1 Ola pipul langa dijan wel preisim God adbala gudbinjiwei!

2 Sing blanga preisim im haibala neim.

Preisim im brabliwei.

3 Tok langa God, “Yu dumbat ola brabli gudwan ting.

Blanga yu pawa im brabli strongbalawan, en yu enami olabat brabli bradin blanga yu en baudan lida langa yu.

4 Ebribodi langa dijan wel weship langa yu.

Olabat preisim yu.

Olabat sing ola preis song langa yu neim.”

5 Kaman en luk wanim God bin dum.

Imbin dum ola brabli gudwan ting blanga pipul.

6 Imbin meigim det solwoda jidan drai graun.

Wi femilimob hubin jidan bifo bin krosoba langa det riba garram fut.

Deya na, wibin jingat gudbinjiwei blanga wanim imbin dum.✡Eksa 14:21; Josh 3:14-17

7 Garram im strongbala pawa im jidan bos olagijawan, en im wotjimbat pipul langa ola kantri.

Nomo gibit bekboun langa YAWEI.

8 Ola pipul brom ebri kantri preisim wi God.

Larram ebribodi irrim det preis.

9 Im nomo bin larram wi dai,

en im nomo bin larram wi buldan.

10 God, yubin testimbat melabat wulijim silba wen im barn langa faiya blanga klinimat det rabish pat.

Wal lagijat na yubin testim melabat.

11 Yubin larram melabat abum loda trabul jis laik melabat bin buldan insaid langa trep,

en jis laik yubin meigim melabat garrimap hebiwan loud langa bekboun.

12 Yubin larram melabat enami olabat jidan krulbala bos langa melabat, jis laik deibin ranimdan melabat garram olabat hosis en bagi.

Melabat bin abum brabli adtaim, jis laik wen faiya o fladwoda binijimap ebrijing blanga pipul.

Bat yu na bin bringimap melabat langa seifwan pleis garram detmatj daga.

13-14 Ai garra deigim detlot barnapwan ofring langa yu serramoni pleis.

Ai garra gibit yu wanim aibin pramisim wen aibin abumbat trabul.

15 Ai garra gibit ola fetwan enimul langa yu blanga sekrifais.

Ai garra gibit yu ola boiwan ship en buligi en nenigout, en det smok garra gowap langa yu.

16 Ol yumob pipul hu gibit rispek langa God,

kaman en irrim wanim imbin dum blanga mi.

17 Aibin jingat langa im blanga album mi.

Aibin preisim im garram ola song.

18 If ai bina nomo sabi langa ol main nogudbalawei,

im nomo bina irrim mi.

19 Bat God bin irrim mi orait.

Imbin irrim main preya.

20 Mi preisim God, dumaji im nomo bin nokambek main preya,

en kipumbek im filing blanga laigim mi olataim.