1 Mi laigim YAWEI, dumaji im oldei irrim langa mi.

Im irrim ol main preya.

2 Ai garra jingat langa im ol main laif.

3 Deth bin gulijap langa mi.

Aibin brabli bradin blanga det greib.

Aibin jidan garram bradinwan filing en aibin brabli hatjamp.

4 Brom deya aibin jingat langa YAWEI,

“YAWEI, album mi! Seibum mi!”

5 YAWEI im oldei soribala en im gudwan.

Wi God im garram kainbala filing.

6 YAWEI im lukaftumbat ola wikwan pipul.

Imbin seibum mi wen aibin abum trabul.

7 Main hat jidan kwaitbalawei, dumaji YAWEI bin gudbala langa mi.

8 Aibin gulijap dai, bat YAWEI bin seibum mi.

Imbin stapam mi brom kraikraibat, en imbin album mi jidan langa det gudbala roud.

9 Blanga tharran na mi oldei wok garram YAWEI iya langa dijan wel weya pipul jidanbat.

10 Aibin kipgon bilib, nomeda aibin gulijap binijap.✡2 Karin 4:13

11 Wen aibin apset aibin tok,

“Pipul oldei dalim laiya.”

12 Wanim ai garra gibit langa YAWEI blanga ola gudbala ting imbin gibit langa mi?

13 Ai garra bringim speshalwan ofring langa YAWEI blanga gibit theingks langa im dumaji imbin seibum mi.

14 Deya lida langa ol im pipul olabat ai garra gibit im wanim aibin pramis.

15 Wen wanbala blanga im pipul olabat dai,

YAWEI jidan brabli nogudbinji.

16 Mi blanga yu wekinmen, YAWEI.

Mi wek blanga yu jis laik main mami bin oldei dum.

Yubin seibum mi wen aibin gulijap dai.

17 Ai garra gibit yu theingks garram sekrifais ofring,

en ai garra prei langa yu.

18-19 Deya lida langa ol yu pipul olabat langa yu Serramoni Pleis langa Jerusalem,

ai garra gibit yu wanim aibin pramis.

Aleiluya! Preisim YAWEI!