16
Song blanga trastim God
Song blanga Deibid.
Seibum mi, YAWEI!
Mi ran langa yu blanga seibum mi.
Aibin tok, “Oni yu na main bos!
Ola gudwan ting ai garram, dei holot brom yu.”
 
YAWEI, yu pipul olabat gudbala,
en dei meigim mi gudbinji.
Bat detlot hu weshipbat enikain drimin garra nogudbinji detmatj.
Ai nomo wandi gibit blad ofring sekrifais langa detlot drimin,
en ai nomo wandi gulum olabat neim.
 
YAWEI, oni yu na garra gibit mi ebrijing weya ai garra abum.
Oni yu na filimap main laif garram ola gudbala ting,
jis laik sambodi filimap main kap raidap.
Oni yu na holdim ebrijing weya garra hepin langa mi langa yu bingga.
Yubin opinimap yu bingga en ola brabli gudwan ting bin kamat langa mi.
 
Ai preisim yu, YAWEI, blanga shoumbat mi det wei.
Nomeda weya det naitaim im brabli dakbala,
mi oldei jinggabat wanim yu wed tok.
Ai garra oldei luk langa yu weya yu jandap raidensaid langa mi, en maindimbat mi brom enijing weya oldei meigim mi bradin.
Ai garra preisim yu gudbinjiwei garram holbit det filing insaid langa main hat.
Ai garra jidan gudwei en weit blanga yu.
 
10 Yu na bin pikimat mi.
Yu kaan libum main bodi insaid langa greibyad.
Yu kaan larram mi jidan langa det pleis blanga ola dedbala pipul. Eks 13:35
11 Yubin shoum mi det wei langa laif,
en yu meigim mi gudbinji wen yu jidan gulijap langa mi.
Wen mi jidan langa det raidensaid blanga yu,
ai garra oldei jidan brabli gudbinjiwei. Eks 2:25-28

16:10 Eks 13:35

16:11 Eks 2:25-28