11
Wen yu trastim YAWEI
Song blanga Deibid.
1-2 Mi oldei trastim YAWEI blanga kipum mi seif.
Wotfo yu tok langa mi blanga ranawei jis laik bard weya flaiwei langa bigwan hil blanga jidan seifwan?
Im trubala orait, detlot nogud pipul redi blanga shudum garram bo en erro.
Brom det dakwan pleis dei weidabat blanga kilimbat ola gudwan pipul.
Wen nogudbala pipul meigim ebrijing rong,
wanim ola gudwan pipul gin dum? Najing!
 
YAWEI, im jidan langa im seikridwan pleis.
Im jidan bos langa hebin.
Im wotjimbat pipul ebriweya en im sabi wanim olabat dumbat.
Im luk ola gudwan pipul en ola nogudwan pipul seimwei.
Im nomo laigim ola jigiwan pipul brabliwei.
 
Im garra jandimdan hotwan eshis en smok garram nogudwan smel langa ola nogudwan pipul.
Im garra panishim olabat garram brabli hotwan win.
YAWEI nomo garram eni rong langa im,
en im laigim ola gud ting weya pipul dum.
Detlot hu dum lagijat na garra luk im.