4
Teiknodis langa yu dedi
Wal det sabibala bin kipgon tok, “Wal main biginini, yu garra lisin en teiknodis wanim yu dedi oldei dalimbat en lenimbat yu. If yu dum lagijat, wal yu garra sabi wanim mi titjimbat yu im brabli gudwan.
“Wal yu nomo fogedabat wanim mi oldei dalimbat yu du. Wen aibin oni lilboi en oni san blanga main mami en dedi, main dedi bin titjimbat mi. Imbin oldei tok, ‘Yu jinggabat en nomo fogedabat main wed. If yu kipum ol detlot wed wal yu garra jidan laibala. Yu garra sabi en len mowa blanga ola gudwan klebabala ting. Yu nomo fogedabat en tjakidawei main wed. Yu garra oldei jinggabat en teiknodis blanga det sabibalawei en im garra album yu. En if yu laigim im brabliwei, wal im garra kipum yu seifwan. Blanga jidan sabibala im brabli speshalwan ting. Wal tharran na yu garra sabi. Im mobeda den enijing. Wen yu jinggabat en laigim det sabibalawan im gin meigim yu jidan haibala. Yu garra jidan haibala jis laik wen yu win det reis o pipul meigim yu jidan bos.’ Lagijat na main dedi bin tok wen aibin lilboi.
10 “Main biginini, yu lisin langa mi na en yu kipum ol detlot wed weya ai oldei dalimbat yu, wulijim yu garra jidan laibala longtaim. 11 Mi na bin shoumbat yu det sabibalawei en det raitwei blanga jidan gudbalawei. 12 Nomo enijing kaan stapam yu wen yu wok langa det sabibalawei, en nomo enijing kaan meigim yu buldan wen yu ran. 13 Yu garra oldei jinggabat wanim yubin len en yu nomo larramgo. Yu garra oldei kipum ol detlot wed yubin lenlenbat, dumaji olabat brabli speshalwan blanga yu laif. 14 Yu nomo bulurrum det wei blanga detlot nogudwan pipul, en yu nomo dum detlot nogudbala ting olabat dumbat. 15 Yu nomo bulurrum olabat wei. Yu go yu ronwei, 16 dumaji ola nogudbala pipul kaan silip raidap olabat dum det nogudbala ting en ardim sambodi. 17 Wen olabat oldei dumbat nogudbala ting en ardimbat pipul, wal tharran im jis laik det daga en dringk blanga olabat.
18 “Wal det wei blanga ola gudbala pipul im jis laik det san wen im gidap ailibala en im kipgon meigim ebrijing mowa braitwan. 19 Bat det wei blanga ola nogudbala pipul im jis laik wen olabat wokwok langa det dakbala roud naitaim en dei kaan luk wanim bin meigim olabat buldan.
20 “Main biginini, yu lisin en teiknodis langa main wed. Yu lisin brabli gudwei wanim mi dalimbat yu. 21 Yu nomo fogedabat main wed. Yu kipum holot insaid langa yu hat. 22 Dijan wed garra meigim yu jidan brabli gudwei en nomo garram siknis. 23 Yu garra wotjim wanim yu jinggabat, dumaji yu laif shoum wanim yu oldei jinggabat. 24 Yu nomo dalimbat laiya en yu nomo tok enijing blanga trikim enibodi. 25 Yu garra kipgon jinggabat ola trubalawan ting en nomo jidan sheimwan. 26 Yu garra oldei meigim plen blanga dum wanim rait, en im garra hepin lagijat na. Hib 12:13 27 Yu nomo dum eni nogudbala ting. Yu garra dum ola gudbala ting.”

4:26 Hib 12:13