1 Wal det brabli sabibalawan im jis laik det wuman hu oldei jinginatbat. 2 Im jinginat ontop langa hil, en im jandap deya langa det roud weya jidan kroswei. 3 Im oldei jandapbat wansaid langa det geit blanga det taun en im oldei jinginat deya.✡Prab 1:20,21 4 Im tok, “Mi na jinginat langa yumob. Mi jinginat langa ola pipul langa dijan wel. 5 Yumob stil jinggabat ebrijing jis laiga biginini. Yumob garra lafta growap. Yumob silibala pipul. Yu garra lafta len mowa blanga andasten brabliwei.

6 “Wal yumob lisin langa main brabli gudwan wed. Mi oldei dalimbat yumob blanga ola raitwan ting. 7 Wanim ai dalimbat yumob im brabli trubala. Ai nomo laigim detlot laiyawan wed. 8 Ebrijing mi oldei toktokbat im brabli trubala, en nomo laiyawan weya garra lidimbat yumob rongwei. 9 If yumob sabi brabliwei, yumob sabi main wed im brabli gudwan blanga yumob. 10 Yumob garra laigim main wed. Im mobeda den silba. En blanga jidan garram klebabala main, im mobeda den gol.

11 “Wal mi na brabli sabibala. Mi mobedawan langa detlot purdiwan ston, en mi mobedawan langa ol detlot enijing weya yumob wandimbat. 12 Mi na brabli sabibala, en mi sabi ebrijing. Ai garram brabli gudbala main en oldei gibit ebribodi feyago. 13 If yumob shoum rispek langa YAWEI en meigim im mowa haibala, wal yumob garra libum detlot nogudbalawei. Ai nomo laigim det praudbalawei, en ola laiyawan wed en ola nogudbala ting. 14 Ai meigim ola plen en ai kipum olataim. Ai garram brabli gudbala main en mi brabli strongbala du. 15 Mi oldei album ola king en ola lida olabat blanga jidan bos, en meigim ola gudwan lowa. 16 Mi na oldei album ola boswan blanga jidan bos, en album ola lida olabat du. 17 Ai laigim detlot pipul hu laigim mi, en detlot pipul hu lukabat mi, garra faindim mi. 18 Ai garra meigim pipul rispek langa yumob, en meigim yumob jidan ritjwan olataim. En ai garra meigim ebrijing hepin gudwei blanga yumob. 19 Wanim yu gajim brom mi, im mobedawan langa det brabli gudwan gol, en im mobedawan langa det brabli gudwan silba. 20 Mi oldei wok langa det raitwei. Mi bulurrum det gudwan roud weya gibit ebribodi feyago, 21 en mi oldei gibit main enijing langa detlot pipul hu laigim mi, en mi oldei bilimap olabat haus garram ola gudbala ting.

22 “Wal mi na bin jidan garram YAWEI wen imbin stat meigimbat dijan wel. Aibin iya longtaim bifo imbin meigim ebrijing.✡Reb 3:14 23 Aibin jidan brom longtaim, bifo dijan wel bin jidan iya. 24 Aibin jidan bifo imbin meigim det solwoda, en wen nomo eni springwoda bin jidan. 25 Aibin bon bifo imbin meigim detlot bigwan en lilwan hil. 26 Aibin jidan bifo imbin meigim dijan wel en fam en dijan graun. 27 Aibin deya wen imbin pudum det skai deya langa top, en wen imbin pudum det mak weya det skai en kantri en solwoda jidan. 28 Aibin deya wen imbin meigim detlot klaud langa top, en wen imbin meigim det solwoda kamat. 29 Aibin deya wen imbin dalim det solwoda nomo blanga pasim det mak, en aibin deya wen imbin meigim det draiwan graun. 30 Aibin deya wansaid langa im, jis laik det men weya oldei meigim det plen hau blanga bildimap haus. Aibin oldei meigim im gudbinji ebridei, en aibin brabli gudbinji blanga jidanbat garram im. 31 Aibin jidan brabli hepiwan langa dijan wel, en aibin brabli gudbinji garram ola pipul.

32 “Orait ol yumob yangmen, yumob garra lisin langa mi na. Yumob dum wanim mi dalimbat yumob blanga dum, wulijim yumob garra jidan hepiwan. 33 Yumob garra teiknodis wanim yumob bin len. Yumob garra len hau blanga jidan gudwei, en nomo gibit bekboun langa detlot wed. 34 Det men hu oldei jandap en weidabat blanga mi langa main dowa en lisin langa mi, im na garra jidan brabli hepiwan. 35 Det men hu faindim mi, garra jidan garram gudwan laif, en YAWEI garra gudbinji garram im. 36 Det men hu nomo laigim mi garra abumbat loda pein. Enibodi hu nomo laigim mi garra dai.” Lagijat na det brabli sabibalawan bin tok.