19
Ola kantri blanga Simiyan klen
1 Wal ola femili brom Simiyan klen bin gedim olabat kantri du. Det kantri blanga olabat bin jidan langa midul langa det kantri blanga Juda klen, dumaji det kantri blanga olabat bin brabli bigwan.
2 Simiyan klen bin gedim ol detlot taun gulum Biyashiba, Shiba, Molada, 3 Heisashuwal, Beila, Isim, 4 Eltolad, Bethul, Homa, 5 Siklag, Bethmakaboth, Heisasusa, 6 Bethlebeiyoth en Sharuwen. Deibin gedim ol detlot 13 taun garram ola lilwan taun du weya jidan raidaran langa detlot taun.
7 En deibin gedim detlot taun gulum Eiyin, Riman, Itha en Eshan. Deibin gedim ol detlot fobala taun garram ola lilwan taun du weya jidan raidaran langa detlot taun.
8-9 En deibin gedim ola taun raidap langa det taun sauthwei gulum Beilabiya o Rema.
Wal ola femili brom Simiyan klen bin gedim ol detlot taun en ol detlot kantri na.✡1 Kran 4:28-33
Ola kantri blanga Sebyulan klen
10 Wal ola femili brom Sebyulan klen bin gedim olabat kantri du.
Det boda blanga olabat kantri bin stat deya langa det taun gulum Sarid, 11 en brom deya imbin go sangodanwei langa det taun gulum Mariyal raidap langa det taun gulum Dabesheth olawei langa det krik sanraisaid brom det taun gulum Jokniyam. 12 En brom det taun gulum Sarid det boda bin go sanraiswei langa det taun gulum Kisloteiba raidap langa det taun gulum Daberath olawei langa det taun gulum Jeifiya en langa det dubala taun gulum Gethefa en Ikasin. 13 Brom deya det boda bin go nowathwei langa det taun gulum Riman hafwei langa det taun gulum Niya, 14 en brom deya det boda nowathsaid langa det kantri bin go langa det taun gulum Henathan raidap langa det pleis gulum Iftahel Beli.
15 Sebyulan klen bin gedim ol detlot taun gulum Katath, Neihalal, Shimran, Aidala en Bethlahem. Deibin gedim ol detlot 12 taun garram ola lilwan taun du weya jidan raidaran langa detlot taun.
16 Wal ola femili brom Sebyulan klen bin gedim ol detlot taun en ol detlot kantri na.
Ola kantri blanga Isaka klen
17 Wal ola femili brom Isaka klen bin gedim olabat kantri du, 18 en deibin gedim ol detlot taun gulum Jesriyel, Kesuloth, Shunam, 19 Hefaraiyim, Shaiyan, Einarath, 20 Reibath, Kishiyan, Ibas, 21 Remeth, Enganim, Enada, Bethpases, 22 Shahasama en Bethshemesh. Deibin gedim ol detlot 16 taun garram ola lilwan taun du weya jidan raidaran langa detlot taun.
Det boda nowathsaid langa olabat kantri bin go brom det hil gulum Teibowa raidap langa det Jodan Riba.
23 Wal ola femili brom Isaka klen bin gedim ol detlot taun en ol detlot kantri na.
Ola kantri blanga Esha klen
24 Wal ola femili brom Esha klen bin gedim olabat kantri du, 25 en deibin gedim detlot sebenbala taun gulum Helkath, Heli, Beten, Ekshaf, 26 Elamelek, Amad en Mishal. Deibin gedim najalot taun du.
Det boda sangodansaid langa olabat kantri bin go langa det hil gulum Kamul raidap langa det krik gulum Shihowalibnath.
27 Det boda sauthsaid langa olabat kantri bin go raidap langa det taun gulum Bedeigan, en brom deya imbin bulurrum det boda blanga det kantri blanga Sebyulan klen raidap langa det pleis gulum Iftahel Beli, en brom deya imbin go nowathwei langa det dubala taun gulum Bethamek en Neiyel, en brom deya imbin kipgon langa detlot najalot taun gulum Kabul, 28 Ebran, Reiyob, Heiman en Kana olawei raidap langa det taun gulum Saidan.
29 Det boda nowathsaid langa olabat kantri bin go brom det taun gulum Saidan raidap langa det taun gulum Rema olawei langa det taun gulum Taya, en brom deya imbin go langa det taun gulum Hosa raidap langa det solwoda gulum Medatareiniyan.
Esha klen bin gedim najalot taun du gulum Mahalab, Eksib, 30 Yuma, Afek en Reiyob. Deibin gedim ol detlot 22 taun garram ola lilwan taun du weya jidan raidaran langa detlot taun.
31 Wal ola femili brom Esha klen bin gedim ol detlot taun en ol detlot kantri na.
Ola kantri blanga Neftali klen
32 Wal ola femili brom Neftali klen bin gedim olabat kantri du.
33 Det boda nowathsaid langa olabat kantri bin go brom det taun gulum Helef raidap langa det tri dei gulum ouktri deya gulijap langa det taun gulum Seinanim, en brom deya imbin go langa det taun gulum Edaminakeb raidap langa det dubala taun gulum Jeimniya en Leikam olawei raidap langa det Jodan Riba.
34 Det boda sauthsaid langa olabat kantri bin go sangodanwei brom det Jodan Riba raidap langa det taun gulum Esnoteibo.
Det boda sangodansaid langa olabat kantri bin go nowathwei brom det taun gulum Esnoteibo, en imbin bulurrum det boda blanga det kantri blanga Sebyulan klen raidap langa det taun gulum Hukak, en brom deya imbin bulurrum det boda blanga det kantri blanga Esha klen.
Det boda sanraisaid langa olabat kantri bin bulurrum det Jodan Riba.
35 Neftali klen bin gedim ol detlot taun gulum Sidim, Seya, Heimath, Reikath, Kinareth, 36 Edama, Rema, Heisowa, 37 Kedish, Idrei, Enasowa, 38 Yairan, Migdalel, Horam, Bethanath en Bethshemesh. Deibin gedim ol detlot 19 taun garram ola lilwan taun du weya jidan raidaran langa detlot taun.
39 Wal ola femili brom Neftali klen bin gedim ol detlot taun en ol detlot kantri na.
Ola kantri blanga klen blanga Den
40 Wal ola femili brom klen blanga Den bin gedim olabat kantri du, 41 en deibin gedim ol detlot taun gulum Sora, Eshtayol, Aishamesh, 42 Shalbim, Ejalan, Ithala, 43 Ilan, Timna, Ekran, 44 Eltekei, Gibathan, Beilath, 45 Jehud, Benaberak, Geriman, 46 Mejakan en Reikan, en deibin gedim det kantri raidaran langa det taun gulum Jopa.
47-48 Wal ola femili brom det klen blanga Den bin gedim ol detlot taun en ol detlot kantri na. Bat afta ola enami blanga olabat bin andimwei olabat brom det kantri, en deibin go nowathwei raidap langa wanbala taun gulum Layish, en deibin kilim ola pipul deya, en afta wen deibin teikoba det taun, deibin gibit nyuwan neim langa det taun. Deibin gulum det taun Den, dumaji olabat grengrenfatha bin neim Den.✡Jadj 18:27-29
Det laswan kantri
49-50 Longtaim YAWEI det trubala God bin dalim detlot Isreil pipul blanga gibit sambala kantri langa Joshuwa, en wen deibin ol gedim olabat ronwan kantri, deibin askim Joshuwa, “Wanim kantri yu wandim?” En imbin tok, “Ai wandim det taun gulum Timnasera iya gin langa dijan kantri blanga Ifreiyim klen.” En deibin gibit im det kantri, en afta wen imbin bildimap det taun, imbin oldei jidan deya na.
51 Wal lagijat na ola Isreil pipul bin kadimat ol detlot kantri sangodansaid brom det Jodan Riba. Deibin majurrumap miselp deya langa det taun gulum Shailo garram det serramonimen neim Eliyeisa en garram Joshuwa en ola najalot bos blanga olabat, en deya na lida langa det Seikridwan Tent blanga YAWEI, Joshuwa bin tjakambat det dubala speshalwan ston blanga faindat wujan kantri YAWEI bin gibit langa ebri femili. Lagijat na deibin ol gedim olabat ronwan kantri.