92
Song blanga gibit theingks
Song blanga det Sebathdei.
YAWEI, im brabli gudwan blanga gibit theingks langa yu,
en sing song blanga preisim yu, brabli haibala God.
Im brabli gudwan blanga sing ebri moning blanga yu filing blanga laigim pipul olataim,
en ebri naitaim blanga yu trubalawei,
garram myusik brom olkain gita.
 
YAWEI, ola ting weya yu dum garram yu pawa meigim mi gudbinji.
Ai sing song gudbinjiwei, blanga wanim yubin dum.
 
Trubala, im nomo lilwan ting weya yu dum, YAWEI.
Detlot ting weya yu jinggabat, olabat brabli adwan blanga pipul blanga sabi.
Siliwan pipul kaan sabi blanga dijan na.
Wulijim bindiyai weya im gro isibalawei en spredat ebriweya, lagijat du nogudbala pipul nomo abum eni trabul en gajimbat detmatj ebrijing isibalawei tudei,
bat bambai yu na YAWEI garra binijimap olabat olagijawan,
dumaji yu na YAWEI, jidan bos brabli olagijawan.
 
Wi sabi blanga yu enami olabat garra binij,
en ola nogudbala pipul kaan win.
10 YAWEI, yubin meigim mi strongbala jis laik wailwan bul jidan strongbala.
En dumaji yubin gud langa mi,
mi jidan gudbinji.
11 Aibin luk yubin bidim main enami olabat, en aibin irrim olabat jingat.
 
12 Detlot pipul hu jidan raitwei garra jidan gudbalawei jis laik detlot tri weya oldei abum detmatj daga,
en jis laik detlot sidatri weya oldei jidan strongbala.
13 Jis laik ola tri weya gro langa det Serramoni Pleis blanga YAWEI,
14 en weya oldei kipgon abumbat detmatj daga raidap olabat brabli olwan,
wal lagijat du detlot pipul garra oldei kipgon jidan raitwei,
en dei garra oldei tok dijan blanga YAWEI,
15 “YAWEI im brabli trubalawan en im nomo garram enijing rong langa im,
en im oldei maindimbat mi, jis laiga bigwan ston weya kipum mi seifwan.”