaćerena dai Jevreja, ali nane, nego oni e Sotonesiri sinagoga. 10 Ma dara okolestar so valjani te nakhave o patnje. Ače, o beng nesaven tumendar ka frdel ano phandlipe, te iskušini tumen, i deš dive ka oven ani nevolja. Ov verno đi o meriba, hem ka dav tut i kruna e dživdipnasiri.

11 Kas isi kana, nek šunel so o Duho vaćeri e khanđirjenđe. E pobednikose ništa naka šaj te ćerel o dujto meriba.’ ”

12 “E anđeose e khanđirjakere ano Pergam pisin:

‘Akava vaćeri Okova kole isi o mači oštro oto soduj strane: 13 Džanav kaj živineja, adari kaj e Sotonesoro presto. A palem zorale ićereja mlo anav hem na odrekninđan tut tari ti vera ana mande, čak ni zako vreme kad tumende, adari kaj živini o Sotoni, inele mudardo mlo verno svedoko o Antipa.

14 Ali isi man nešto hari protiv tute: isi tut adari nesave kola ićerena pe ko sikaviba e Valaamesoro, kova sikavđa e Valake te čhivel e Izraelconen te grešinen ađahar so hale o mas savoi žrtvujime e idolenđe hem so mukhle pe ano blud. 15 Hem isto ađahar, isi tut hem esavke save ićerena pe ko sikaviba e nikolaitengoro. 16 Adalese, pokajin tut! Te na ćerđan adava ka avav kora tute sigate, hem ka marav man olencar mačeja taro mlo muj.

17 Kas isi kana, nek šunel so o Duho vaćeri e khanđirjenđe. E pobednikose ka dav o garavdo maro vičime mana hem o parno bar, a ko adava bar pisime lesoro nevo anav, savo niko aver na džanel sem okolestar kova dobini le.’ ”

18 “E anđeose e khanđirjakere ani Tijatira pisin:

‘Akava vaćeri o Čhavo e Devlesoro, kaserei jaćha sar o plamen e jagakoro, a o pre sar i sjajno bronza: 19 Džanav te delja, to mangipe, ti vera, to služiba, ti istrajnost hem so akana ćereja više nego so ćerđan ano početak.

20 Ali isi man nešto protiv tute: mukeja e đuvlja e Jezavelja, koja pese vaćeri dai proročica, te sikaj hem te hovaj mle slugen te muken pe ano blud hem te han o mas savoi žrtvujime e idolenđe. 21 Dinđum la vreme te pokajini pe, ali oj na mangela te pokajini pe zako plo blud. 22 Ače, ka frdav la ani e nambormipasiri postelja, a okolen kola olaja mukena pe ano blud ani bari nevolja, te na pokajinde pe zako ple delja. 23 Hem ka mudarav lakere čhaven nambormipaja. Hem ađahar sa o khanđirja ka džanen da me injum Okova kova ispitujini o mislija hem o vile. Hem đijekhese tumendar ka dav palo tumare delja.

24 A tumenđe averenđe ani Tijatira, kola na ićerena tumen ko adava hovavno sikaviba hem kola na džanen “o bare tajne” e Sotonesere, phenava: naka čhivav upra tumende aver nesavo pharipe. 25 Samo, zorale ićeren okova so isi tumen đikote na avava.

26 E pobednikose, okova kova đi o kraj ćerela okova so naredinđum, ka dav le vlast upreder o narodija –

29 Kas isi kana, nek šunel so o Duho vaćeri e khanđirjenđe.’ ”