37
Yakob baliꞌ nisiꞌ rae Kanaꞌan
1-2a Ia, Yakob se dudꞌui na. Leleꞌ naa, Yakob neu leo baliꞌ sia rae Kanaꞌan, fo maꞌahulu na, aman Isak mamana leleon.
Yusuf no aꞌa nara
2b Leleꞌ naa, Yakob anan esa mia sao na Rahel, naran Yusuf. Ana too sanahulu hitu ma, no aꞌa nara reu ranea hiek-lombo ra. Aꞌa nara, anaꞌ mia Yakob sao nara, Bilha ma Silpa. Te Yusuf ia, mana nendi-nendiꞌ dedꞌeat fee ama na, soꞌal aꞌa nara.
3 Bonggi Yusuf te, Yakob lasiꞌ ena. Naa de ana sue Yusuf lenaꞌ ana na laen ra. Lao esa, Yakob soo badꞌu naru meulauꞌ esa,*Alkitab dedꞌea Ibrani lii na, sosoa na nae, ‘juba no dula malole na mataꞌ-mataꞌ’, do ‘badꞌu naru maloleꞌ’, naeni badꞌu naruꞌ no lima naruꞌ. fee Yusuf. 4 Aꞌa nara rahine ama na sue Yusuf lenaꞌ, de ramanasa e seli. Ara nda nau ola-olaꞌ malolole ro e sa ena.
5-7 Tetembaꞌ esa ma, Yusuf nalamein. De nafadꞌe meit naa neu aꞌa nara nae, “We! Hei rena dei! Au ulumein ae basa nggita paꞌa are-nggandum sia osi rala. Au are ngga nambariiꞌ ndos. Te hei are mara rambariiꞌ nduleꞌ au are ngga, ma beꞌutee neu are ngga.” Aꞌa nara rena rala ma, ramanasa e.
8 Boe ma ara ai Yusuf rae, “Woi! Mbei ma ho mae dadꞌi hai malangga mana parenda ma, do?” Ara ramanasa e seli, huu nafadꞌe meit naa.
9 Basa naa ma, Yusuf nalamein seluꞌ fai. De ana nafadꞌe aꞌa nara nae, “We! Au ulumein fai. Au ita relo, fulan, ma nduuꞌ sanahulu esa. Basa se beꞌutee malolole neu au.” 10 Yusuf dui basa meit naa neu aman no aꞌa nara ma, aman ai e nae, “Meit saa ka naa! Ho duꞌa mae au, o inam, ma aꞌa mara ima idꞌu ei ma, do? Ho seli, ma!” 11 De Yusuf aꞌa nara rambedꞌaꞌ ralaꞌ ro e. Te aman dudꞌuꞌa meit naa nakandooꞌ a.
Ara seo Yusuf nisiꞌ Masir dadꞌi ate sia naa
12 Faiꞌ esa ma, Yusuf aꞌa nara rendi ama na hiek-lombo nara losa deka no kambo Sikem. 13 Nda dooꞌ sa ma, ama na nae, “Yusuf e! Aꞌa mara ranea hiek-lombo deka no Sikem. De muote fo muu seꞌu se dei.”
Yusuf nataa nae, “Malole amaꞌ.”
14 Boe ma ama na nae, “Muu dei, fo seꞌu aꞌa mara ro hiek-lombo nggara. Ara ona bee naa, baliꞌ mufadꞌe au.”
Boe ma, Yusuf lao hela rae Hebron moo na, de nakandoo Sikem neu. 15 Losa naa, de sangga se ndule mooꞌ a. Basa ma, nandaa no atahori esa. De atahori naa natane e nae, “Ho sangga saa?’.
16 Yusuf nataa nae, “Toꞌo. Au sangga aꞌa nggara. Ara mboo hiek-lombo sangga uru deka-deka ia. Toꞌo nita se boe, do?”
17 Nafadꞌe nae, “Ara nda sia ia sa. Oi rae reu sia deka-deka kambo Dotan.”
Boe ma, Yusuf neu tungga aꞌa nara, losa nita se sia Dotan. 18 Yusuf feꞌe sia dodꞌooꞌ, te ara rita e ena. Boe ma ara maꞌiraꞌ rae tao risa e. 19 Esa nafadꞌe esa nae, “Mete dei. Malangga meit a nema ena! 20 Ata tao tisa e leo, do? Basa fo honda hendiꞌ e nisiꞌ oe mates rala neu. Dei fo tafadꞌe amaꞌ tae banda fui ra raa hendi e. Basa fo ata mete meit nara, taꞌo bee!”
21 Rena nala naa ma, aꞌa Ruben na sangga dalaꞌ fo nae fee ne nasodꞌa. De ana ai odꞌi nara nae, “We! Ata afiꞌ tao tisa e! 22 Malole lenaꞌ ata tumbuꞌ e nisiꞌ oe mates ia rala. Sia ia mamana maꞌabambiꞌ, de atahori nda rahine sa. Sadꞌi afiꞌ tasaiꞌ raa na.” Ana olaꞌ taꞌo naa, huu ana nae mboꞌi Yusuf, fo denu e baliꞌ.
23 Yusuf losa boe ma, aꞌa nara toꞌu rala e, de sidꞌa hendi badꞌu naru meulau na. 24 Basa ma, ara lea dudꞌui e, de timba e oe mates rala neu.
25 Basa boe ma ara baliꞌ reu raa. Ara feꞌe raa, aiboiꞌ ma, rita nononggoꞌ esa nema. Nononggoꞌ naa, banda onta nara fua bua danggan, onaꞌ hau maꞌameniꞌ, bumbu-bumbu, ma modꞌo mataꞌ-mataꞌ. Tao-tao te nononggoꞌ naa atahori Ismael mia kambo Gilead rae laoꞌ dooꞌ reu sia Masir.
26 Basa ma, Yahuda nafadꞌe odꞌi-aꞌa nara nae, “Weh! Malole lenaꞌ taꞌo ia. Afiꞌ tisa e. Hita hambu saa, boe? Mae ona bee o, nda taꞌafuniꞌ tala raa na sa. 27 Malole lenaꞌ seo hendiꞌ e neu atahori Ismael ra. Mae tao taꞌo bee mbali e o, eni, hita odꞌi bꞌonggi na. De afiꞌ taꞌahinaꞌ e!” Boe ma, basa se tungga oꞌola na.
28 Basa naa ma, nandaa no atahori mana danggan naa ra†Susura Ibrani naeꞌ rae ‘atahori mia rae Midian’. Atahori mahineꞌ hira rae atahori Midian ro Ismael naa, naraꞌ rua, te leo esa. Sira dadꞌi mia Ismael tititi-nonosi na, ma ara leo sia rae Midian. (Mete Hakim-Hakim 8:22-24). Atahori mahineꞌ ruma rae atahori Midian no Ismael naa, dadꞌi mia leo rua, te basa se atahori mana danggan ra. tungga naa, Yusuf aꞌa nara lea e mia oe rala. De ara seo e neu atahori Ismael ra, no feli na doi fulaꞌ rua nulu.‡Atahori mahineꞌ ra rafadꞌe rae, leleꞌ naa, ara akaꞌ a raseo-rahasaꞌ ate feꞌe soruꞌ ra, no feli na doi fulaꞌ 20. Basa ma, ara rendi Yusuf Masir neu.
29 Ara seo Yusuf, te Ruben nda bubꞌuluꞌ sa. Leleꞌ ana baliꞌ nisiꞌ oe mataꞌ a neu, ana nggengger nala seli, huu Yusuf nese ena. De ana sisidꞌa bua na sia ao na, huu ralan susa nala seli. 30 Boe ma ana baliꞌ nisiꞌ odꞌi nara nae, “Aweee! Anaꞌ a nese ia ena. Ia naa, au ae tao taꞌo bee fai?”
31 Basa ma ara hala hiek esa, de haꞌi Yusuf badꞌu meulau na, de boroꞌ e neu raaꞌ. 32 Haꞌi rala badꞌu fo akaꞌ raaꞌ naa, de rendi fee ama na, ma rafadꞌe rae, “Amaꞌ! Hai here mala badꞌu ia. Mete sobꞌa. Afiꞌ losa odꞌi Yusuf ena na.”
33 Yakob mete badꞌu a ma, nahine neuꞌ ena. Nataa nae, “Aweee! Memaꞌ ia au ana ngga badꞌu na. Mitaꞌ mae banda fui ra raa e sia bee ena. Aweee! Au ana ngga mate ena!”
34 Basa naa ma, Yakob sisidꞌa badꞌu na, de olu karon abas, huu ana susa nala seli.§Yakob sisidꞌa badꞌu na, de olu nggati karon abas, onaꞌ atahori Yahudi ra pake leleꞌ atahori nara mate. Boe ma ana nggaee nakandondooꞌ a anan doo na seli. 35 Basa ana touꞌ ma ana ina nara rema radadale, te nda rala e sa. Ana nae, “Hokoꞌ! Au susa losa mate. Au nda bisa liliiꞌ anaꞌ ia sa.” De Yakob susa nakandooꞌ a, huu nasanedꞌa anan Yusuf mana mateꞌ a.
36 Leleꞌ Yakob feꞌe susa taꞌo naa, te atahori danggan naa ra*Alkitab dedꞌea Ibrani nae atahori danggan naa ra, ‘atahori Midian’. losa Masir ena. De reu seo Yusuf neu malangga esa, naran Potifar. Eni, mane Masir a malangga nanea na.
*37:3 Alkitab dedꞌea Ibrani lii na, sosoa na nae, ‘juba no dula malole na mataꞌ-mataꞌ’, do ‘badꞌu naru maloleꞌ’, naeni badꞌu naruꞌ no lima naruꞌ.
†37:28 Susura Ibrani naeꞌ rae ‘atahori mia rae Midian’. Atahori mahineꞌ hira rae atahori Midian ro Ismael naa, naraꞌ rua, te leo esa. Sira dadꞌi mia Ismael tititi-nonosi na, ma ara leo sia rae Midian. (Mete Hakim-Hakim 8:22-24). Atahori mahineꞌ ruma rae atahori Midian no Ismael naa, dadꞌi mia leo rua, te basa se atahori mana danggan ra.
‡37:28 Atahori mahineꞌ ra rafadꞌe rae, leleꞌ naa, ara akaꞌ a raseo-rahasaꞌ ate feꞌe soruꞌ ra, no feli na doi fulaꞌ 20.
§37:34 Yakob sisidꞌa badꞌu na, de olu nggati karon abas, onaꞌ atahori Yahudi ra pake leleꞌ atahori nara mate.
*37:36 Alkitab dedꞌea Ibrani nae atahori danggan naa ra, ‘atahori Midian’.