1 Wal Jowesh bin oni 7 yiya ol wen imbin jidan det nyuwan king langa Juda. En imbin jidan king langa Juda fo 40 yiya na. En King Jowesh mami bin neim Saibiya, en imbin brom det taun gulum Biyashiba.

2 Wal langa ol det taim wen Jehoiyada det serramonimen bin stil jidan laibala King Jowesh bin oldei dum ebrijing gudwei blanga meigim YAWEI det trubala God gudbinji langa im. 3 Jehoiyada bin pikimat dubala gel blanga jidan waif blanga King Jowesh en dubala bin abum san en dodamob blanga im.

4 Bambai King Jowesh bin jinggabat blanga meigim det Serramoni Pleis jidan gudwei igin. 5 Imbin majurrumap ola serramonimen en Libaimen en imbin tok, “Yu garra go ebriweya langa Juda en yu garra gajim ola teks mani ola pipul garra pei ebriyiya. Ai wandim dijan mani streidawei, dumaji wi garra abum tharran mani blanga fiksimap det Serramoni Pleis.” Bat detlot Libaimen nomo bin go kwikbala blanga dum wanim det king bin dalim olabat. 6 Wal imbin tok langa Jehoiyada det haibala serramonimen, “Wotfo yu nomo bin jandim detlot Libaimen blanga gajim detlot teks mani? Mosis det wekinmen blanga YAWEI en ola pipul bin agri longtaim blanga yusum det mani blanga lukaftum det Seikridwan Tent.✡Eksa 30:11-16 7 Wal wi lafta fiksimap det Serramoni Pleis gudwei, dumaji detlot san blanga det nogudbala wuman neim Ethalaiya bin bitsimap tharran. En deibin yusum sambala seikridwan enijing blanga weshipbat det drimin gulum Beil.”

8 Wal King Jowesh bin gibit oda blanga meigim wudwan boks en pudum atsaid gulijap langa det geit blanga det Serramoni Pleis. 9 Imbin jandim leda ebriweya langa Juda en Jerusalem en imbin askim ebribodi blanga bringimap det teks mani langa det Serramoni Pleis jis laik Mosis bin askim olabat grengrenfathamob blanga dum.

10 Ola lidamob en pipul bin ol agri, en deibin bringimap olabat mani langa Jerusalem en deibin pudum langa det boks. 11 Ebridei detlot Libaimen bin deigim det boks langa det Serramoni Pleis, en det wekinmen blanga det king en det wekinmen blanga det haibala serramonimen bin emtimat det boks en kaundimap detlot mani. Afta deibin pudumbek det emtiwan boks langa im pleis. 12 King Jowesh en Jehoiyada bin gibit detlot mani langa ola boswan blanga ol detlot wek weya deibin dum langa Serramoni Pleis. Deibin yusum detlot mani blanga peiyim ola men hubin wek garram ston, en ola kapinta, en detlot hubin wek garram aiyan en kopawan du.

13 Ol dislot men bin go blanga wek streidawei blanga fiksimap det Serramoni Pleis en deibin ol wek adbala en imbin luk jis laik wen imbin jidan basdam. 14 Dei nomo bin yusum ol detlot teks mani blanga fiksimap det pleis en deibin gibit ola leftoba mani langa King Jowesh en Jehoiyada. Deibin yusum detlot mani blanga meigim ola dish en ebrijing brom gol en silba blanga pudum langa det Serramoni Pleis.

Deibin gibit sekrifais weya meigim YAWEI gudbinji olataim langa det Serramoni Pleis raidap Jehoiyada det serramonimen bin dai. 15 Jehoiyada bin dai wen imbin 130 yiya ol, 16 en deibin berrim im bodi langa det pleis weya dei oldei berrim ola king, deya langa Jerusalem, dumaji imbin dum detmatj gudwan ting langa detlot pipul blanga Isreil, en blanga God en blanga det Serramoni Pleis.

17 Afta Jehoiyada det serramonimen bin dai, ola lida blanga Juda bin go langa King Jowesh en deibin meigim im dum wanim deibin wandim. 18 Streidawei ola pipul blanga Juda bin stap weshipbat langa det Serramoni Pleis blanga YAWEI en deibin stat weshipbat detlot drimin sheip en det gelwan god gulum Eshara. Ol dislot nogudbala ting bin meigim YAWEI brabli wail langa ola pipul langa Juda en Jerusalem, 19 bat imbin stil kipgon jandimbat speshalwan mesinja blanga dalimbat detlot pipul blanga kambek langa im. Detlot pipul nomo bin wandi lisin.

20 Wal det spirit blanga God bin tok langa Sekaraiya det san blanga Jehoiyada det serramonimen, en Sekaraiya bin dalim ebribodi wanim God bin tok, “Wotfo yumob nomo kipum main lowa? Dijan garra bringimap panishmen langa yumob. Yumob bin libum mi. Wal ai garra libum yumob du.”

21-22 Wal King Jowesh bin fogedabat det dedi blanga Sekaraiya bin gudfren langa im. Wen ola pipul blanga Juda bin meigim plen blanga kilim Sekaraiya, King Jowesh bin joinin langa olabat en imbin gibit oda blanga stonim im raidap imbin dai langa det kotyad langa det Serramoni Pleis. Wen Sekaraiya bin gulijap dai imbin jingat, “Ai prei YAWEI garra luk wanim yumob dum en im garra panishim yumob.”✡Meth 23:35; Luk 11:51

23 Wal langa det draisisan taim langa det neksyiya detlot amimob brom Siriya bin teikoba Juda en Jerusalem en deibin kilim ol detlot lidamob. Deibin gajim ola gudwan ting blanga detlot pipul en deibin deigimbek langa olabat king langa Dameskas. 24 Nomeda detlot amimob brom Siriya bin brabli lilwan, bat YAWEI bin larram olabat bidim det brabli bigwan amimob blanga Juda, dumaji imbin panishim King Jowesh en ola pipul dumaji deibin tenawei brom im.

25-26 Deibin ardim King Jowesh brabliwei langa det fait, en wen detlot Siriya amimob bin libum Juda, dubala boswan lida neim Seibad en Jehosabed bin meigim plen blanga peibek King Jowesh dumaji imbin kilim Sekaraiya. Dubala bin meigim plen en dubala bin kilim ded King Jowesh wen imbin stil leidanbat langa im sweig brom det taim weya detlot Siriya solja bin kilim im. Deibin berrim King Jowesh langa Jerusalem, bat dei nomo bin berrim im garram ola najalot king. 27 Det buk gulum “Detlot stori blanga ola king,” dalim mowa blanga detlot san blanga Jowesh, en wanim detlot speshalwan mesinja bin tok blanga im en hau imbin fiksimap det Serramoni Pleis. En Amasaiya det san blanga Jowesh bin jidan det nyuwan king.