1 Екхвар Исусо тэрдёлас пашай лэн Генисаретско, бут мануша стидэпэ и стасавэнас Лэс всаворэ ригэндар тэ ашунэ Лав Дэвлэско. 2 Исусо удикхля пашав бэрэго дуй чёвноря и мащярэн, савэ выжыле андай чёвноря и выхалавэнас пэстирэ сетки. 3 Вов зажыля андо чёвно лэ Симоноско, мангля лэс тэ отплывисарэл найдур бэрэгостар и бэшля, кай тэ сытярэл манушэн пав чёвно. 4 Кала Исусо пэрэашыля тэ сытярэл, пхэндя Симоности:

— Плывисар майдур, кай майбут паи, и шув сетки тумарэ, кай тэ астарэн мащё.

5 Симоно пхэндя:

— Сытяримари амаро! Амэ всавори рят бут терасас и нисо на астардэ. Но сар Ту пхэнэс, тунчи шава сетки.

6 Онэ стердэ кадя и астардэ фартэ бут мащё, кай сетки линэ тэ шындён. 7 Акхардэ вастэнца аврэн мащярэн, савэ сас андэ авэр чёвно, кай кола тэ поджан тай тэ поможысарэн лэнди. Онэ авиле и екхэтанэ стидэ мащен андэ лэдуй чёвноря скачи, со чёвноря линэ тэ тасон. 8 Симоно Пэтро дикхля када, пэля кай пэрнэ лэ Исусостирэ и пхэндя:

— Выжа мандар, Рай, колэстар со мэ мануш бэзэхало!

9 Важ кода со пэ лэстэ и пэ лэстирэ амала, авиля бари дар, сар дикхле, со кадя бут астардэ мащё. 10 Кадя и пэ Иаково лэ Иоаноса, шавэн Зэведеёстирэн, савэ сас амала Симоностирэ пай бути. Исусо пхэндя Симоности:

— На дара! Кала вряматар авэса тэ астарэс манушэн.

11 Онэ выцырдэ чёвноря по бэрэго, ашадэ вся и жыле пала Лэстэ.

12 Кала Исусо сас андэ екх форо, авиля Лэстэ мануш всаворо андэ проказа*Насвалимос, саво терэлас манушэс найжужэса. Лэсти нащи сас тэ зажал андо храмо тэ мангэл Дэвлэс.. Удикхля Исусос, пэля кай Лэстирэ пэрнэ и фартэ мангля:

— Рай! Сар Ту камэс, Тутэ исин зор тэ жужарэс ман!

13 Исусо процырдя васт, ляпэ калэ манушэстэ и пхэндя:

— Камав, ав жужо!

Проказа андэ кодья вряма ужыля манушэстар. 14 Исусо припхэндя лэсти:

— Никасти на роспхэн пала када, жа сикавпэ рашаести и ан жэртва пала пэско жужаримос, сар пхэндя Моисеё. Мэк онэ када удикхэна.

15 Нэ инке майбут розжаласпэ дума палав Исусо, фартэ бут мануша авэнас Лэстэ тэ ашунэн и тэ састярэнпэ насвалимастар. 16 Но Исусо жалас андэ биманушэндирэ тхана и мангэласпэ Дэвлэс.

17 Екхвар, кала Исусо сытярэлас, котэ бэшэнас фарисеёря, сытяримаря Законостирэ, савэ авиле андай бут тхана андэ Галилея, Иудея и андав Иерусалимо. Зор Рае Дэвлэстири авэлас Исусоса тэ састярэл насвалэн. 18 Акэ, авиле мануша, савэ андярэнас насвалэс пэрнэнца по паринд, камэнас тэ заандярэн андо чер, кай тэ тховэн англав Исусо. 19 Нащи сас тэ проандярэн лэс, колэстар со бут мануша сас котэ. Загульдэ по чер, розлинэ ушарди пав чер, змукле по паринд насвалэс машкар о чер, англав Исусо. 20 Исусо дикхля лэнго патимос и пхэндя колэсти манушэсти:

— Эртисарэнпэ тути тирэ бэзэха!

21 Фарисеёря и сытяримаря Законостирэ гындонас пэсти: «Ко Кала Мануш, Саво дэл думэл бэзэхалэ лава? Со, на екх о Дэл эртисарэл бэзэха?

22 Исусо поля, со онэ гындон, тай пхэндя лэнди:

— Со тумэ гындосарэн андэ тумарэ водя? 23 Со майлокхо: тэ пхэнэ: «Эртисарав тути тирэ бэзэха», — чи тэ пхэнэ: «Вщи и пхир»? 24 Кай тумэ тэ жанэн, со кав Шаво Манушыкано исин зор пэ пхув тэ эртисарэл бэзэха.

Тунчи пхэндя насвалэсти манушэсти:

— Пхэнав тути: вщи, лэ пэско паринд и жа черэ.

25 Андэ кодья ж вряма вов вщиля англай лэндэ, ля пэр со пашлёлас, тай жыля пэстэ черэ, лашарэлас лэ Дэвлэс. 26 И всаворэ дивосавэнас, лашарэнас лэ Дэвлэс и дараса пхэнэнас:

— Адес амэ дикхлям кода, со никала на сас.

27 Сар выжыля андав чер, Исусо удикхля стидэмарес налогонэндирэс, савэс акхарэнас Левиё. Вов бэшэлас по тхан, кай стидэнас налогоря.

— Жа пала Мандэ, — пхэндя лэсти Исусо.

28 Вов вщиля, ашадя вся и жыля пала Лэстэ. 29 Тунчи Левиё тховдя пэстэ черэ бари мэсали хамаса важ о Исусо. Котэ бут стидэмаря налогонэндирэ тай авэр мануша, сас палай мэсали лэ Исусоса. 30 Фарисеёря и сытяримаря Законостирэ пушэнас найлашымаса Исусостирэ сытярнэндар:

— Состар тумэ хан и пэн стидэмаренца налогонэндирэ и бэзэхалэ манушэнца?

31 Исусо пхэндя лэнди:

— На састэ манушэнди трэбуй врачё, ай насвалэнди. 32 Мэ авилем тэ акхарав на жужэн манушэн, а бэзэхалэн, кай тэ каисавэн андэ пэстирэ бэзэха.

33 Тунчи онэ пхэндэ Лэсти:

— Иоаностирэ и фарисеёнэндирэ сытярнэ бут молоря терэн мангимос лэ постоса, а Тирэ сытярнэ хан и пэн!

34 Исусо пхэндя лэнди:

— Чи мишто тэ мангэ манушэн пэ бьяв тэ авэн андо посто кала тэрно паша лэндэ? 35 Но авэна деса, кала залэлапэ лэндар тэрно. Тунчи андэ кола деса авэна тэ терэн посто.

36 Вов роспхэндя лэнди кацави дума:

— Нико на отшынэл котор нэвя йидатар, важ кода, кай тэ присувэл кай пураи. Сар вов када терэла, то и нэви йида хасавэла, и кай пураи йида кодва котор на поджала. 37 Нико на шол тэрни мол андэ пхуранэ морцянэ гонэ, колэстар со тэрни мол росшынэла лэн и вышолапэ, ай гонэ хасавэна. 38 Най, тэрно мол шон андэ нэвэ морцянэ гонэ. 39 И нико, ко пэл пхурано мол, на закамэла тэ пэл тэрно, колэстар со пхэнэла: «Пхурано мол фэдэр».