2
YAWEI bin panishim Jerusalem
1 Det speshalwan mesinja bin tok,
“YAWEI det trubala God imbin brabli gitwail en imbin meigim Jerusalem jidan brabli dakbala.
Nomeda imbin luk brabli purdiwan, bat YAWEI bin binijimap det taun. Im najing na.
Langa det seim dei na wen imbin brabli gitwail detmatj, imbin libum det Serramoni Pleis.
2 YAWEI nomo bin sori langa enibodi wen imbin binijimap ol detlot taun langa Isreil.
Deya langa det kantri imbin pulumdan ol detlot strongwan wol en taun weya kipum pipul seif wen eni enami kaman langa olabat.
Imbin meigim det kantri Isreil en detlot lidamob sheim miselp nomo lilbit en olabat najing na.
3 Dumaji imbin brabli gitwail, im nomo bin album wi wen detlot enamimob bin kaman blanga fait langa wi,
en deibin bidim blanga ol wi strongwan soljamob.
Imbin jis laiga bigiswan faiya weya im barnbarnbat ebrijing. Lagijat na imbin gitwail langa wi, en imbin binijimap ebrijing na.
4 Imbin jis laik ola enamimob weya kaman garram shapwan spiya blanga kilim wi.
Imbin binijimap ola femilimob blanga wi weya wibin laigim olabat detmatj.
En iya langa Jerusalem wibin sabi imbin brabli barnbarn binji langa wi.
5 “YAWEI bin jis laik ola enamimob wen imbin binijimap ola Isreil pipul,
en imbin binijimap ola strongwan en bigwan haus langa Isreil.
Imbin meigim detlot pipul langa Isreil wori miselp detmatj blanga detlot pipul hubin dai.
6 Imbin bitsimap det Serramoni Pleis weya wibin oldei weshipbat im deya,
en lagijat na imbin stapam wi blanga weship langa im deya langa detlot seikridwan dei, en det Sebathdei.
Det king en ola serramonimen bin sabi YAWEI bin brabli gitwail langa olabat, en bin gibit bekboun langa olabat.
7 “YAWEI bin gibit bekboun langa im teibul blanga ofring en det Serramoni Pleis.
Imbin larram detlot enamimob rudimat detlot wol blanga det Serramoni Pleis.
En deibin bidim wi en deibin go insaid langa det Serramoni pleis, en deibin jingatbat gudbinjiwei langa det Serramoni Pleis.
Tharran na bin meigim wi jinggabat ola gudbala taim wibin oldei abum deya basdam.
8 “Wal YAWEI na bin meigim detlot wol langa Jerusalem ol buldan.
Imbin pulumdan detlot wol lilbitlilbit raidap detlot wol bin ol binijap, en ola haiwan haus du.
9 Detlot geit blanga Jerusalem bin leidan breikinwan langa graun, dumaji detlot enami bin bitsimap detlot pos.
Det king en ol detlot boswan lidamob en ola femili blanga olabat dei oldei jidan laiga prisana langa najawan kantri na.
Detlot serramonimen nomo titjimbat det lowa na,
en detlot speshalwan mesinja nomo oldei gedimbat eni wed brom YAWEI enimo na.
10 “Wal detlot olmen brom Jerusalem oldei jidanbat langa graun kwaitbalawei,
en dei oldei pudumbat graun langa olabat hed en werrimonbat sekbeigwan klos dumaji olabat wori miselp blanga ola dedbala kantrimen.
En ola yanggel oldei pudumdanbat olabat hed langa graun dumaji deibin wori miselp du.
11 “Main ai im brabli nogud na brom kraikraibat oldei, en mi brabli wori miselp.
Wal mi brabli nogudbinji na dumaji deibin binijimap ol main kantrimen olabat.
Ola biginini en lilwan beibi dei oldei buldan langa det taun ebriweya dumaji dei nomo garram eni daga.
12 Ola biginini oldei askimbat olabat mami blanga daga en woda.
En dei oldei buldanbuldan ebriweya langa ola roud jis laik men wen sambodi bin ardimbat olabat langa fait.
En detlot biginini oldei dai slobala langa olabat mami bingga.
13 “Bobala Jerusalem! Mi laigim yu detmatj.
Wanim mi garra dum blanga yu?
Ai kaan album yu na, dumaji nobodi nomo bin abum nogudbala ting lagijat laik yubin abum.
Dijan nogudbala ting im garra kipgon jis laiga bigwan strongwan solwoda weya det win im blowimbat ebriweya en nobodi kaan stapam en meigim gudwan igin.
14 Detlot speshalwan mesinja blanga yumob bin tok olkain laiyinbala wed.
Deibin trikim yumob wulijim yumob kaan sabi det nogudbalawei blanga yumob,
en yumob kaan libum det nogudbalawei.
Deibin reken yumob gudbala wen yumob bin jidan nogudbala.
15 Jerusalem, ola pipul oldei pasimbat yu, en lukinatbat yu en mokimbat yu.
Dei oldei sheikim miselp hed en luk langa yu dumaji yubin binijap.
En dei oldei tok, ‘Dijan na det bigwan taun en det nambawan taun, indit?’
16 Ola enami blanga yu, dei oldei mokimbat yu en dei nomo laigim yu.
Dei heidim yu detmatj na.
Dei oldei opinim olabat mawus jis laik ola wailwan enimul en tok,
‘Wibin binijimap yu. Wibin weidabat longtaim blanga dijan!’
17 Wal YAWEI bin dum wanim imbin pramis blanga dum.
Imbin binijimap wi en nomo kain langa wi, dumaji imbin dalim wi longtaim wen wi grengrenfathamob bin jidan laibala.
Imbin meigim detlot enamimob bidim wi, en deibin gudbinji.
18 “Bobala Jerusalem! Blanga yu wol olabat oldei jinginatbat langa YAWEI!
Yu garra krai oldei jis laiga riba randan deitaim en naitaim.
Yu garra jidan wikwan brom kraikraibat en wori miselp.
19 Olnait yumob blanga Jerusalem garra gidap oba en oba igin en jinginatbat langa YAWEI blanga album yumob.
Yumob garra dalim im ebrijing en askim im blanga kain langa yumob bigininimob,
dumaji detlot biginini bin buldanbuldan hanggriwan ebriweya langa ola roud.”
Lagijat na det speshalwan mesinja bin tok.
20 Jerusalem bin tok,
“YAWEI, wotfo yu panishim melabat lagijat?
Luk! Detlot gel oldei dagadagatbat olabat ron bigininimob na weya dei laigim olabat detmatj.
En detlot enamimob bin kilim ded ola serramonimen en speshalwan mesinja du langa det Serramoni Pleis.
21 Detlot yang pipul en ol detlot olbala pipul, deibin leidan dedwan langa roud ebriweya.
Detlot enami bin kilim ded ola boi en gel.
Deibin binijimap olabat garram olabat bigwan naif.
Yubin binijimap olabat langa det dei wen yubin brabli gitwail.
Yu nomo bin abum eni kainwan filing blanga olabat.
22 Yubin bringimap detlot enami langa mi blanga abum krulwan padi det dei.
Nomo enibodi bin sabi wujeiwujei olabat garra go det dei na wen yubin panishim en binijimap melabat.
Detlot enami bin kilimbat main bigininimob weya aibin growimap en laigim olabat detmatj.”
Lagijat na Jerusalem bin tok.