23
1 Wal Beilam bin tok langa Beilak, “Yu bildimap 7 teibul blanga ofring iya blanga mi, en bringimap 7 boiwan buligi en 7 dediwan ship.”
2 Beilak bin dum wanim imbin dalim im, en Beilak en Beilam bin pudum detlot enimul langa detlot teibul blanga ofring en deibin barnimap holot. 3 En Beilam bin tok langa Beilak, “Yu jandap iya wansaid langa yu barnapwan ofring, en ai garra go en faindat if YAWEI garra tok langa mi. If im kaman, wal ai garra dalim yu wanim imbin dalim mi.” Beilam bin go ontop langa det hil na, 4 en God bin kaman langa Beilam, en Beilam bin tok langa im, “Aibin bildimap detlot 7 teibul blanga ofring, en aibin barnimap ol detlot buligi en ship.”
5 Wal YAWEI bin dalim Beilam wanim im garra tok, en imbin jandimbek Beilam langa Beilak blanga gibit im det wed. 6 Wen imbin gobek, imbin faindim Beilak stil jandapbat deya wansaid langa im barnapwan ofring garram ol detlot lidamob brom Moweb.
7 Wal Beilam bin tok dijan wed brom YAWEI,
“King Beilak, det king blanga ola Moweb pipul bin bringimap mi brom Siriya, sanraiswei langa det hil kantri.
Imbin tok, ‘Yu kaman en tok langa mi.
Ai wandim yu blanga singim detlot Isreil pipul.’
8 Bat hau ai garra singim olabat?
God nomo bin dum eni nogudbala ting.
YAWEI det trubala God neba bin dum lagijat.
9 Brom detlot haibala rok ai gin luk detlot Isreil pipul.
Ai gin luk olabat brom dislot hil.
Olabat jidan miselp na.
Olabat sabi dei garram brabli gudbala ting mowa langa detlot najalot pipul.
10 Detlot biginini blanga detlot Isreil pipul jidan jis laik det das.
Dei tumatj, en wi kaan kaundimap olabat.
Larram mi binijimap main laif laik detlot pipul blanga YAWEI.
Larram mi dai gudbinjiwei jis laik detlot gudbala pipul.”
Lagijat na Beilam bin tok.
11 Afta na Beilak bin tok langa Beilam, “Wanim yubin dum langa mi? Aibin bringimap yu iya blanga singim main enamimob, bat yu oni bin tok gudwei blanga olabat.”
12 Wal imbin ensim im na, “Ai gin oni tok wanim YAWEI wandim mi blanga tok.”
Beilam bin tok det sekanwan wed brom God
13 Afta na Beilak bin tok langa Beilam, “Yu kaman garram mi langa det najawan pleis brom weya yu gin luk oni sambala Isreil pipul. Yu singim olabat brom deya.” Lagijat na Beilak bin tok. 14 En Beilak bin deigim Beilam langa Sofim, ontop langa det hil gulum Pisga. Deya na imbin bildimap 7 teibul blanga ofring, en imbin sekrifais detlot boiwan buligi en dediwan ship langa ol detlot teibul.
15 Wal Beilam bin tok langa Beilak, “Yu jandap iya wansaid langa yu barnapwan ofring, en ai garra go en tok langa God na.”
16 Wal YAWEI bin kaman langa Beilam en dalim im wanim im garra tok, en imbin jandimbek im langa Beilak blanga gibit im det wed. 17 Imbin gobek en faindim Beilak bin stil jandap deya wansaid langa im barnapwan ofring garram ol detlot lida brom Moweb. Beilak bin askim Beilam wanim YAWEI bin dalim im. 18 En Beilam bin dalim im wanim YAWEI bin dalim im garra hepin.
“Beilak, san blanga Sipowa, yu kaman en irrim wanim ai garra tok.
19 God nomo laigim pipul hu oldei dalimbat laiya.
Im nomo laigim pipul hu oldei tjeinjimbat olabat main.
Wen im pramis enijing, im garra duwit.
En wen im tok samting, im garra dum.
20 YAWEI bin dalim mi ai garra tok gudbalawei blanga olabat.
En wen God gibit gudbala ting, ai kaan deigimbek.
21 Ai sabi wanim garra hepin langa detlot Isreil pipul.
Dei kaan abum eni prablam o trabul, najing.
YAWEI det trubala God blanga olabat im deya garram olabat. Olabat jingatbat, ‘God im melabat king!’
22 God na bin bringimat olabat brom Ijip garram strongwan pawa jis laik wailwan buligi.
23 Nomo eni klebabala ting gin ardim ol detlot Isreil pipul.
Pipul garra tok blanga detlot Isreil pipul,
‘Yumob luk wanim God bin dum blanga olabat!’
24 Detlot Isreil pipul jis laiga brabli strongwan laiyan.
Im nomo abum spel raidap im dagadagat en dringgim det blad blanga det enimul weya imbin kilim.”
Lagijat na Beilam bin tok.
25 Wal Beilak bin tok langa Beilam, “Yu nomo bin wandim singim detlot Isreil pipul, bat yu kaan bekimap olabat en tok gudbalawei langa olabat.” Lagijat na Beilak bin tok.
26 Wal Beilam bin ensim im, “Aibin dalim yu, ai garra dum ebrijing wanim YAWEI bin dalim mi.” Lagijat na Beilam bin tok.
Beilam bin tok det namba thri wed brom God
27 Wal Beilak bin tok, “Yu kaman garram mi, en ai garra deigim yu langa det najawan pleis. Maitbi God garra larram yu singim olabat brom deya.” 28 Beilak bin deigim Beilam ontop langa det hil gulum Piyowa. Brom deya dubala bin luk langa det deset kantri. 29 En Beilam bin tok langa Beilak, “Yu bildimap 7 teibul blanga ofring blanga mi, en yu bringimap langa mi 7 boiwan buligi en 7 dediwan ship.” 30 Beilak bin dum wanim Beilam bin dalim im en imbin barnim detlot buligi en ship langa detlot teibul na.