1 God, yu sori langa mi dumaji pipul kaman blanga fait langa mi.

Ol main enami olabat dumbat nogud ting langa mi olataim.

2 Oldei main enami olabat fait langa mi.

Olabat bigismob hu wandi fait langa mi.

3 YAWEI det boswan God, wen mi bradin mi trastim yu.

4 Ai garra trastim langa im en ai kaan bradin.

Ai gibit im preis blanga wanim imbin pramisim.

Wotfo ai garra bradin?

Pipul kaan ardim mi!

5 Oldei main enami olabat meigimbat trabul blanga mi.

Dei oldei jinggabat olkainwei blanga ardim mi.

6 Olabat oldei blandim miselp langa ola sigridwan pleis,

en lukinatbat ebrijing mi dumbat,

dumaji olabat wandi kilim mi ded.

7 God, yu panishim olabat blanga olabat nogudbalawei.

Yu gitwail en binijimap olabat.

8 Yu sabi blanga dijan trabul ai garram.

Yubin raidimdan haumatj aibin kraikraibat.

Yubin raidimdan langa yu buk, indit?

9 Langa det dei wen ai garra jingat langa yu,

ol main enami olabat garra tenaran en gowei.

Ai sabi tharran dumaji God im jidan langa main said.

10 Langa YAWEI na, en ol im pramis ai gibit preis.

11 Ai trastim im en ai kaan bradin.

Wotfo ai garra bradin?

Pipul kaan ardim mi!

12 God, ai garra gibit yu wanim aibin pramis.

Ai garra gibit theingks langa yu garram main sekrifais ofring.

13 Yubin seibum mi wen aibin gulijap dai,

en yu nomo bin larram mi buldan, wulijim ai garra oldei wok garram yu langa yu lait.