1 Dijan na det wed brom YAWEI det trubala God hubin meigim det skai en dijan graun en hubin gibit laif langa pipul. Dijan na det wed blanga YAWEI langa ola Isreil pipul. Imbin tok, 2 “Pipul garra kaman blanga fait langa detlot Juda pipul en langa detlot Jerusalem pipul en dei kaan gowei kwikbala. Wen detlot enami kaman blanga fait langa detlot Jerusalem pipul, wal ai garra meigim detlot enami brabli granggibala wulijim olabat kaan wok streit jis laik detlot pipul hu dringgim wain. 3 Pipul brom ola kantri garra majurrumap miselp blanga fait langa detlot Jerusalem pipul. Bat langa det dei bambai, ai garra meigim Jerusalem jidan laik brabli bigwan hebiwan ston en eni enamimob hu trai blanga mubum im garra ardim miselp brabliwei. 4 Langa det dei bambai ai garra meigim ola hosis bradin brabliwei en ai garra meigim ola raidamob go medwan. Ai garra maindimbat ola Juda pipul bat ai garra meigim ola hosis blanga det najalot pipul blainwan. 5 Brom deya detlot pipul blanga detlot femili lain blanga Juda garra tok miselp. Wi pipul olabat langa Jerusalem jidan strongbala dumaji YAWEI wi Boswan God na meigim wi strong!

6 “Langa det dei bambai detlot pipul brom detlot femili lain blanga Juda garra fait langa olabat enami en dei garra kilim olabat brabliwei, jis laik faiya weya barnimap ola bush kantri, o jis laik lilwan metjis weya barnimap draiwan gras langa pedik. Olabat garra kilim ola enami raidaran lagijat na, bat detlot Jerusalem pipul garra jidan seif deya langa olabat taun.

7 “Mi na YAWEI ai garra seibum detlot pipul langa Juda basdam, en afta ai garra seibum detlot langa Jerusalem, wulijim detlot pipul langa Jerusalem en ola femili lain blanga Deibid kaan tok praudbalawei langa detlot Juda pipul. 8 Langa det dei ai garra kipum detlot Jerusalem pipul seif. Ai garra meigim detlot brabli wikwan pipul strongbala laik Deibid bin jidan. En detlot boswan brom det femili lain blanga Deibid garra go lida langa olabat, jis laik det einjul blanga mi bin go lida langa olabat grengrenfatha olabat langa det bush kantri longtaim wen aibin lukaftum olabat. 9 Langa det dei na ai garra kaman en binijimap ola enamimob hu kaman blanga fait langa detlot pipul deya langa Jerusalem.” Lagijat na YAWEI bin tok.

10 En YAWEI bin tok, “Ai garra meigim detlot pipul blanga det femili lain blanga Deibid en langa detlot Jerusalem pipul brabli nogudbinji, en ai garra meigim olabat prei langa mi wen dei garra luk det men weya dei kilim ded garram spiya en dei garra sori miselp dumaji deibin dum nogudbala ting. Dei garra krai adbala jis laik det mami en dedi weya abum oni wanbala biginini en dei lujim im, en laik detlot femili hu lujim olabat feswan san wen det feswan san dai.✡Jon 19:37; Reb 1:7 11 Langa det taim detlot pipul bin brabli nogudbinji en deibin kraikrai detmatj, jis laik wen detlot pipul bin kraikrai blanga Heidedriman deya langa det fletwan kantri gulum Magido. 12-14 Ola pipul langa det kantri garra krai, en ola femili garra krai miselpmiselp. Detlot pipul blanga det femili lain blanga Deibid garra krai, en detlot pipul blanga det femili lain blanga Neithan garra krai, en detlot brom det femili lain blanga Libai en brom det femili lain blanga Shimiyai. Langa ola femili ola men garra krai miselp en ola wuman garra krai miselp du.” Wal lagijat na YAWEI bin tok.✡Meth 24:30; Reb 1:7