1 Wal Job bin tok langa Bilded, 2 “Ai sabi wanim yu toktokbat im trubala. God reken nomo enibodi gudbala.✡Job 4:17 3 Oni im na sabi ebrijing. Wi nomo sabi enijing. If wi wandim deigim God langa kotkeis, wal wi kaan win, najing. Im gin askim wi olkain kwestjan, bat wi kaan ensa langa im, najing. 4 God im brabli klebawan garram detmatj pawa, en wi kaan jandap langa im en bidim im, najing. 5 Wen God jidan brabli wail, im gin mubumwei bigwan hil bifo wi gin sabi. 6 En God gin meigim ola graun sheiksheikbat nomo lilbit, 7 en im gin meigim det san en ola sta nomo blanga shain. 8 Oni God na bin meigim ebrijing langa skai, en wok ontop langa det rafwan solwoda. 9 En im na bin pudum ola sta langa olabat pleis, en detlot sta gulum Bigwan Dipa en Sospen en Sebensista, en detlot sta langa sauthwei.✡Job 38:31; Eimos 5:8 10 God bin dum ola klebabala wek en wi kaan sabi enijing. 11 Wen God wokpas langa mi, ai kaan luk langa im. 12 En if im meigim sambodi dai, wal hu garra trai en stapam im? En hu garra askim im, ‘Wotfo yubin dum tharran?’ ”

13 Wal Job bin kipgon tok langa Bilded, “Wen God im brabli wail, nomo enibodi gin stapam im. Imbin kilim ded detlot wekinmen blanga det bigwan dregan gulum Reiheb. 14 Wal hau ai garra agamin langa God? 15 Nomeda mi nomo gilti ai stil kaan agaminbat langa God. Ai gin oni jingat langa im blanga albumbat mi en kain langa mi. 16 En if ai jingat langa God blanga kaman langa det kothaus garram mi, maitbi im nomo garra irrim langa mi. 17 Dumaji im panishim mi garram stom en meigim mi kipgon abumbat pein blanga najing. 18 Im nomo larram mi gajimbek main win, en ai kipgon jidanbat garram pein. 19 God im mowa strongbala langa mi. En hu garra meigim im go langa kothaus blanga gibit mi feyago?

20 “Nomeda mi nomo giltiwan, bat God gin yusum main ronwan wed blanga shoum ai nomo jidan raitwei. 21 Mi nomo gilti, bat ai nomo wori wanim garra hepin langa mi enimo. 22 Nomeda mi jidan gudbala o nogudbala, God garra binijimap ola gudbala pipul mijamet garram ola giltiwan pipul. 23 En wen gudbala men dai kwikbala, God jidan deya en laflafbat. 24 En oni God na gin meigim blainwan detlot boswan hu oldei kotimbat ola pipul. If God nomo bin dum, wal hubin dum? En hubin larram ol detlot nogudbala pipul teikoba dijan wel?”

25 Wal Job bin kipgon tok langa Bilded, “Ebridei main laif go kwikbala bat olabat nomo gudbala. 26 Main laif go kwikbala jis laik det bout wen im go kwikbala, en jis laik det igulok flaiflaibat kwikbala wen im gajimbat daga. 27 Samtaim mi trai blanga jidan gudbinjiwei en nomo grambul langa God. 28 Bat mi ardimbat detmatj en mi bradin nomo lilbit dumaji God reken mi giltiwan. 29 Wal ai garra lafta stap agamin langa God en jis gibap na. 30 Nomeda if ai washim miselp garram det strongbala sop, 31 God gin tjakam mi langa det smeliwan wel, en main ronwan klos jidan brabli sheim blanga mi. 32 God im nomo men laik mi. Ai kaan deigim im langa kothaus. 33 Hu yu reken sabi mowa, God o mi? 34 God wen mi silip nomo bradinimbat mi. 35 Ai garra tok en nomo bradin, dumaji ai sabi mi nomo giltiwan.” Lagijat na Job bin tok.