Sekaraiya
Sekaraiya Bin Tok Gudwei Langa Ola Pipul Langa Jerusalem
Wal dijan stori im blanga det speshalwan mesinja blanga God neim Sekaraiya en imbin jidan haibala serramonimen du. Det najawan speshalwan mesinja neim Hegai bin jidan deya seimtaim. Wal God bin gibit eitbala drim langa Sekaraiya blanga album detlot Juda pipul hubin kambek brom Bebalon. Deibin stat blanga bildimbek det Serramoni Pleis igin, bat deibin abumbat loda trabul en detlot drim bin album olabat blanga go thru langa detlot trabul. Detlot najalot wed brom God bin dalimbat olabat blanga libum ola nogudbalawei blanga olabat en bulurrum im en im garra larramgo olabat fri. En langa det dei bambai, God garra pikimat bos blanga Jerusalem igin. En ola pipul brom najalot kantri garra libum olabat nogudbalawei en dei garra bulurrum God, en dei garra jidan im pipul olabat, en ola pipul langa dijan wel garra weship oni langa im.
1
YAWEI bin jingat langa im pipul olabat blanga kambek langa im
1 Wal YAWEI det trubala God bin gibit dijan wed langa mi det speshalwan mesinja blanga im neim Sekaraiya. Imbin gibit mi dijan wed langa det namba 8 manth blanga det sekanwan yiya weya Daraiyas bin jidan king blanga det kantri gulum Pesha. Wal aibin det san blanga Berakaiya hubin det san blanga det olmen neim Ido.✡ Esra 4:24—5:1; 6:14 2 YAWEI bin dalim mi blanga dalim ola pipul, “Mi na bin brabli wail langa yumob grengrenfatha olabat. 3 Wal mi dalim yumob blanga kambek langa mi na, en ai garra kambek langa yumob. 4 Yumob nomo jidan laik yumob grengrenfatha olabat. Longtaim detlot speshalwan mesinja bin gibit olabat main wed en deibin dalimbat olabat, ‘Nomo dumbat detlot nogudbala ting.’ Bat dei nomo bin irrim en duwit langa mi. 5 Wal weya yumob grengrenfatha olabat en detlot speshalwan mesinja na? Deibin ol dai. 6 Thru main wekinmen olabat, detlot speshalwan mesinja, aibin gibit yumob grengrenfatha olabat main wed en woning, bat dei nomo bin teiknodis langa olabat en aibin panishim olabat jis laik aibin tok. Afta deibin sori en tenim miselp brom olabat nogudbalawei en deibin tok, ‘YAWEI na det boswan God hubin panishim wi en imbin rait blanga im blanga panishim wi jis laik weya imbin tok blanga panishim wi.’ ”
Drim blanga hosis
7 Wal YAWEI bin kipgon tok en imbin gibit mi, Sekaraiya, dijan wed langa drim naitaim. Imbin gibit mi det drim langa det 24 dei blanga det namba 11 manth gulum Shebat, langa det sekanwan yiya weya Daraiyas bin jidan king. 8 Aibin luk wanbala men raidimbat redwan hos. Imbin jandap insaid langa detlot tri gulum metiltri langa wan beli, en najalot hosis bin biyain langa im, redwan, greiwan en waitwan.✡ Reb 6:2,4 9 Aibin askim det wanbala einjul hubin jandap deya garram mi. Aibin tok, “Bos, wanim dislot hosis min?”
Det einjul bin tok, “Ai garra shoum yu wanim olabat min. 10 YAWEI bin jandim olabat blanga luk ola kantri ebriweya langa dijan graun.”
11 Detlot raida blanga detlot najalot hosis bin dalim det najawan einjul, det einjul blanga YAWEI, hubin jandap deya insaid langa detlot metiltri. Deibin tok, “Melabat bin go ebriweya langa dijan wel en melabat bin luk ebrijing jidan gudwei en kwaitbala.”
12 Afta det einjul blanga YAWEI bin tok, “YAWEI yu na det boswan God, en blanga 70 yiya na yubin brabli wail langa Jerusalem en Juda. Wal haulong dei garra weit langa yu blanga kain langa olabat?”
13 YAWEI bin ensim det einjul blanga im garram gudbala wed blanga meigim im gudbinji, 14 en det einjul bin dalim mi det wed blanga YAWEI det boswan God weya ai garra dalim ola pipul. Imbin tok, “Ai laigim Jerusalem main seikridwan taun detmatj, 15 en mi brabli wail langa ol detlot pipul brom ola najalot kantri hu reken olabat seif. Dumaji wen aibin holdimbek miselp brom main pipul ol detlot najalot pipul bin kipgon ardimbat olabat. 16 Blanga tharran na ai garra kambek langa Jerusalem blanga shoum olabat mi kain langa det taun. Dei garra bildimap main Serramoni Pleis en det taun. 17 En trubala, bambai ola taun blanga mi garra jidan ritjwan igin en ai garra album ola pipul deya langa Jerusalem en ai garra meigim det pleis main ronwan taun igin.” Wal lagijat na YAWEI bin tok.
Sekaraiya bin drim blanga buligi hon
18 Wal langa najawan drim aibin luk fobala buligi hon. 19 Aibin askim det einjul hubin toktok langa mi, “Wanim dislot hon min?”
Det einjul bin tok, “Olabat deigim pleis blanga ola pipul hu garram pawa langa dijan wel weya bin bidim en deigidawei ola pipul brom Juda, Isreil en Jerusalem.”
20 En afta YAWEI bin shoum mi fobala wekinmen en holot bin abum hema. 21 Aibin askim im, “Wanim dislot men bin kaman blanga dum?”
Imbin tok, “Deibin kaman blanga bradinim en binijimap ola pipul brom ola kantri hubin binijimap ebrijing langa Juda en spredimat im pipul olabat.”