1 Wal yumob dalim mi na. Wotfo yumob oldei agamin en faidabat? Ai dalim yumob wotfo. Ol yumob Kristjan pipul oldei agamin en faidabat, dumaji yumob oldei jinggabat yumob ronselp blanga meigim miselp sedisfaid langa yumob ron bodi. Blanga tharran na yumob oldei faidabat. 2 En wen yumob wandim det ting en yumob nomo gedim, wal yumob go en medrimbat enibodi blanga det ting. En wen yumob wandi pulumat samting brom enibodi en im kaan gibit yumob, wal yumob stat agamin en fait na.

Wal yumob kaan gedim enijing yumob wandim, dumaji yumob nomo askim God blanga det ting. 3 Maitbi yumob askimbat God blanga enijing, en im nomo gibit langa yumob. Bat im nomo bin gibit langa yumob, dumaji yumob wandi yusum det ting blanga yumob ronselp, en yumob wandi meigim yumob selp sedisfaid.

4 Wal ol yumob pipul reken miselp Kristjan. Bat yumob nomo bulurrum God brabliwei, dumaji yumob laigim ola enijing langa dijan wel. En if yumob laigim ola enijing langa dijan wel, wal yumob meigim miselp bedfren langa God.

5 Wal God bin gibit det spirit langa wi, en trubala im tok langa oltestaman, God wandim det spirit blanga wi brabliwei.

6 Yumob sabi? Yumob laigim ola enijing langa dijan wel. Bat God laigim yumob detmatj. En langa oltestaman im tok, “God nomo laigim detlot pipul hu meigim miselp haibala langa im. Bat im oldei album detlot pipul hu meigim miselp lobala langa im.”✡Prab 3:34

7 Wal blanga tharran na, yumob garra gibit miselp langa im, en yumob garra jandap strongbalawei langa Seitin blanga meigim im gowei brom yumob. 8 En if yumob wandim God garra kaman en jidan garram yumob, wal yumob garra bulurrum im, en afta im garra kaman langa yumob.

Wal ol yumob Kristjan pipul garra stap dumbat ola nogudbala ting. Yumob oldei jinggabat dubalawei en yumob garra tenim miselp brom detkain en jinggabat oni wanwei. 9 Yumob garra fil sori en kraikraibat blanga detlot nogudbala ting weya yumob bin oldei dumbat. Yumob kaan laf en jidan gudbinji. Yumob garra krai en jidan nogudbinji, 10 en yumob garra meigim miselp lobala langa God, en afta im garra lidimap yumob.

11 Wal main braja en sista olabat, yumob kaan tokabat yumob Kristjan braja en sista olabat. En if yumob tok nogudbalawei langa yumob braja o sista en yumob trai en jadjim im, wal im jis laik yumob meigim miselp bos blanga det lowa, en yumob nomo oldei dum wanim det lowa dalim yumob blanga dum, dumaji yumob reken det lowa im nogud. 12 Bat oni God gin meigim lowa en jadjimbat pipul. Oni im na gin seibum enibodi en jandim enibodi langa det helfaiya. En wen yumob tok nogudbalawei langa yumob Kristjan braja o sista, wal hu yumob reken miselp? Yumob kaan meigim miselp God.

13 Wal yumob jinggabat na. Yumob kaan tok, “Tumorro ai garra go samweya tharrei en stap deya wan yiya blanga selimbat enijing blanga meigimap mani.”✡Prab 27:1 14 Yumob kaan tok lagijat, dumaji yumob nomo sabi wanim garra hepin langa yumob laif tumorro. Yumob jis laiga lilwan smok weya im kamat en afta im gon. 15 Wal yumob garra tok lagijat, “If God wandim, wal ai garra jidan laibala, en ai gin dum det ting.” 16 Bat yumob nomo jinggabat lagijat, dumaji yumob oldei meigim miselp haibala en tok praudbalawei. Bat yumob kaan tok praudbalawei, dumaji im nogud.

17 Yumob sabi na? If yumob sabi det gudbalawei, en yumob nomo bulurrum det gudbalawei, wal im nogud, dumaji yumob dum nogudbala ting.