5
1 Wal brom deya det nyus weya YAWEI det trubala God bin draiyimap det Jodan Riba bin spredat ebriweya. Det nyus bin go raidap langa ola king blanga ola Emarait pipul sangodansaid brom det riba, en det nyus bin go raidap langa ola king blanga ola Keinanait pipul gulijap langa det solwoda gulum Medatareiniyan, en wen detlot king bin irrim det nyus, deibin ol bradin, en dei nomo bin sabi wanim dei garra dum.
Joshuwa bin sekamsais ola Isreil men
2 Afta na YAWEI bin dalim Joshuwa, “Yu garra meigim sambala stonwan naif, en yu garra sekamsais ola Isreil men.” 3 En Joshuwa bin sekamsais ola men deya na langa det wanbala hil gulum Sekamsais Hil. Bat garram olabat ronwan langgus dei gulum det pleis Gabiyatharaloth.
4-5 Wal Joshuwa bin lafta sekamsais olabat dumaji nobodi bin sekamsais olabat. Basdam wen deibin ol gowei brom Ijip, ola men bin sekamsais. 6 Bat God bin meigim olabat wokabat 40 yiya langa det deset kantri, dumaji dei nomo bin lisin langa im. Wen imbin dalim olabat blanga go langa det kantri weya imbin pramis langa olabat grenfatha, dei nomo bin duwit langa im, en dumaji dei nomo bin duwit langa im, wal God bin dalim olabat, “Yumob kaan luk det gudbala kantri weya aibin pramisim langa yumob.”✡Nam 14:28-35 7 En imbin meigim olabat wokabat langa det deset kantri raidap det ol jinareishan bin dai en det nyu jinareishan bin deigim olabat pleis. Bat det nyu jinareishan nomo bin sekamsais yet. En blanga tharran na Joshuwa bin lafta sekamsais olabat.
8 Afta na wen detlot Isreil men bin ol sekamsais, deibin jidan deya raidap deibin fil gudbala, 9 en afta YAWEI bin dalim Joshuwa, “Wen yumob bin jidanbat langa Ijip, yumob bin jidan laiga prisana en yumob bin dumbat ola adwek blanga ola Ijip pipul. Bat tudei na aibin meigim yumob jidan haibala.”
Wal detlot Isreil pipul bin gulum det pleis Meigim, dumaji deya na God bin meigim olabat haibala. Bat garram olabat ron langgus deibin gulum det pleis Gilgel, en det neim im stil deya tudei. 10 Det pleis na bin deya langa det plein kantri gulijap langa det taun gulum Jeriko.
Wal wen detlot Isreil pipul bin jidanbat deya, deibin abum det serramoni gulum Pasoba langa det namba 14 dei blanga det feswan manth,✡Eksa 12:1-13 11 en det neksdei deibin stat dagat ola daga brom det kantri gulum Keinan weya God bin pramisim langa olabat. Deibin dagat rostidwan sid daga en damba nomo garram raising, en brom det dei na deibin oldei dagadagat daga brom det kantri weya deibin jidan. 12 En brom det taim na God nomo bin gibit det speshalwan daga gulum mena.✡Eksa 16:35
Det bos blanga ola solja blanga YAWEI
13 Wal wandei wen Joshuwa bin jandap lukinatbat Jeriko, wanbala men bin jandap lida langa im, en det men bin abum bigbala naif langa im bingga redibala blanga fait.
Wal Joshuwa bin go raidap langa det men, en imbin askim det men, “Hu yu? Yu main fren? O yu main enami?”
14 Wal det men bin tok, “Nomo. Mi bos blanga ola solja blanga YAWEI det trubala God.”
Wal Joshuwa bin tjakamdan miselp langa graun blanga shoum det men imbin rispek langa im, en Joshuwa bin tok, “Mi wekinmen blanga yu, bos. Wanim yu wandim?”
15 Wal det bos blanga ola solja blanga YAWEI bin dalim im, “Yu deigimat yu but, dumaji dijan graun weya yu jandap im seikridwan.” En Joshuwa bin dum wanim det solja bin dalim im.