14
Det nogudwanwei blanga pipul*Luk langa Saam 53.
Song blanga Deibid.
1 Siliwan pipul reken, “God nomo jidan!”
Olabat holot brabli nogudwan,
en olabat bin dumbat ola brabli nogud ting.
Nobodi iya dum enijing rait.
2 YAWEI im lukdan brom hebin blanga luk if enibodi jidan raitwei,
en if enibodi weship im du.
3 Bat deibin ol tenawei brom YAWEI, en holot na jidan nogudwan.
Nobodi dum rait ting enimo.✡Rom 3:10-12
4 YAWEI im tok, “Maitbi dei nomo sabi.
Wotfo dei kaan len, dislot nogud pipul?
Olabat oldei deigimwei ebrijing brom main pipulmob.
Olabat nomo jingat langa mi.”
5 Bat bambai God garra meigim olabat bradin brabliwei,
dumaji im jidan garram ol detlot pipul hu teiknodis langa im.
6 Detlot nogudbala pipul gibit adtaim langa ola powan pipul hu nomo garram enijing,
bat YAWEI im maindimbat olabat.
7 Mi prei adbalawei langa YAWEI weya im jidan langa Saiyan, blanga seibum ola pipul langa Isreil.
Olabat garra jidan gudbinji brabliwei wen YAWEI garra meigim olabat abum ebrijing igin.