1 О Яково жаластар майдур тай авиля пэ пхув каринг э восточни народуря. 2 Котэ вов додикхля хаинг андэ мал тай катар латэ трин гуртуря бакрэн, пала кода со андай кодыя хаинг паярэнас лэ скотос. Э хаинг сас ушаради барэ барэса. 3 Кала саворэ гуртуря стидэнаспэ, э пастухоря злэнас о бар тай паярэнас лэ бакрэн, ай тунче стхонас о бар палпалэ по тхан.

4 О Яково пушля кай э пастухоря:

— Пхрала, катар тумэ?

— Амэ сам анда Харано, — пхэндэ вонэ.

5 О Яково пушля:

— Ай тумэ ганэн лэ Лаванос, лэ Нахоростерэ внукос?

— Эгэ, ганас, — пхэндэ вонэ.

6 — Сар лэстэ ся мишто?

— Ся мишто, — пхэндэ вонэ. — Ай акэ э Рахиль, лэстери щей, жал лэ бакрэнца.

7 — О кхам инке вучес сыно, — пхэндя вов. — Инке най время тэ стидэн о ското. Дэн паи лэ бакрэнди тай даравэн лэн палпалэ пэ мал.

8 — Амэнди нащи, — пхэндэ вонэ. — Трэбуй тэ стидэнпэ ся гуртуря тай тэ злэн о бар пай хаинг, тунче амэ даса паи лэ бакрэнди.

9 Вов инке дэлас дума лэнца, кала поджыля э Рахиль пэстерэ дадэстерэ бакрэнца — вой праварэлас лэ бакрэн. 10 Кала о Яково додикхля лэ Рахиля лэстерэ какостеря лэ Лаваностеря щя, лэ бакрэнца и бузнэнца, вов поджыля изля пай хаинг о бар тай дя паи лэ Лаваностерэ бакрэнди. 11 Тунче о Яково чюмидя ла Рахиля тай фартэ заровля, 12 и пхэндя лати, со вов родо лати дадэсти, ла Ревэкако шаво. Э Рахиль прастая тай роспхэнэн пэстерэ дадэсти.

13 Кала о Лавано ашундя, кай авиля лэстеря пхьяко шаво, вов прастая каринг лэстэ, обля лэс, чюмидя тай акхардя лэс пэстэ андо чер. О Яково роспхэндя лэсти пала ся, 14 ай о Лавано пхэндя:

— Ту сан мэрно чячё рат тай мэрни тила.

Кала о Яково прожудя лэстэ шон, 15 о Лавано пхэндя лэ Яковости:

— Ту сан манди родо, ай пала со ту трэбуй тэ терэс бути важ мандэ йивья? Пхэн манди, соза тути тэ потинав.

16 Кай о Лавано сас дуй щея: ла барэдэря акхарэнас Лия, ай ла цыкня — Рахиль. 17 Кай Лия сас ковлэ якха, ай э Рахиль сас шукарни тай лащи пай муй и пэса. 18 О Яково покамля ла Рахиля тай пхэндя лэ Лаваности:

— Мэ лава тэ терав тути бути ефта бэрша пала тери цыкни щей, палай Рахиль.

19 О Лавано пхэндя:

— Фэдэр мэ отдава ла тути, ай най варикасти аврэсти. Ашпэ мандэ.

20 О Яково терэлас бути ефта бэрша, соп тэ лэл ла Рахиля, и кадыла бэрша прожылэ важ лэстэ, сар найбут деса, пала кода со вов камэлас ла.

21 Тунче о Яково пхэндя лэ Лаваности:

— Дэ манди мэрня ромня, соп мэ тэ жував ласа сар ромняса: авиля мэрни время.

22 О Лавано акхардя саворэн, ко жувэлас найдур паша лэстэ, тай стходя лащи мисяля. 23 Ай сар авиля э рят, о Лавано ля пэстеря щя ла Лия тай дя ла лэ Яковости, и о Яково сутя ласа. 24 О Лавано дя ла щяти ла Лияти пэстеря бутярня ла Зелфа.

25 Кала десайля, о Яково дикхля, ай кода э Лия! Вов пхэндя лэ Лаваности:

— Со ту тердян манца? Мэ жэ тердэм тути бути палай Рахиль. Пала со ту хохадян ман?

26 О Лавано пхэндя:

— Амэндэ на отдэн пала ром ла цыкня щя данглал ла барэдэрятар. 27 Стер о ябьявэско курко кадыла щяса, ай тунче амэ отдава тути и ла цыкня, важ авэр ефта бэрша бути.

28 О Яково кадя и тердя: прондярдя о курко лэ ябьявэско ла Лияса, ай тунче о Лавано отдя лэ Яковости пэстеря щя ла Рахиля. 29 О Лавано дя ла Рахиляти пэстеря бутярня ла Вала. 30 О Яково ля тэ жувэл ла Рахиляса тай камэлас ла майбут, сар ла Лия. Вов терэлас бути лэ Лаваности инке ефта бэрша.

31 Кала о РАЙ дикхля, со э Лия исы найкамли, Вов отпхандя лати э пэрь, соб тэ анэл бэятонэн. Ай э Рахиль сас бибэяцэндери. 32 Э Лия ашыля пхари тай андя шаворэс. Вой пхэндя: «О РАЙ додикхля мэрни бибахт. Акана мэрно ром чячес лэла ман тэ камэл», тай дя лэсти алав Рувимо*Пхур. евр. алав «Реувен» пхэнэлпэ сар евр. дума «раа беонйи» (вов дикхля мэрни бибахт)..

33 Вой упалэ ашыля пхари тай, кала андя шаворэс, пхэндя: «Акэ сар о РАЙ ашундя, со мэ найкамли, Вов дя манди инке кадылэ шаворэс». Вой дя лэсти алав Симеоно†Пхур. евр. алав «Шымеон» ашунэлпэ сар евр. алав «шама» (вов ашундя)..

34 Вой упалэ ашыля пхари тай, кала андя шаворэс, пхэндя: «Акана мэрно ром приашэла каринг мандэ, пала кода со мэ андэм лэсти тринэн шавэн». Пала кода лэс акхарэнас Левиё‡Пхур. евр. алав «Левий» пхэнэлпэ сар евр. дума «йиллаве» (вов приашэла)..

35 Вой упалэ ашыля пхари тай, кала андя шаворэс, пхэндя: «Акана мэ ашарава лэ РАЕС». Пала кода дя лэсти алав Иуда§Пхур. евр. алав «Ехуда» пхэнэлпэ сар евр. алав «хода» (ашардя, наисардя) тай «одэ» (мэ ашарава). . Тунче вой парашыля тэ анэл бэятонэн.