89
Dijan song blanga det taim wen ola Isreil pipul bin abum trabul
Song blanga Ithan det Esrahait.
1 YAWEI, ai garra oldei sing blanga det filing weya yu oldei laigimbat olagijawan.
Ai garra oldei dalimbat blanga hau yu jidan trubalawei langa yu pipul olagijawan.
2 Ai garra dalimbat blanga det filing blanga yu blanga laigimbat garra jidan olagijawan,
en yu trubalawei jidan olagijawan wulijim det skai weya jidan olagijawan.
3 Yubin tok, “Aibin meigim strongwan pramis garram det men aibin pikimat.
Aibin pramisim main wekinmen Deibid dijan.
4 ‘Brom yu femili lain na king garra oldei jidan.
Ai garra meigim yu femili jidan lagijat olagijawan.’ ”✡2 Sem 7:12-16; 1 Kran 17:11-14; Saam 132:11; Eks 2:30
5 Ebribodi langa hebin sing blanga ola gudwan ting yu oldei dumbat.
Olabat sing blanga det trubalawei blanga yu.
6 YAWEI, nobodi langa hebin jidan laik yu.
Nobodi deya jidan seimwei laik yu.
7 Olabat bradin langa yu brabliwei,
en olabat rispek yu brabliwei du.
8 YAWEI, Boswan God, nobodi jidan garram pawa laik yu.
YAWEI, brabli trubalawei yu dum ebrijing.
9 Yu jidan bos blanga detlot strongwan weib langa solwoda.
Yu meigim olabat jidan kwaitbala.
10 Yubin kilim ded det bigwan solwoda enimul gulum Reiheb.
Garram yu strongbalawan pawa yubin bidim yu enami olabat.
11 Hebin im blanga yu, en dijan wel du.
Yubin meigim dijan wel en ebrijing weya jidan langa im.
12 Yubin meigim nowath en sauth.
Teibowa en Heman, det dubala bigwan hil sing langa yu gudbinjiwei.
13 Yu na det brabli strongbalawan.
Yu pawa im jidan nomo lilwan. Im brabli strongbala.
14 God, yu jidan brabli haibalawan bos,
en pipul sabi yu jidan bos raitwei en yu oldei gibit feyago.
Olabat sabi yu filing blanga laigim olabat en det trubalawei blanga yu.
15 YAWEI, detlot pipul hu oldei weship yu garram ola song,
en hu oldei wokwok langa yu lait,
olabat na jidan brabli gudbinjiwei.
16 Dumaji blanga yu na, olabat oldei sing en toktokbat,
en olabat preisim yu blanga det raitwei blanga yu.
17 Garram yu pawa yu meigim melabat strongbala blanga win brabliwei.
En blanga yu filing im laigimbat melabat olataim en meigim melabat gudbinji.
18 YAWEI, yu na bin pikimat det king blanga lukaftumbat melabat jis laiga shild.
Yu na, det brabli Holiwan God blanga Isreil bin gibit melabat ronwan king.
God bin meigim pramis langa Deibid
19 YAWEI, longtaim langa drim yubin tok langa ol yu trubalawan wekinmen,
“Aibin meigim dijan solja jidan strongbala garram big neim.
Aibin pikimat dijan yangmen brom ola pipul blanga jidan haiwan king.
20 Aibin meigim main wekinmen Deibid jidan king wen aibin spilim det seikridwan oil langa im hed.✡1 Sem 13:14; 16:12; Eks 13:20
21 Ai garra oldei album im,
en main pawa garra oldei meigim im strongbala.
22 Im enami olabat kaan neba win en jidan bos langa im.
Ola brabli nogudwan pipul kaan bidim im.
23 Ai garra binijimap im enami olabat,
en kilim ded ol detlot hu nomo laigim im.
24 Ai garra laigim im en jidan trubala langa im.
En mowa igin, ai garra oldei meigim im win.
25 Ai garra meigim im kantri bigwan, brom det Medatareiniyan solwoda raidap langa det Yufreitis Riba.
26 Deibid garra tok langa mi, ‘Yu main dedi en main God.
Yu na oldei maindimbat en seibumbat mi jis laiga bigwan ston.’
27 Ai garra meigim im main feswan san,
en det brabli nambawan king brom ol detlot najalot king.✡Reb 1:5
28 Ai garra oldei kipum main pramis langa im,
en main strongwan pramis garra jidan olagijawan garram im.
29 Im femili neim garra jidan olagijawan wulijim det skai.
Brom im femili lain, king garra oldei jidan.
30 “Bat if olabat nomo teiknodis en bulurrum ol detlot lowa blanga main,
31 en if olabat nomo dum wanim ai dalim olabat,
32 wal ai garra panishim olabat blanga olabat nogudbalawei.
Ai garra meigim olabat ardimbat blanga olabat nogudbalawei.
33 Bat ai kaan stap laigimbat Deibid,
en ai garra kipum main pramis langa im olagijawan.
34 Ai kaan breigim main strongwan pramis langa im,
o deigimbek eni pramis aibin meigim langa im.
35 “Trubala dijan na det pramis aibin meigim garram main ronwan seikridwan neim.
Ai kaan dalim laiya langa Deibid.
36 Im femili lain garra kipgon olagijawan.
En ai garra oldei maindimbat det kantri weya im jidan bos wulijim det san weya im oldei shain olataim.
37 Im garra jidan olagija jis laik det mun,
weya im jidan trubalawan witnis blanga mi langa skai.”
Soriwan song dumaji ola enami bin bidim det king
38 Bat YAWEI, yubin gitwail langa det king weya yubin pikimat.
Yubin libum im miselp en yu nomo wandi sabi im enimo.
39 Yubin breigim yu strongwan pramis garram yu wekinmen,
en yubin tjakamdan im speshalwan het langa graun.
40 Yubin breigimap ola wol blanga im taun,
en yubin libum ol im strongwan haus breikinwan.
41 Enibodi hubin wokpas langa det pleis bin stilim ebrijing blanga im.
En ola pipul langa ola gulijapwan kantri bin mokimbat im.
42 Yubin meigim im enami olabat bidimbat im,
en yubin meigim olabat holot gudbinji nomo lilbit.
43 Yubin meigim nogud ola wepan blanga det king,
en im nomo bin win wen imbin fait.
44 Yubin deigidawei im speshalwan stik weya im oldei holdim,
en yubin nokamdan im speshalwan tjeya langa graun.
45 Yubin meigim im olmen na, bat im oni yangbala,
en yubin meigim im jidan garram sheim.
Preya blanga askim God blanga seibum olabat
46 YAWEI, haulong yu garra haidim miselp?
Haulong yu garra barn binji wulijim faiya weya barn?
47 Yu jinggabat na. Main laif kaan jidan longtaim.
Yubin meigim pipul blanga dai.
48 Nobodi kaan jidan laibala en neba dai.
Nobodi kaan stapam miselp brom daidaibat.
49 YAWEI, weya det filing yubin abum bifo blanga laigimbat pipul olagijawan?
Weya ola pramis yubin meigim langa Deibid?
50 YAWEI, yu sabi hau ol detlot hu nomo weship yu oldei mokimbat en meigimbat fan langa mi, yu wekinmen.
51 YAWEI, yu enami olabat tok nogudwei langa yu king weya yubin pikimat.
Ebriweya im go dei tok nogudwei blanga im.
52 Preisim YAWEI det trubala God olagijawan.
Yuwai! Trubala!