1 Wal yumob irrim mi na, dumaji ai garra tok blanga main ronselp na. Sambala pipul reken wen mi deya garram yumob, mi brabli isiwan langa yumob, en dei reken wen mi longwei brom yumob, mi brabli ad langa yumob. Bat ai dalim yumob. Jisas Krais im kainbala, en im isiwan. 2 En blanga tharran na mi askimbat yumob nomo blanga fosim mi blanga tok rafwei langa yumob wen mi kaman langa yumob, dumaji ai sabi ai gin hendulum detlot pipul hu reken mi bulurrum det wei blanga dijan wel.

3 Wal trubala mi jidan langa dijan wel. Bat mi nomo bulurrum det wei blanga dijan wel en fait seimwei laik ola pipul langa dijan wel oldei fait. 4 Mi nomo yusum detlot ting weya dei oldei yusum blanga fait langa dijan wel. Mi oldei yusum det pawa blanga God blanga fait langa det enami weya blandim miselp langa brabli strongbala pleis, en mi oldei bidim det enami. 5 Bat det enami nomo pipul. Mi fait langa laiyawan wed, en mi oldei bidim detlot laiyawan wed, en mi oldei tjakidawei ola praudbala wed weya stapam pipul brom sabi God, en mi oldei go shotkat langa detlot nogudbala wed weya pipul jinggabat, en mi oldei tenimran detlot wed blanga meigim olabat duwit langa det wed blanga Jisas Krais.

6 Yumob sabi wanim mi toktok? Wen yumob shoum miselp yumob sabi hau blanga bulurrum Jisas Krais brabliwei, wal brom det taim na mi redi blanga streitinimap enibodi brom yumob hu nomo duwit langa Jisas Krais.

7 Bat yumob nomo sabi hau blanga bulurrum Jisas Krais brabliwei yet, dumaji yumob oldei lukinatbat ebrijing atsaidwei. Ai sabi tharran, dumaji sambala pipul deya reken olabat blanga Jisas Krais en seimtaim dei reken mi nomo blanga im. Bat dei garra jinggabat adbala, dumaji mi blanga Jisas Krais seimwei laik olabat blanga im.

8 Wal Jisas Krais det Bos blanga wi bin gibit mi pawa blanga meigim yumob jandap strongbala. Im nomo bin gibit mi det pawa blanga meigim yumob wikwan. En nomeda mi tok praudbalawei blanga det pawa, bat stil mi nomo sheim blanga tok praudbalawei, dumaji dijan wed weya mi dalim yumob im trubala. 9 Ai garram pawa brom God. Bat wen mi tok streidat langa yumob langa detlot leda weya mi jandim langa yumob, ai nomo wandim yumob garra reken mi trai en bradinim yumob.

10 Yumob sabi? Sambala pipul deya oldei tok, “Wen Pol jandim leda langa wi, im oldei tok brabli rafwei en strongbalawei langa det leda. Bat wen im iya garram wi, im oldei jandap wikwan, en det wed blanga im wikwan du.” Lagijat na sambala pipul oldei tok. 11 Bat detlot pipul garra jinggabat, dumaji wen mi kaman langa yumob, ai garra dum wanim aibin dalim yumob ai garra dum langa det leda weya aibin raidimdan langa yumob wen aibin longwei brom yumob.

12 Wal sambala pipul deya reken miselp olabat haibala. Bat olabat brabli granggibala, dumaji dei oni luk langa olabat ronselp. Dei nomo luk langa najalot pipul. Im jis laik dei meigim olabat ronwei blanga meshurum miselp en faindat hau haibala olabat.

Wal ai dalim yumob. Ai kaan dum detkain ting en joinin langa detlot pipul en meshurumbat miselp en meigim miselp haibala. 13 En nomeda mi oldei tok praudbalawei, bat stil mi nomo tok praudbalawei blanga ebrijing. Oni blanga det wek weya God bin gibit mi blanga dum. En imbin gibit mi det wek blanga dum garram yumob du.

14 Yu si? Wen mi tok strongbalawei langa yumob, ai nomo reken miselp haibala, dumaji God na bin gibit mi det wek blanga bajimap det gudnyus blanga Jisas Krais langa yumob.

15 Yumob sabi? Mi nomo pudum miselp langa detlot najalot pipul wek en tok praudbalawei blanga olabat wek weya God bin gibit olabat. Nomo. Ai wandi kipgon dumbat dijan wek garram yumob en meigim yumob bilib brabli strongbalawei, en lagijat na det wek blanga main garra kipgon gro mowa en mowa garram yumob, 16 en afta ai gin go en dalimbat det gudnyus blanga Jisas Krais langa ola pipul langa detlot kantri weya nobodi bin deigim det gudnyus bifo. En wen ai go langa detlot kantri, ai kaan tok praudbalawei blanga miselp blanga det wek weya sambodi bin dum langa ola najalot kantri. 17 En ai kaan tok praudbalawei blanga det wek weya mi dum miselp du, dumaji langa oltestaman im tok, “If enibodi wandi tok praudbalawei, wal im garra tok praudbalawei blanga God.”✡Jera 9:24

18 Yumob sabi? God nomo gudbinji langa detlot pipul hu reken olabat haibala. Nomo. Im gudbinji langa detlot pipul weya Jisas Krais det Bos blanga wi meigim olabat haibala.