Sekan Pida
Det Leda Blanga Album Kristjan Pipul Sabi Laiyawan Titja
Wal Pida bin raidimdan en jandim dijan leda langa ola Kristjan pipul ebriweya blanga gibit olabat woning blanga ola laiyawan titja hu garra kaman en tenimranbat det trubalawan wed, en trai en deigidawei ola Kristjan pipul brom det trubalawei. En Pida bin rimaindim ola Kristjan pipul blanga kipgon jinggabat hau dei garra jidan en weidabat blanga Jisas Krais weya im garra kambek.
1
Pida bin raidimdan leda
1 Orait, mi na Saiman Pida, en mi wekinmen blanga Jisas Krais, en mi na speshalwan mishanri blanga im.
Wal mi raidimdan dijan leda langa ol yumob pipul hu bilib langa Jisas Krais. Im na det God blanga wi hu oldei dum wanim rait en hubin seibum wi, en imbin meigim yumob bilib langa imselp seimwei laik melabat bilib langa im.
2 Wal God garra brabli kainbala langa yumob brabliwei en meigim yumob jidan brabli gudbalawei, dumaji yumob sabi God en Jisas Krais det Bos blanga wi.
Meiksho God bin jingat langa yu
3 Wal Jisas Krais det Bos blanga wi bin jingat langa wi blanga jidan garram det shainiwan lait blanga im en blanga jidan gudbala jis laik im, en det Bos blanga wi bin yusum det pawa blanga im blanga gibit wi ebrijing weya wi garra abum blanga jidan gudbalawei jis laik im, dumaji wi sabi im en bilib langa im. 4 Lagijat na God bin gibit wi ol detlot brabli gudbala ting weya imbin pramis blanga gibit wi. En imbin yusum detlot gudbala ting blanga meigim wi fri brom wi nogudbala filing weya wibin oldei wandimbat olkain nogudbala ting langa dijan wel. Detkain filing na garra binijimap wi. Bat Jisas Krais bin meigim wi fri brom detkain filing, en wibin joinin garram im na wulijim wi garra jidan jis laik im.
5 Wal God bin gibit yumob ebrijing wen imbin meigim yumob joinin garram Jisas Krais, en blanga tharran na yumob garra wek.
Yumob sabi? God bin meigim yumob bilib langa Jisas Krais, en blanga tharran na yumob garra wek blanga jidan gudbala. En dumaji yumob jidan gudbala, wal yumob garra wek blanga sabi wanim God wandim. 6 En dumaji yumob sabi wanim God wandim, wal yumob garra wek blanga nomo larram olkain nogudbala ting deigidawei yumob. En dumaji yumob nomo larram olkain nogudbala ting deigidawei yumob, wal yumob garra wek blanga kipgon en nomo gibap. En dumaji yumob kipgon en nomo gibap, wal yumob garra wek blanga trastim en jinggabat God olataim. 7 En dumaji yumob trastim en jinggabat God olataim, wal yumob garra wek blanga kain langa yumob Kristjan braja en sista olabat. En dumaji yumob kain langa yumob Kristjan braja en sista olabat, wal yumob garra laigim olabat brabliwei du.
8 Yumob sabi? If yumob dumbat ol detlot gudbala ting lagijat, wal detlot gudbala ting garra meigim yumob kipgon dumbat detlot gudbala ting. En if yumob kipgon dumbat detlot gudbala ting, wal detlot gudbala ting garra meigim yumob sabi Jisas Krais det Bos blanga wi brabliwei.
9 Bat if enibodi nomo dumbat ol detlot gudbala ting lagijat, wal im jis laik im jidan blainwan, en im kaan jinggabat hau God bin deigimat im brom ol detlot nogudbala ting weya imbin oldei dumbat bifo.
10 Wal main braja en sista olabat, God bin jingat langa yumob, en imbin pikimat yumob. Bat yumob garra meiksho imbin jingat langa yumob en pikimat yumob.
Yumob sabi? Yumob garra oldei larram God kipgon tjeinjimbat yumob laif, en if yumob larram im tjeinjim yumob laif, wal yumob kaan gowei brom im na, 11 en im garra welkam yumob gudbalawei langa det olagijawan pleis blanga im, en im garra gibit yumob det rait blanga jidan garram Jisas Krais det Bos blanga wi hubin seibum wi.
12 Wal main braja en sista olabat, det trubalawan wed bin kaman langa yumob, en yumob sabi det wed brabliwei. 13 En nomeda yumob sabi ol dislot ting, bat stil ai garra kipgon dalimbat yumob, dumaji ai reken im rait blanga mi blanga kipgon meigimbat yumob jinggabat ol dislot ting olawei raidap mi dai.
14 Wal ai sabi nomo longtaim na ai garra gowei brom dijan olwan bodi main, dumaji Jisas Krais det Bos blanga wi bin dalim mi ai garra dai. 15 En ai garra meiksho yumob sabi det trubala wed brabliwei wulijim yumob garra oldei jinggabat ol detlot ting weya aibin dalim yumob afta wen mi dai.
Pida bin luk garram im ronwan ai
16 Wal wen melabat bin dalim yumob blanga Jisas Krais det Bos blanga wi weya im garra kambek garram im pawa, melabat nomo bin dalimbat yumob laiyawan stori weya men bin meigimap. Nomo. 17-18 Mi en Jeims en Jon bin luk det brabliwan pawa blanga Jisas garram melabat ronwan ai, dumaji wen God det Dedi blanga im bin jingat langa im deya ontop langa det seikridwan hil, melabat bin deya garram im du, en melabat bin luk det brabli shainiwan lait, en melabat bin irrim God bin jingat langa im brom hebin thru langa det lait. Imbin tok, “Dijan na main ronwan san, en mi laigim im brabliwei, en mi brabli gudbinji langa im du.” Deya na God det Dedi blanga im bin meigim im jidan brabli shainiwan, en imbin meigim im haibala, en trubala melabat bin luk im lagijat garram melabat ronwan ai.✡Meth 17:1-5; Mak 9:2-7; Luk 9:28-35
19 Yumob sabi? Wi sabi detlot wed weya ola speshalwan mesinja blanga God bin gibit wi, en wi sabi detlot wed brabli trubalawan du, en yumob garra teiknodis langa detlot wed, dumaji detlot wed jidan jis laiga lait weya shain langa dakbala, en detlot wed garra shoum yumob det wei blanga bulurrum Jisas Krais raidap det taim weya im garra kambek en shain langa yumob laif. Im garra shain langa yumob jis laiga moningsta weya im shain.
20 Wal yumob irrim mi na, dumaji im brabli bigwan ting dijan. Detlot speshalwan mesinja blanga God bin raidimdan ol detlot speshalwan wed langa det oltestaman, 21 en nobodi kaan gajimap detlot mining blanga detlot wed miselp, dumaji ol detlot speshalwan wed nomo bin kamat brom men ronwan filing. God bin gibit detlot wed, en det Holi Spirit bin meigim detlot speshalwan mesinja tok detlot wed.