Fes Kranakuls
Ola Stori Blanga King Deibid
Wal dijan stori im blanga King Sol en hau imbin dai, en hau Deibid bin jidan king blanga ola Isreil pipul. Imbin meigim Jerusalem det speshalwan taun weya ola Isreil pipul bin oldei weship langa God. Bifo imbin dai, imbin jinggabat en meigim plen blanga det Serramoni Pleis blanga God deya langa Jerusalem, en imbin meiksho ola pipul bin sabi wanim dei garra dum deya langa det Serramoni Pleis. En im san Salaman na bin jidan det nyuwan king.
1
Brom Edam raidap langa Eibrahem
Jenasis 5:1-32; 10:1-32; 11:10-26
Wal Edam bin det dedi blanga Seth, en Seth bin det dedi blanga Inash, en Inash bin det dedi blanga Kenan. En Kenan bin det dedi blanga Mahalalel, en Mahalalel bin det dedi blanga Jered. En Jered bin det dedi blanga Inak, en Inak bin det dedi blanga Mathusala, en Mathusala bin det dedi blanga Leimek. En Leimek bin det dedi blanga Nowa. En Nowa bin abum thribala san en olabat bin neim Shem, Hem en Jeifeth.
Wal detlot san blanga Jeifeth bin neim Goma, Meigog, Medai, Jeiban, Tubal, Mishek en Tairas, en deibin jidan grengrenfatha blanga ol detlot pipul hu garram detlot neim. En det femili lain blanga Goma bin detlot pipul langa Eshkenes, Rifeth en Togama. En det femili lain blanga Jeiban bin detlot pipul langa Ilaisha, Tashis, Saipras en Rouds.
Wal detlot san blanga Hem bin neim Kush, Ijip, Libiya en Keinan, en deibin grengrenfatha blanga ol detlot pipul hu garram detlot neim. Det femili lain blanga Kush bin detlot pipul langa Seba, Habila, Sabta, Reiyama en Sabteka. En detlot san blanga Reiyama bin detlot pipul hu jidan langa Shiba en Dedan. 10 En Kush bin abum san neim Nimrod, en imbin brabli strongbala.
11 Wal det femili lain brom Ijip bin ol detlot Ludait, Einamait, Leiyabait, Neftahait, 12 Pethrasait, Keslahait en Krit pipul. En detlot Filastain pipul bin kaman brom detlot Krit pipul na. 13-16 Wal Keinan san neim Saidan bin det bigiswan san. En Keinan bin grengrenfatha blanga detlot Hitait pipul, en ol detlot Jebusait, Emarait, Gegashait, Hibait, Akait, Sinait, Abadait, Semarait en Hemathait pipul.
17 Wal detlot san blanga Shem bin neim Elam, Esha, Apekshed, Lad, Eram, As, Hul, Githa en Meshek. En deibin grengrenfatha blanga ol detlot pipul hu garram detlot neim.
18 Wal Apekshed bin dedi blanga Shela, en Shela bin dedi blanga Iba. 19 En Iba bin abum dubala san. Det bigiswan san bin neim Peleg, dumaji langa det taim na detlot pipul deibin oldei kadimatbat miselp en jidan langa miselpmiselp kantri. En det najawan san bin neim Joktan.
20-23 Wal det femili lain weya bin kamat brom Joktan bin Elmodad, Shelaf, Heisameibeth, Jera, Heidoram, Yusal, Dikal, Ibal, Abimeil, Shiba, Ofiya, Habila en Jobad.
24-27 Wal det femili lain weya bin kamat brom Shem bin neim Apekshed, Shela, Iba, Peleg, Riyu, Serug, Neihowa, Tera, en Eibram. En det najawan neim blanga Eibram bin Eibrahem.
Ola femili lain blanga Ishmeil
Jenasis 25:12-16
28 Wal Eibrahem bin abum dubala san neim Aisik en Ishmeil. 29-31 En detlot san blanga Ishmeil bin ol jidan boswan blanga olabat klen. Detlot san bin neim Neibayoth, Keda, Edbiyel, Mibsam, Mishma, Duma, Mesa, Heided, Tema, Jetuwa, Nefish en Kedema.
32 Wal Eibrahem bin abum sekan waif neim Ketura en imbin abum siksbala san. Detlot san bin neim Simran, Jokshan, Midan, Midiyan, Ishbak en Shuwa. En Jokshan bin abum dubala san neim Shiba en Dedan. 33 En Midiyan bin abum faibala san neim, Ifa, Ifara, Henak, Abida en Eldeiya.
Ola femili lain blanga Isau
Jenasis 36:1-19
34 Wal det san blanga Eibrahem neim Aisik bin abum dubala san neim Isau en Jeikob. 35 En detlot san blanga Isau bin neim Elifas, Ruwel, Jeyus, Jeilam en Kora. 36 En Elifas bin jidan dedi blanga Teman, Oma, Sefi, Geitam, Kenas, Timna en Amalek. 37 En Ruwel bin jidan dedi blanga Neihath, Sera, Shama en Misa.
Detlot feswan pipul hubin jidan langa Idam
Jenasis 36:20-30
38-42 Wal detlot feswan pipul hubin jidan langa det kantri gulum Idam bin det femili lain blanga Siyiya. Wal Siyiya bin abum dislot san neim Lotan, Shobal, Sibiyan, Eina, Daishon, Isa en Daishan. Wal Lotan bin abum dubala san neim Horai en Homam. En Lotan bin abum sista gulum Timna du. En Shobal bin dedi blanga Elban, Menahath, Ibal, Shefi en Onam. En Sibiyan bin abum dubala san neim Aiya en Eina. Eina bin dedi blanga Daishon, en Daishon bin dedi blanga Hemran, Eshban, Itharan en Keran. En Isa bin dedi blanga Bilan, Seiban en Jakan. En Daishan bin dedi blanga Yus en Eran.
Detlot king blanga Idam
Jenasis 36:31-43
43-50 Wal dislot king bin jidan bos blanga det kantri gulum Idam bifo Isreil bin abum eni king. Wal Bela bin det king blanga Idam en imbin jidan langa det taun gulum Dainaba. Bela bin det san blanga Biyowa. Afta Bela bin dai Johab hubin det san blanga Sera brom Bosra, bin jidan det nyuwan king. Afta Johab bin dai Husham, brom det kantri gulum Teman, bin jidan det nyuwan king. Afta Husham bin dai Heided, det san blanga Bedad bin jidan det nyuwan king langa det taun gulum Eibith. Imbin bidim det Midiyan traib langa fait deya langa det kantri gulum Moweb. Afta Heided bin dai Semla hubin brom Mesreka, bin jidan det nyuwan king. Afta Semla bin dai Shaul hubin brom Reiyaboth langa Ribasaid, bin jidan det nyuwan king. Afta Shaul bin dai Beilenan hubin det san blanga Ekbowa, bin jidan det nyuwan king. Afta Beilenan bin dai Heided bin jidan det nyuwan king langa det taun gulum Pau. Imbin merrit langa Mehetabel, det doda blanga Meitrid en grendoda blanga Misaheb.
51-54 Wal detlot pipul brom Idam deibin kadimat miselp langa dislot klen na, Timna, Elba, Jetheth, Oholibama, Ela, Painan, Kenas, Teman, Mibsa, Megdiyel en Airam.