1 Yu nomo jelas blanga detlot brabli nogudbala pipul, en yu nomo meigim fren garram olabat, 2 dumaji olabat oldei jinggabat blanga faitfait en dum ola krulbala ting.

3 Yu garra abum streitbala main en sabi hau blanga bildimap gudwan femili. 4 Yu garra sabi brabliwei blanga bilimap yu haus garram ola gudwan ting weya mani kaan baiyim.

5 Wen yu jidan sabibala yu gin bidim det strongbala men. 6 Yu garra jinggabat brabliwei en meigim ola gudwan plen bifo yu go langa wo. If yu garram gudwan plen yu garra win.

7 Det silibala men nomo garram det streitbala main, en wanim im tok, tharran na nomo album enibodi.

8 Detlot pipul hu oldei meigimbat trabul, olabat na laigimbat trabul. 9 Pipul nomo laigim detlot silibala pipul hu oldei jinggabat blanga dumbat nogudbala ting.

10 If yu gibap en jidan wikwan wen trabul kaman, wal yu brabli wikwan na.

11 Yu garra album enibodi hu dei garra kilim wen dei nomo bin gibit im feyago. 12 Yu kaan tok, “Ai nomo sabi enijing blanga dijan.” God sabi wanim yu jinggabat langa yu main. Im oldei wotjimbat wi en im sabi wanim wi jinggabat en im garra peiyimbek wi blanga wanim wibin dumbat.

13 Main biginini olabat, det shugabeig im gudwan blanga yumob en im teist brabli gudwan. 14 Wal lagijat seimwei du, if yumob garram det sabibala main im meigim yumob brabli gudbinji. If yumob garram det sabibala main yumob garra jidan gudbalawei longtaim en wanim yumob bin wandim blanga hepin garra kaman trubala.

15 Yumob nomo jidan wulijim det wikitwan men en gibitbat adtaim langa gudbala pipul en ardimbat olabat femili olabat. 16 Wen detlot gudbala pipul abumbat loda trabul olataim olabat nomo gibap, bat wen detlot wikitwan pipul abum bigiswan trabul olabat garra binijap.

17 Yumob nomo gudbinji wen yumob enami abum trabul en buldan. 18 YAWEI det trubala God garra sabi en im garra jidan nogudbinji langa yumob en im kaan wail langa detlot enami olabat enimo.

19 Yumob nomo larram detlot nogudbala pipul meigim yumob wori o meigim yumob jelas langa olabat, 20 dumaji dei garra binijap jis laik det lait langa lemp im binij.

21 Main biginini olabat, yumob garra abum rispek blanga YAWEI en det king brabliwei, en yumob kaan meigim fren garram detlot pipul hu gibit bekboun langa YAWEI en det king. 22 Wal nobodi sabi wotaim YAWEI en det king garra panishim detkain pipul kwikbalawei wen dei gibit dubala bekboun.

23 Wal dislot iya mowa brabli gudwan wed blanga ola sabibala.

Wen yu jidan det jadj langa kothaus yu garra gibit pipul feyago. 24 If yu larram giltiwan pipul go fri, wal ebribodi langa dijan kantri en ola najalot kantri garra tok nogudwei blanga yu. 25 Bat if yu panishim detlot giltiwan pipul ebrijing garra wek gudwei blanga yu, en yu garra abum loda gudbala ting.

26 Enibodi hu tok streidat langa im fren, shoum im fren im rili laigim im.

27 Yu garra meiksho yu meigim pedik redibala en growimap sid daga basdam bifo yu bildimapbat yu haus.

28 Yu nomo tok sambodi im gilti wen im nomo gilti. 29 Yu nomo tok laiyawan wed o jinggabat miselp, “Ai garra peiyimbek im.”

30 Wal wantaim aibin gopas langa det greip fam blanga wan siliwan men. 31 Ola jigininbala gras bin gro ebriweya na, en det stoniwan wol bin buldan. 32 Wen aibin luk tharran imbin titjimbat mi dijan. 33 Wen yu go en leidan langa yu sweig en yu abum lilwan silip en yu oldei jidan en dumbat najing, 34 kwikbala yu garra jidan nomo garram enijing jis laik sambodi bin kilimbat yu en stilimbat yu ebrijing.✡Prab 6:10,11