43
YAWEI bin seibum im pipul olabat
1 Wal YAWEI det trubala God bin tok na,
“Ol yumob Isreil pipul, mi na YAWEI bin meigim yumob.
Yumob nomo bradin.
Mi na bin seibum yumob.
Mi na bin gulum yumob neim.
Yumob na main ronwan pipul olabat.
2 “Mi deya garram yumob wulijim yumob kaan draun.
Wen yumob garra wokwokbat thru langa faiya,
yumob kaan barnbarn brom det faiya.
3 “Dumaji mi na YAWEI det trubala God blanga yumob,
en det brabli holiwan God blanga ola Isreil pipul,
en aibin seibum yumob.
Aibin larramgo detlot Ijip en Ithiyopiya en Seba pipul blanga seibum yumob.
4 Aibin larramgo detlot pipul brom najalot kantri blanga seibum yumob.
Yumob brabli speshalwan langa mi,
en ai laigim yumob detmatj.
5 “Yumob nomo bradin.
Mi iya garram yumob.
Brom sanraiswei en brom sangodanwei ai garra bringimap yumob mijamet.
6 Ai garra dalim detlot langa nowathwei en sauthwei,
‘Yumob garra larramgo main sanmob en dodamob fri.
Larram olabat kambek brom ola longwei kantri.
7 Olabat main ronwan pipul.
Aibin meigim olabat holot blanga gibitbat mi theingks en preisimbat main neim.’ ”
YAWEI im God imselp
8 Wal YAWEI bin kipgon tok, “Ai garra bringimap main pipul olabat mijamet. Olabat garram dubala ai, bat olabat kaan luk, en olabat garram dubala irriwol, bat olabat kaan irrim. 9 Dalim ebribodi langa ebri kantri blanga majurrumap miselp raidaran. Nomo enibodi gin tok trubalawei, ‘Wibin dalim yu dijan garra hepin!’ If enibodi bin irrim olabat tok lagijat, wal yu dalim melabat na.
10 “Main pipul olabat, yumob na jidan main witnis, en main ronwan wekinmen olabat. Mi na bin pikimat yumob. Ai wandim yumob garra sabi mi, en trastim mi en sabi oni mi na God. Mi na wanbala God olagijawan. Nobodi mowa jidan laik mi. Najing.
11 “Oni mi na YAWEI, en oni mi na gin seibum yumob. 12 Aibin meigim pramis blanga seibum yumob, en aibin kipum main pramis. Yumob na main witnis. Nomo eni drimin bin dum dijan. 13 Mi na God, det olagijawan. Nomo enibodi kaan deigimwei yumob brom mi o jandap langa main wei.”
YAWEI garra meigim redi det wei
14 Wal YAWEI bin kipgon tok, “Mi na YAWEI garra seibum yumob. Mi na det brabli holiwan God blanga ola Isreil pipul, en dijan na main pramis. Blanga seibum yumob na ai garra jandim ami langa Bebalon, en det ami garra deigimwei ola pipul brom Bebalon prisana, en olabat garra kraikraibat. 15 Dumaji mi na YAWEI det brabli holiwan God blanga yumob. Aibin meigim ol yumob Isreil pipul, en mi na jidan king blanga yumob.
16 “Mi na bin meigim det roud thru langa det brabli bigwan solwoda. 17 Aibin jandim ola solja blanga ranimap yumob garram olabat bagi en hosis, en olabat ol leidan dedwan na. Olabat kaan mub. Olabat jis laik det oil lemp weya sambodi bin audim det lait.”
Fogedabat wanim bin hepin longtaim
18 Wal YAWEI bin kipgon tok, “Yumob fogedabat wanim bin hepin longtaim. Nomo jinggabat blanga det taim. 19 Ai garra meigim samting nyuwan na. Luk tharrei! Yumob gin luk tharran? Aibin pudum roud thru langa det deset kantri blanga main pipul olabat blanga kambek, en aibin pudum sambala krik langa det draiwan kantri. 20 Ola wailwan enimul oldei preisimbat mi, en detlot wailwan dog gulum jekal, en detlot mukmuk du. Aibin pudum woda blanga olabat langa det deset kantri, en detlot lilwan krik du, blanga main ronwan pipul olabat. 21 Aibin meigim olabat jidan main ronwan pipul olabat wulijim dei garra preisimbat mi.
22 “Bat main pipul olabat, yumob bin nokap, bat nomo brom weshipbat langa mi. 23 Yumob nomo bin meigim main neim jidan mowa haibala en gibitbat mi detlot ship en najalot enimul sekrifais. Ai nomo bin gibit yumob adwan taim en meigim yumob gibit eni sekrifais, o barnimbat det brabli gudsmelwan medisin. 24 Yumob nomo bin bringimap det brabli gudsmelwan medisin langa mi, en yumob nomo bin gibit langa mi det brabli gudwan pat blanga detlot enimul yumob bin sekrifais. Bat yumob bin oni dumbat ola nogudbala ting, en tharran na jis laik yumob meigim mi garrimap hebiwan loud. 25 Bat ai garra tjakidawei det nogudbalawei blanga yumob, dumaji mi na YAWEI. En ai garra fogedabat ol detlot rong ting yumob bin oldei dumbat.
26 “Yumob bringimap ol yumob trabul langa mi, en midim mi langa kothaus, en dalim mi if yumob jidan raitwei. 27 Ol yumob grengrenfathamob hubin jidan longtaim, en detlot lidamob blanga yumob, nomo bin laigim mi en deibin oldei gibitbat mi bekboun. 28 Blanga tharran na, ai nomo wandim detlot serramonimen blanga wek blanga mi. En aibin binijimap ola pipul langa det kantri gulum Isreil, en olabat jidan brabli sheimwan.”