13
Mosis bin jandim twelbala lida blanga lukaran snikinbalawei langa Keinan
Dyudaranami 1:19-33
1 Wal YAWEI det trubala God bin dalim Mosis, 2 “Yu garra pikimat twelbala lida, wanbala brom ebri klen, en jandim olabat blanga go en lukaran snikinbalawei langa det kantri gulum Keinan. Ai garra gibit det kantri langa ola Isreil pipul.” 3-15 Brom det deset kantri gulum Paran, Mosis bin duwit en imbin jandim sambala lida, en dijan na detlot neim blanga olabat en detlot klen.
Blanga det Rubin klen det lida bin neim Shamuwa det san blanga Sekura.
Blanga det Simiyan klen det lida bin neim Shafat det san blanga Horai.
Blanga det Juda klen det lida bin neim Keilab det san blanga Jefana.
Blanga det Isaka klen det lida bin neim Aigal det san blanga Josef.
Blanga det Ifreiyim klen det lida bin neim Hosheiya det san blanga Nan.
Blanga det Benjamin klen det lida bin neim Palti det san blanga Refu.
Blanga det Sebyulan klen det lida bin neim Gediyel det san blanga Sadi.
Blanga det Manesa klen det lida bin neim Gedai det san blanga Susi.
Blanga det Den klen det lida bin neim Amiyel det san blanga Gemalai.
Blanga det Esha klen det lida bin neim Sethura det san blanga Maikul.
Blanga det Neftali klen det lida bin neim Neibai det san blanga Bofsi.
Blanga det Ged klen det lida bin neim Giyuwel det san blanga Mekai.
16 Wal dislot na detlot lida weya Mosis bin jandim blanga go en lukaran snikinbalawei langa det kantri. Imbin tjeinjim det neim blanga Hosheiya det san blanga Nan en imbin gulum im neim Joshuwa. 17 Wen Mosis bin jandimwei olabat imbin tok langa olabat, “Yumob garra go nowathsaid brom iya langa det sauthsaid langa det kantri gulum Keinan. Afta na yumob garra go ontopwei langa det hil kantri. 18 Yumob garra faindat wotkain det kantri, en haumeni pipul jidan deya, en hau strong olabat. 19 Yumob garra faindat if det kantri im gudwan o nogudwan, en if detlot pipul jidan langa ola taun garram bigwan strongbala wol. 20 Yumob garra faindat if det graun im gudwan en if det kantri garram loda tri, en yumob garra bringimbek sambala frut daga weya grogro deya.” Lagijat na Mosis bin tok. En imbin det taim wen ola greip daga bin kukwan du.
21 Wal detlot men bin go nowath na blanga luk det kantri brom det deset gulum Sin langa sauthwei olawei langa Reiyob gulijap langa det jampap dei gulum Heimath langa nowath. 22 Basdam deibin go langa det sauthwei langa det kantri en kaman langa Hebran, weya detlot femili blanga Ahiman, Sheshai en Telmai. Detlot grengrenfathamob blanga olabat bin det brabli longwan pipul dei gulum Einakait. Det taun gulum Hebran bin jidan 7 yiya bifo det taun gulum Sowan langa Ijip bin jidan. 23 Deibin kaman langa det pleis gulum Eshkol Beli, en deya na deibin kadimdan wanbala wadi garram greip. Imbin brabli hebiwan, en dubala men bin lafta garrimap garram wadi. Deibin deigimbek sambala frut daga brom det figtri en pamagrenitri du. 24 Det pleis deibin gulum Eshkol Beli dumaji deibin kadim detlot greip daga brom deya na.
25-26 Afta wen deibin binij lukaranbat det kantri blanga 40 dei, detlot men bin gobek langa Mosis en Eran en holot detlot Isreil pipul bin jidan langa Keidish deya langa det deset gulum Paran. Deibin dalim olabat wanim deibin luk en bin shoum olabat det frut daga weya deibin bringimbek langa olabat. 27 Deibin dalim Mosis, “Melabat bin lukaran det kantri. Im brabli gudwan en ritjwan kantri, en iya na sambala frut daga melabat bin gajim brom deya. 28 Bat detlot pipul hu jidan deya, olabat brabli strongbala, en olabat taun garram brabli bigwan strongwan wol. En melabat bin luk detlot brabli longwan en strongbala men hu grengrenfathamob bin kaman brom detlot pipul dei gulum Einakait. 29 Det Amalekait traib jidan langa det sauthsaid pat langa det kantri. En detlot thribala traib gulum Hitait, Jebusait en Emarait jidan langa det hil kantri, en det Keinanait traib jidan wansaid langa det solwoda gulum Medatareiniyan en gulijap langa det Jodan Riba.” Lagijat na deibin tok.
30 Bat Keilab bin dalim detlot pipul blanga jidan, en imbin tok, “Wi garra go na, en teikoba det kantri. Wi strongbala blanga fait indit?”
31 Bat detlot men hubin go garram Keilab bin tok, “Nomo! Wi nomo strongbala blanga fait langa olabat. Detlot pipul dei mowa strongbala langa wi.” 32 Wal olabat bin spredimat laiyawan wed langa ola Isreil pipul blanga det kantri weya deibin go lukaranbat. Deibin tok, “Det kantri nomo garram naf daga blanga fidim detlot pipul hu jidan deya. Ol detlot pipul bin longwan. 33 En wibin luk loda longwan men deya du, detlot biginini blanga Einak. Wibin jidan lilwan, jis laik grashopa, en lagijat na olabat bin luk langa wi.”✡Jen 6:4