1 YAWEI, lisin langa mi en ensim mi,

dumaji ai kaan dum enijing en mi wikwan.

2 Nomo larram mi dai,

dumaji mi jidan trubala langa yu.

Seibum mi dumaji mi blanga yu wekinmen,

en mi trastim yu.

3 Yu na main bos,

wal yu kain langa mi,

dumaji mi oldei jingat langa yu olataim.

4 Main bos, meigim mi jidan gudbinji

dumaji mi blanga yu wekinmen.

Mi oldei jingat langa yu.

5 Bos, yu oldei gud langa melabat en oldei larramgo melabat fri.

En langa ol detlot hu oldei jingat langa yu,

yu laigim olabat olagijawan.

6 YAWEI, yu lisin langa main preya.

Yu lisin langa mi wen mi jingat langa yu blanga album mi.

7 Wen trabul kaman ai jingat langa yu,

dumaji yu oldei ensim mi.

8 Main Bos, det najalot drimin nomo jidan wulijim yu.

Detlot drimin kaan dum wanim yu gin dum.

9 Ola pipul langa ebri kantri weya yubin meigim garra kaman en nildan langa yu,

en olabat garra preisim yu dumaji yu brabli haibalawan.✡Reb 15:4

10 Yu na brabli strongbalawan en haibalawan,

en yu dum ola brabli gudwan ting.

Yu na wanbala, yu jidan God.

11 YAWEI, yu meigim mi sabi wanim yu wandim mi blanga dum,

en ai gin wok langa det trubalawei.

Album mi blanga wek blanga yu garram brabli trubalawan hat.

12 God, main bos, ai garra preisim yu brabliwei garram ebrijing insaid langa mi,

en ai garra kipgon dalimbat ebribodi blanga yu haibala pawa.

13 Blanga yu filing blanga laigimbat mi im detmatj,

im kipgon olagijawan.

Aibin gulijap binij bat yubin seibum mi.

14 Main God, detlot praudbala pipul geingap langa mi blanga trai kilim mi ded,

detlot pipul na weya dei nomo oldei jinggabat langa yu.

15 Bat yu na main God.

Yu jidan garram kainbalawan en soriwan filing,

en yu laigimbat pipul olataim.

Yu nomo gitwail kwikbalawei, najing.

Yu oldei jidan kainbala en yu truwan.

16 Luk langa mi en sori langa mi.

Meigim mi strongbala en seibum mi dumaji mi wek blanga yu laik main mami bin wekwekbat blanga yu.

17 YAWEI, shoum mi yu gudbalawan langa mi,

en detlot hu nomo laigim mi garra jidan sheimwei na,

wen dei garra luk yubin album mi en meigim mi gudbinji.