1 Wal Mosis bin kipgon tok, “Dislot na ola lowa yumob garra bulurrum brabliwei wen yumob jidan langa det kantri weya YAWEI det trubala God blanga wi grengrenfathamob garra gibit yumob. Teiknodis en duwit brabliwei ol dislot lowa! 2 Langa det kantri weya yumob garra jidan bos, deya na yumob garra breigimdan ola weship pleis weya detlot najalot pipul oldei weship olabat drimin sheip deya ontop langa haiwan en lilwan hil en andanith langa ola sheidiwan tri. 3 Breigimap ola teibul blanga ofring en bitsimap ola seikridwan longbala ston. Barnimap ola gelwan drimin sheip gulum Eshara, en breigimap ola najalot drimin sheip wulijim nobodi kaan weshipbat olabat langa detlot pleis enimo.✡Dyud 7:5

4 “Yumob garra weship YAWEI brabliwei, nomo laik najalot pipul wen dei weshipbat olabat drimin. 5 Brom ola difrin kantri blanga ol yumob klen, YAWEI garra pikimat wanbala pleis weya im garra jidan en weya ola pipul garra majurrumap miselp langa im, en deya na olabat garra weship langa im. 6 Deya na yumob garra bringimap yumob sekrifais weya yumob garra barnimap en ola najalot sekrifais du. Ebri tenbala enijing yumob bin growimbat yumob garra gibit wanbala langa mi, en ol detlot najalot ofring, en detlot ola enijing yumob bin pramis langa YAWEI, en det ofring weya yumob gibit friwan, en ola fesbon gabigabi en ship du. 7 Deya na YAWEI det trubala God blanga wi garra jidan garram yumob. Imbin gudbinji langa yumob en yumob femili olabat, en yumob garra dagat ola daga en jidan gudbinji langa ola gudwan ting weya yumob bin dumbat adwek.

8-11 “Wal tudei yumob meigim sekrifais eniweya yumob wandim, dumaji yumob nomo jidan langa det kantri weya YAWEI det trubala God blanga wi garra gibit yumob en weya im garra maindimbat yumob en weya yumob gin jidan kwaitbala nomo garram eni trabul. Bat wen yumob krosoba langa det Jodan Riba en yumob teikoba det kantri, YAWEI garra lukaftumbat yumob brom ola enami blanga yumob. YAWEI garra pikimat wanbala pleis weya yumob garra weship im, en deya na yumob garra bringimap ebrijing weya aibin tok. En deya na yumob garra bringimap ola sekrifais ofring weya yumob garra barnim, en ola najalot sekrifais ofring, en ebri tenbala ebrijing yumob bin growimap yumob garra gibit wanbala langa mi en ola ofring en ola enijing weya yumob bin pramisim blanga gibit langa YAWEI. 12 Deya na langa det wanbala pleis yumob garra jidan gudbinjiwei garram im mijamet garram yumob bigininimob en ola pipul weya wek blanga yumob, en detlot pipul brom det Libai klen weya dei jidan langa yumob taun. Yumob sabi blanga detlot pipul brom det Libai klen dei kaan abum eni kantri. 13 Yumob wotjimbat miselp en nomo foget yumob kaan pikimat eni pleis blanga meigim sekrifais. 14 Yumob garra bringimap ola sekrifais ofring langa det wanbala pleis YAWEI garra pikimat deya langa det kantri blanga wanbala klen. Oni deya na langa det wanbala pleis yumob garra gibit im ola sekrifais ofring yumob garra barnim, en dum ola najalot ting du aibin dalim yumob blanga dum.

15 “Bat yumob lau blanga kilim en dagat blanga yumob ronwan enimul nomeda weya yumob jidan. Yumob gin dagadagatbat detlot weya YAWEI gibit langa yumob. Yumob gin dagat det bif if yumob jidan klinbala blanga serramoni en if yumob nomo jidan klinbala blanga serramoni, seimwei laik wen yumob dagat detlot wailwan enimul gulum diya en entiloup. 16 Bat yumob kaan dagat det blad laik daga. Yumob garra tjakam langa graun jis laik woda.✡Jen 9:4; Labid 7:26,27; 17:10-14; 19:26; Dyud 15:23

17-19 “Ebrijing weya yumob gibit langa YAWEI, wal yumob kaan dagat langa det pleis weya yumob jidan, bat oni langa det pleis weya YAWEI det trubala God blanga wi bin pikimat blanga jidan. Deya na yumob garra deigim ol yumob difrindifrinwan ofring. Brom ebri tenbala enijing yumob garra gibit wanbala langa mi brom ola nyuwan sid daga en wain en oliboil, en blanga ola fesbon gabigabi en ship en ola ebrijing yumob bin pramis blanga gibit langa YAWEI, en det ofring weya yumob gibit friwan. Yumob garra deigim blanga yumob biginini en ola pipul weya wek blanga yumob en detlot pipul brom det Libai klen en deya na langa det pleis yumob garra weship langa YAWEI en gibit im ola ofring. En yumob garra jidan brabli gudbinjiwei blanga ola ebrijing weya yumob bin dum. Yumob garra wotjim miselp en nomo fogedabat blanga maindimbat detlot Libai pipul weya olabat jidanbat langa yumob kantri.

20 “Wal wen YAWEI det trubala God blanga wi garra gibit yumob det kantri weya imbin pramisim, yumob gin dagat ola bif enitaim wen yumob wandim. 21 If det speshalwan pleis blanga weshipbat im longwei, wal enitaim yumob gin kilim eni buligi o ship weya YAWEI gibit langa yumob, wal yumob lau blanga dagatbat ola bif langa yumob kemp. 22 Enibodi gin dagat det bif seimwei laik yumob dagat ola wailwan enimul gulum diya en entiloup. Yumob gin dagat det bif if yumob jidan klinbala blanga serramoni, en if yumob nomo jidan klinbala blanga serramoni. 23 Bat yumob nomo lau blanga dagat det bif wen im stil garram blad insaid, dumaji det blad im det laif blanga det enimul. En yumob kaan dagadagat det laif garram det bif. 24 Yumob garra spilimat det blad langa graun jis laiga woda. Det blad im nomo daga blanga yumob.✡Labid 17:10-14 25 If yumob dum lagijat, wal YAWEI garra jidan brabli gudbinji langa yumob en langa yumob bigininimob. 26 Yumob garra deigim ola ofring en ola enijing weya yumob bin pramis blanga gibit langa YAWEI langa det speshalwan pleis blanga weship. 27 Deya na yumob garra gibit ola sekrifais weya dei garra barnbarn holot ontop langa det teibul blanga ofring blanga YAWEI. En yumob garra gibit detlot sekrifais ofring weya yumob dagat det bif en spilimat det blad ontop langa det teibul blanga ofring. 28 Yumob teiknodis en duwit brabliwei langa mi en nomo fogedabat ebrijing weya ai dalimbat yumob, en blanga yumob bigininimob garra jidan gudbinjiwei olagija na, dumaji tharran na im raitwei en meigim YAWEI det trubala God blanga wi brabli gudbinji.”

29 Wal Mosis bin kipgon tok, “YAWEI det trubala God blanga wi garra binijimap ola pipul langa detlot kantri wen yumob teikoba blanga olabat kantri en jidan deya. 30 Afta na, yumob garra wotjim miselp en nomo foget yumob nomo lau blanga bulurrumbat najalot pipul hu weshipbat olkain drimin sheip, dumaji if yumob bulurrumbat olabat, wal tharran garra meigim bigwan trabul kaman langa yumob. En nomo trai en faindat hau olabat weshipbat olabat drimin, dumaji yumob mait wandi weshipbat YAWEI seimwei du. 31 Yumob weship YAWEI det trubala God blanga wi brabliwei, nomo laik ola najalot pipul hu weshipbat ola difrinkain drimin, dumaji dei dumbat ola brabli nogudbala ting weya YAWEI nomo laigim. Dei barnimapbat olabat biginini langa faiya ontop langa det teibul blanga ofring.

32 “Wal yumob garra dum ebrijing weya aibin dalimbat yumob. Nomo edimap o deigimwei enijing brom ol dislot lowa.” ✡Dyud 4:2; Reb 22:18,19