1 Wal Manesa bin jidan det nyuwan king blanga Juda wen imbin 12 yiya ol en imbin jidan king langa Jerusalem fo 55 yiya. 2 King Manesa bin gibit bekboun langa God en imbin bulurrum ol detlot nogudwan ting blanga detlot pipul hu God bin andimwei brom Isreil.✡Jera 15:4 3 Imbin bildimapbek detlot nogudwan seikridwan pleis weya im dedi King Hesakaiya bin pulumdan. Imbin bildimap detlot teibul blanga ofring blanga det drimin gulum Beil en imbin pudumap detlot seikridwan pol blanga weshipbat langa det gelwan drimin gulum Eshara, en imbin weshipbat olabat en detlot sta ontop langa skai du.

4 En deya langa det Serramoni Pleis weya dei gin oni weshipbat langa YAWEI, King Manesa bin bildimap detlot teibul blanga ofring blanga detlot drimin brom najalot kantri.✡2 Kran 6:6 5 Imbin pudum ol detlot teibul blanga ofring blanga ol detlot sta langa det dubala kotyad deya langa det Serramoni Pleis. 6-7 En imbin pudumap purdiwan ston blanga najalot drimin langa det Serramoni Pleis. King Manesa bin dumbat detlot klebabala trik en najalot nogudwan ting en imbin askim detlot klebabalamen blanga dalim im wanim blanga dum. En imbin sekrifais im ronwan san olabat deya langa det pleis gulum Hinam Beli. Imbin dum bigismob nogudbala ting en imbin meigim YAWEI brabli wail.

Longtaim God bin dalim King Deibid en im san Salaman, “Jerusalem im det pleis weya aibin pikimat brom eni najawan pleis deya langa Isreil. Im blanga main, en deya langa det serramoni pleis dei garra oni weshipbat mi olagijawan. 8 If main pipul olabat teiknodis en duwit langa main lowa en wanim aibin titjimbat thru langa main wekinmen Mosis, wal ai kaan neba meigim olabat gowei igin brom dijan kantri weya aibin gibit langa olabat grengrenfathamob.” Lagijat na God bin tok.✡1 King 9:3-5; 2 Kran 7:12-18

9 Bat detlot pipul deya langa Juda en Jerusalem bin teiknodis langa King Manesa en deibin dum brabli nogudbala ting. Deibin dum moweswan ting den detlot pipul brom najalot kantri weya God bin binijimap olabat.

10 Wal YAWEI bin trai wonim King Manesa en detlot pipul blanga olabat nogudbalawei, bat olabat nomo bin wandim irrim en teiknodis langa det wed blanga im. 11 Wal imbin larram det Asiriya boswan amimob teikoba Juda en deigimwei King Manesa prisana. Deibin pudum huk langa im nos en deibin taiyimap im garram tjein, en deibin deigim im langa Bebalon. 12 Wen King Manesa bin jidan prisana deya, imbin askim God blanga larramgo im fri en album im. 13 Wal YAWEI bin irrim det preya blanga King Manesa en imbin luk imbin jidan brabli soribala, en imbin larram im gobek langa Jerusalem en jidan king deya. King Manesa bin sabi na YAWEI bin det trubalawan God.

14 Bambai na King Manesa bin bildimapbek detlot wol deya sanraisaid langa Jerusalem en imbin meigim im mowa haibala. Imbin go brom Gihon Beli raidap langa Fish Geit en raidaran langa det pleis blanga det taun gulum Hil Blanga Ofel. King Manesa bin pudum boswan amimen langa ola strongwan taun langa Juda. 15 King Manesa bin deigimwei brom det Serramoni Pleis ola drimin sheip en purdiwan ston blanga ola god brom najalot kantri. Imbin gajim ol detlot teibul blanga ofring weya imbin bildimap gulijap langa det Serramoni Pleis en langa najalot pleis deya langa Jerusalem. Imbin tjakidawei ol detlot ting atsaid brom det taun. 16 Afta tharran imbin bildimbek ol detlot teibul blanga ofring blanga YAWEI. Imbin gibit sekrifais blanga gibit theingks langa YAWEI en blanga askim im blanga lukaftumbat im gudwei. Imbin dalim ebribodi langa Juda blanga weshipbat YAWEI det God blanga Isreil. 17 Ola pipul bin duwit langa King Manesa, bat deibin weshipbat YAWEI langa olabat ronwan serramoni pleis.

18 Wal ola ebrijing weya King Manesa bin dum wen imbin jidan king, en im preya langa YAWEI, en detlot woning brom im speshalwan mesinjamob, deibin raidimdan langa det buk gulum Ola stori blanga ola king brom Isreil. 19 Ol dislot ting blanga King Manesa en im preya en det ensa brom God deibin raidimdan langa det buk gulum Ola stori blanga ola speshalwan mesinja. Deibin raidimdan ola nogudbala ting weya King Manesa bin dum bifo imbin tenim miselp langa God igin. En deibin raidimdan ola pleis weya imbin pudum drimin sheip, en weya imbin pudum serramoni pleis blanga weship det gelwan god gulum Eshara.

20 Wal King Manesa bin dai en deibin berrim im bodi gulijap langa det king haus. Im san Eman bin jidan det nyuwan king.

21 Wal Eman bin 22 yiya ol wen imbin jidan det nyuwan king blanga Juda, en imbin jidan king langa Jerusalem fo 2 yiya. 22 King Eman bin gibit bekboun langa YAWEI seim laik im dedi King Manesa bin dum, en imbin weshipbat en gibitbat sekrifais langa detlot drimin sheip im dedi bin meigim. 23 King Manesa bin kambek langa YAWEI bat King Eman nomo bin dum tharran. Imbin kipgon dum mowes nogudbala ting langa im dedi.

24 Wal sambala boswan wekinmen blanga King Eman nomo bin wandim im en deibin kilim im ded deya langa im ronwan haus. 25 Bat detlot Juda pipul bin kilim detlot men hubin kilim det king en deibin meigim im san Josaiya jidan det nyuwan king.