7
Wal main gudfren olabat, wen God bin tok detlot wed, imbin pramisim detlot wed langa wi. En blanga tharran na wi garra meigim miselp klinbala en nomo bulurrumbat detlot nogudbala ting weya meigim wi nogud insaidwei en atsaidwei. En wi garra trai en jidan brabli gudbalawei nomo garram enijing rong, dumaji wi garra rispek God brabliwei.
Pol bin gudbinji blanga detlot pipul
Wal yumob garra opinim yumob hat langa mi, dumaji ai nomo bin dum nogudbala ting langa enibodi, en ai nomo bin meigim enibodi jidan nogudbala, en ai nomo bin trikimbat enibodi blanga gajimbat enijing brom olabat.
Wal ai nomo tok lagijat blanga pudum bleim langa yumob. Nomo. Aibin dalim yumob bifo, en ai garra dalim yumob igin. Ai laigim yumob brabliwei, en wi ol jidan wanbala. En nomeda maitbi ai garra dai weya mi dum det wek, bat stil ai garram det gudwan filing blanga yumob.
Wal ai trastim yumob brabliwei, en mi oldei tok gudbinjiwei blanga yumob. En nomeda mi abumbat loda trabul, bat stil yumob oldei meigim mi strongbala, en mi brabli gudbinji.
Yumob sabi? Wen aibin go langa det kantri gulum Mesadoniya, aibin abum detmatj trabul brom detlot pipul hu nomo bilib langa det gudnyus, en aibin wori blanga yumob detmatj du. 2 Karin 2:13 Bat God oldei album detlot pipul hu wori miselp, en imbin album mi du, en wen Taidas bin kaman deya langa mi brom yumob, God bin meigim mi strongbala.
Wen aibin luk Taidas, aibin gudbinji. En wen imbin dalim mi yumob bin meigim im gudbinji, det wed bin meigim mi brabli gudbinji. En imbin dalim mi yumob bin nogudbinji blanga ol detlot nogudbala filing weya yumob bin abum blanga mi basdam, en imbin dalim mi yumob bin wandi luk mi, en yumob bin oldei tok gudbalawei blanga mi. En tharran na meigim mi gudbinji brabliwei.
Wal nomeda det najawan leda weya aibin jandim langa yumob bin meigim yumob nogudbinji, bat stil mi nomo sori aibin jandim det leda. Basdam aibin sori, dumaji aibin irrim det leda bin meigim yumob nogudbinji. Bat wen aibin meigim yumob nogudbinji, yumob bin tjeinjim det nogudbalawei blanga yumob. En tharran na meigim mi gudbinji. En yumob gudbinji du.
Yu si? Ai nomo bin ardim yumob, dumaji God bin yusum det leda weya bin meigim yumob nogudbinji blanga meigim yumob tjeinjim det nogudbalawei blanga yumob.
10 Yumob sabi? Wen enibodi jidan nogudbinji blanga ola nogudbala ting weya imbin dumbat, en im tjeinjim det nogudbalawei blanga im, wal God garra seibum im. En tharran na meigim im gudbinji. Bat wen im jidan nogudbinji eniwei, en im nomo tjeinjim det nogudbalawei blanga im, wal det nogudbinji garra meigim im dai.
11 Yu si? Det leda bin meigim yumob nogudbinji. Bat God bin yusum det leda blanga tjeinjim yumob, en imbin meigim yumob jinggabat, en imbin meigim yumob wandi jidan nomo garram enijing rong.
Yumob sabi? Det leda bin meigim yumob abum det gudwan filing blanga mi, en yumob wandi luk mi na. Bat yumob nomo wandim mi blanga kaman langa yumob nogudbinjiwei. En det leda bin meigim yumob jinggabat det men hubin dum det nogudbala ting weya bin meigim det trabul kaman langa yumob. En yumob bin gitwail langa det men, en yumob bin streitinimap im.
Wal ai sabi na yumob bin album miselp streitinimap det trabul, en yumob nomo garram enijing rong langa yumob na.
12 Yu si? Ai nomo bin jandim det leda langa yumob oni blanga meigim yumob streitinimap det men hubin dum det nogudbala ting. En ai nomo bin jandim det leda langa yumob oni blanga meigim yumob jinggabat det sambodi weya det men bin dum det nogudbala ting. Nomo. Aibin jandim det leda langa yumob blanga gibit yumob tjens blanga shoum God yumob rispek mi. 13-14 En yumob bin meigim mi brabli gudbinji, dumaji yumob bin shoum ebribodi yumob rispek mi brabliwei.
Wal basdam wen aibin jandim Taidas langa yumob, aibin tok brabli gudbinjiwei blanga yumob, en aibin dalim im yumob garra album im. En yumob nomo bin meigim mi sheim, dumaji yumob bin album im gudbalawei. En wen imbin kambek langa mi, aibin luk imbin gudbinji. En imbin meigim mi gudbinji, dumaji yumob bin meigim im gudbinji.
Yu si? Aibin oldei tok trubalawei langa yumob, en seimwei det wed weya aibin tok langa Taidas blanga yumob bin trubala. 15 En wen imbin kaman langa yumob deya langa Korinth, yumob bin redi blanga duwit langa im, en yumob bin welkam im, en yumob bin teiknodis langa im brabliwei.
16 Wal mi brabli gudbinji na, dumaji ai gin trastim yumob brabliwei na.

7:5 2 Karin 2:13