1 Ili, na džanen li, phraljalen – vaćerava okolenđe kola džanen o Zakoni – da o Zakoni isi le vlast upro manuš samo đikotei dživdo? 2 Ađahari hem i dindi đuvli, palo Zakoni, phandli zako plo rom đikotei ov dživdo. Ali, te lakoro rom merela, slobodnoi taro Zakoni saveja inele phandli zako plo rom. 3 Adalese, te dželi avereja đikotei lakoro rom dživdo, ka vičini pe preljubnica. Ali, te lakoro rom merela, slobodnoi taro Zakoni hem nane preljubnica te lelja avere.

4 Ađahar hem tumen, mle phraljalen, prekalo telo e Hristesoro muljen zako Zakoni te pripadinen averese, Okolese kova uštino taro mule, hem te ova plodonosna zako Devel. 5 Adalese so, đikote živinđam palo telo, o bišukar požude save inele izazivime e Zakoneja vladinde ano amare udovija, a o plod adalestar inele meriba. 6 Ali, akana injam slobodna oto Zakoni adalese so muljam zako adava saveja injamle phandle. Akana služinaja e Devlese ko nevo način e Duhostar, a na ko purano način palo pisime Zakoni.

7 So onda ka phena? Dai o Zakoni greh? Na, nisar! A palem, me naka džanav ine soi greh te na ovel ine o Zakoni. Adalese so, naka džanav ine soi požuda te na phenel ine o Zakoni: “Ma mang okova so nane klo!” 8 A o greh iskoristinđa i prilika hem prekali adaja naredba ana mande izazivinđa svako vrsta oti požuda. Adalese so, o grehi bizo Zakoni mulo. 9 Nekad živinđum bizo Zakoni, a kad ali i naredba, o greh oživinđa, 10 a me muljum. I ađahar i naredba, savi valjanđa te anel maje dživdipe, anđa maje meriba. 11 Adalese so, o greh iskoristinđa i prilika hem e naredbaja prevarinđa man hem mudarđa man.

12 Adalese, o Zakoni sveto hem i naredbai sveto, pravedno hem šukar. 13 Značini li da adava soi šukar anđa maje meriba? Na, nisar! A palem, o greh te mothoj pe dai greh, ov prekalo adava soi šukar anđa meriba, hem ađahar o greh prekalo naredbe te mothoj pe dai pherdeste grešno.

14 Džanaja dai o Zakoni duhovno, a da me injum telesno, biknime sar robo e grehese. 15 Na haljovava so ćerava, adalese so na ćerava okova so mangava, nego ćerava okova so mrzinava. 16 A te ćerava okova so na mangava, značini da slažinav man dai o Zakoni šukar. 17 A palem, adava na ćerava više me, nego o greh savo živini ana mande. 18 Adalese džanav da ana mande – ano mlo telo – na živini ništa šukar. Adalese so, isi man želja te ćerav okova soi šukar, ali na injum ano stanje te ćerav adava. 19 Adalese so, na ćerava o šukar, savo mangava, nego o bišukar, savo na mangava. 20 Ali, te ćerava okova so na mangava, onda adava na ćerava me, nego o greh savo živini ana mande.

21 Ađahar arakhljum akava zakoni: kad mangava te ćerav šukar, adathei odmah o bišukar. 22 Ano mlo vilo injum oduševime e Devlesere Zakoneja, 23 ali dikhava da ano mle udovija delujini aver zakoni, savo marela pe protiv o zakoni mla gođakoro hem phandela man e grehesere zakoneja savoi ano mle udovija. 24 Kobor jadno injum me! Ko ka oslobodini man akale telostar savo merela? 25 Hvala e Devlese, kova oslobodini man prekalo amaro Gospod Isus Hrist! Ađahar me mla gođaja služinava e Devlesere Zakonese, a mle teloja e grehesere zakonese.