1 Wal Sera bin brabli olgamen na. Imbin 127 yiya ol, 2 en imbin dai langa det taun gulum Hebran deya langa det kantri gulum Keinan. Sambala pipul bin oldei gulum det taun Kiriyathaba.

Wal wen Eibrahem bin lujim Sera, imbin kraikrai detmatj.

3 Bambai na imbin gidap brom im dedbala waif, en imbin go langa det miting pleis deya langa det geit weya ola boswan blanga detlot Hitait pipul bin oldei jidanbat, 4 en imbin askim olabat blanga baiyim lilbit kantri blanga berrim im waif. Imbin lafta baiyim det len brom olabat, dumaji imbin jidan streinja langa olabat kantri.✡Eks 7:16; Hib 11:9,13

5-6 Wal detlot boswan bin tok, “Yu lisin langa melabat na. Yu brabli haibala. Wal yu gin berrim yu waif langa eni gudwan keib. Melabat kaan nokambek yu.”

7 Wal wen deibin tok lagijat, Eibrahem bin pudum im feis langa graun blanga shoum rispek langa olabat, 8 en imbin tok, “Orait, if yumob wandi larram mi berrim main waif langa dijan kantri, wal yumob tok langa det men neim Efran det san blanga Soha. 9 Yumob askim im if im wandi selim det keib deya gulijap langa det pedik blanga im gulum Mekpela, dumaji ai wandi baiyim det len wulijim ai garra abum main ronwan greibyad. Yumob dalim im ai garra gibit im det rait mani blanga det len.” Lagijat na Eibrahem bin tok.

10 Wal det men neim Efran bin deya du langa det miting, en deya na lida langa ol detlot boswan imbin dalim Eibrahem, 11 “Yu lisin langa mi olmen. Ai kaan selim det len langa yu. Ai garra jis gibit yu det keib blanga berrim yu waif. En ai garra gibit yu det len wansaid langa det keib du.”

12 Wal Eibrahem bin pudum im feis langa graun igin langa ol detlot boswan, 13 en imbin dalim det men, “Yu lisin langa mi na. Ai garra baiyim ol detlot len brom yu. Yu deigim main mani, wulijim ai gin berrim main waif deya.”

14-15 Wal det men bin tok, “Yu luk olmen. Det len im kos loda mani. 400 silbawan mani im kos. Bat yu nomo jinggabat det mani. Yu jis go en berrim yu waif deya.”

16 Wal Eibrahem bin gibit 400 silbawan mani langa det men deya lida langa detlot boswan. Tharran bin det raitwan mani blanga det len.

17 Lagijat na Eibrahem bin teikoba det pedik gulum Mekpela sanraisaid brom det pleis gulum Memrei, en imbin jidan bos blanga det pedik en blanga det keib wansaid langa det pedik en blanga ola tri langa det pedik du, 18 en ol detlot boswan blanga detlot Hitait pipul hubin deya langa det miting bin ol witnis weya det men neim Ifran bin hendimoba det kantri langa Eibrahem.

19-20 Afta na Eibrahem bin berrim det dedbala waif blanga im deya langa det keib weya imbin baiyim gulijap langa det taun gulum Hebran deya langa det kantri gulum Keinan.