1 Afta na ol detlot Filastain solja bin shifdim olabat kemp langa det pleis gulum Afek, en ola Isreil solja bin kemp wansaid langa det springwoda deya langa det pleis gulum Jesriyel Beli.

2 Wal wen detlot Filastain solja bin gowei brom det feswan kemp blanga olabat, deibin abum 100 solja langa ebri grup, en tenbala grup bin boksimap miselp blanga meigim 1,000 solja, en lagijat na deibin bulurrum biyain langa detlot faibala king blanga olabat, en Deibid en im solja olabat bin bulurrumbat biyain langa detlot solja blanga King Ekish.

3 Wal wen detlot boswan Filastain solja bin luk Deibid en im solja olabat, deibin askim King Ekish, “Wotfo detlot Isreil solja olabat iya?”

Wal det king bin tok, “Im rait, dumaji dijan Deibid. Imbin det boswan wekinmen blanga det Isreil king neim Sol basdam. Bat imbin jidan garram mi longtaim na, en ai nomo bin faindim enijing rong langa im. Im nomo bin dum enijing rong brom det taim weya imbin jidan garram mi raidap tudei.”

4-5 Wal detlot boswan solja bin gitwail langa det king, en deibin tok, “Nomo. Im kaan kaman en fait langa detlot Isreil solja garram wi, dumaji im mait tenaran en fait langa wi. Melabat sabi hu im. Blanga im na ola gel bin densdens en jinginatbat en tok, ‘King Sol bin kilim loda Filastain solja ded. Bat Deibid bin kilim bigismob ded.’ Wal yu garra lafta jandimbek im langa det taun weya yubin gibit im, dumaji if im wandim, im gin jis tenaran deya langa det fait en binijimap wi holot blanga meigim det Isreil king gudbinji langa im.” Lagijat na detlot boswan solja bin tok.✡1 Sem 18:7; 21:11

6 Wal King Ekish bin duwit langa olabat, en imbin jingat langa Deibid, “Trubala ai dalim yu. Ai sabi yubin oldei trubala langa mi, en im bina meigim mi gudbinji if yu bina fait wansaid garram mi, dumaji ai nomo bin faindim enijing rong langa yu brom det taim weya yubin jidan garram mi raidap tudei. Bat detlot najalot king nomo wandim yu garra fait garram melabat. 7 Wal yu lafta deigim yu solja olabat, en yumob garra gobek gudbinjiwei, en yu kaan jinggabat blanga dum enijing rong blanga meigim detlot king nogudbinji.”

8 Wal Deibid bin tok, “Bos, wanim aibin dum rong? Yu nomo bin faindim enijing rong langa mi brom det taim weya aibin jidan garram yu raidap tudei. Wal wotfo ai kaan kaman en album yu fait? Yu na main king en bos, indit?”

9 Wal det king bin tok, “Yuwai, ai sabi yubin oldei jidan gudwei langa mi jis laiga einjul brom God. Bat detlot najalot king bin tok yu kaan kaman garram melabat langa det fait. 10 Yu en ol detlot men blanga yu hubin gowei brom King Sol, yumob garra gidap ailibala en gowei brom iya bifo sanrais.”

11 Wal ailibala neksdei na Deibid en im solja olabat bin gobek langa det Filastain kantri, en ol detlot Filastain solja bin kipgon langa det pleis gulum Jesriyel Beli.