Susura fee atahori
Ibrani
mana feꞌe na ramahere Yesus Kristus
ma lao hela bei-baꞌi nara agaman
1
Lamatuaꞌ Yesus natudꞌu Aman Lamatualain manaselin neu nggita
1 Dalahulun, Lamatualain denu mana ola-ola nara ola-olaꞌ ro hita bei-baꞌi atahori Ibrani nara.*a: Nara Ibrani ia, bangsa Yahudi nara laen na. Atahori Yahudi mana ramahere neu Yesus Kristus, atahori ra roꞌe se rae, “atahori Saraniꞌ Ibrani”, huu sira fea ro sira toronoo Yahudi nara fo mana feꞌe toꞌu rahereꞌ agama Yahudi atoran mbaran. Ana pake dalaꞌ mataꞌ-mataꞌ de olaꞌ lao hetar no se.†b: Lamatualain nafadꞌe hehelu-fufuli nara, nendiꞌ dalaꞌ mataꞌ-mataꞌ. Conto onaꞌ: Ana nafadꞌe Abraham nendiꞌ hehelu-fufuliꞌ, neu Musa nendiꞌ hohoro-lalane agama, mbali Daud nendiꞌ sosodꞌa kokoa-kikioꞌ neu Yeremia nendiꞌ nekendandaaꞌ. 2 Te ia na, Ana haitua Anan, fo olaꞌ mataꞌ no nggita.
Mia fefeun, Lamatualain pili nala Anan ia ena,
fo parenda naꞌabꞌue no Eni.
Leleꞌ Ana naꞌadꞌadꞌadꞌiꞌ lalai no raefafoꞌ, no basa isi oen,
Anan ia o naꞌadꞌadꞌadꞌiꞌ no E boe.
3 Lamatuaꞌ Anan ia, natudꞌu Aman Lamatuaꞌ manaselin,
onaꞌ relo a rondan naronda mia tiro-ao.
Huu Mata aon onaꞌ Aman.
Mia Hara-lii manaselin,
Ana nalalao basa mana sia lalai no raefafoꞌ.
Ana o natudꞌu dalaꞌ,
fo fee ambon neu atahori sala-kilu nara,
fo ara dadꞌi meumareꞌ.
Basa de Ana baliꞌ sorga neu,
fo endoꞌ sia Lamatualain bobꞌoa onan,
sia mamana nene fee-hadꞌat manaseliꞌ.
Lamatualain Anan manaseliꞌ, lenaꞌ ate mana sia sorga
4 Lamatualain ate nara mana sia sorga memaꞌ manaseliꞌ. Te Anan manaseliꞌ lenaꞌ basa se. Lamatualain panggat na, monaen seli. Ana fee panggat Na neu Anan ena. Naa de Anan, lenaꞌ basa ate nara mana sia sorga.
5 Lamatualain olaꞌ nita no Anan nae,
“Faiꞌ ia, Au soꞌu Nggo toꞌu parendaꞌ.”✡Sosodꞌat Koa-kioꞌ ra 2:7
Lamatualain o olaꞌ nae,
“Au ia, Eni Aman.
Ma, Eni ia, Au Ana ngga.”✡2 Samuel 7:14; 1 Israꞌel no Yahuda Dudꞌuin 17:13
Lamatualain olaꞌ memaꞌ taꞌo naa soꞌal Anan, te Ana nda olaꞌ nita taꞌo naa soꞌal ate nara mana sia sorga sa.
6 Leleꞌ Lamatualain haitua Anan manaseliꞌ naa nema, Ana o parenda ate nara sia sorga nae,
“Wee! Ate ra e!
Hei musi mii fee hadꞌa-hormat,
ma sendeꞌ beꞌutee neu Ana ngga dꞌei!”✡Dui Seluꞌ Dala Masodꞌa 32:43; Lukas 2:13-14
7 Lamatualain o olaꞌ soꞌal ate nara sia sorga nae,
“Au tao ate nggara sia sorga,
dadꞌi onaꞌ anin.
Au tao ate nggara,
dadꞌi onaꞌ ai.✡Sosodꞌat Koa-kioꞌ ra 104:4
Lamatualain olaꞌ naloe ate ra onaꞌ anin ma ai, huu sira, akaꞌ Eni dedꞌenu nara.
8 Te Ana olaꞌ laen fai no Anan nae,
“Ho ia, Lamatualain.
Dei fo Ho endoꞌ sia kadera parendaꞌ losa doo na neu
Dei fo Ho toꞌu koasa fo parendaꞌ no rala ndoos.
9 Ralam namahoꞌo mete atahori mana nasodꞌa ndoos
Te Ralam susa mete atahori mana nasodꞌa tao leli.
Naa de Ralam namahoꞌo,
de Au mboꞌa mina neu langgam,
fo soꞌu nggo dꞌadi maneꞌ lenaꞌ laen ra.”✡Sosodꞌat Koa-kioꞌ ra 45:7-8
10 Lamatualain o olaꞌ neu Anan nae,
“Ana ngge!
Ho ia, Malangga mana toꞌu parendaꞌ eniꞌ a maꞌahulun.
Ho, mana denu fo lalai dadꞌi.
Ho ia, mana parenda fo raefafoꞌ dꞌadi.
11-12 Dei fo lalai no raefafoꞌ sambu-lalo hendi se.
Dei fo lalai no raefafoꞌ mopo hendi se.
Te Ho musodꞌa mukundoo.
Dei fo Ho piru hendi lalai no raefafoꞌ,
onaꞌ atahori piru hendi bua-baꞌu sideꞌ ra.
Dei fo ho nggati lalai no raefafoꞌ,
onaꞌ atahori nggati bua-baꞌu feuꞌ.
Te ho nda taꞌo naa sa.
Huu Musodꞌa losa dꞌoo-nduꞌu-dꞌoon neu.”✡Sosodꞌat Koa-kioꞌ ra 102:26-28
13 Lamatualain o olaꞌ neu Anan nae,
“Ana Ngge!
Uma endoꞌ sia ia, sia mamana nene fee hadꞌa-hormat a,
sia Au bobꞌoa ona ngga.
Dei fo Au tao musu mara,
Losa ara beꞌutee neu nggo.” Lamatualain olaꞌ memaꞌ taꞌo naa soꞌal Anan, te Ana nda olaꞌ taꞌo naa soꞌal ate nara sia sorga sa.✡Sosodꞌat Koa-kioꞌ ra 110:1
14 Ate nara memaꞌ pantin boe. Huu Ana denu se, fo reu tao mataꞌ neu basa atahori nara, fo dei fo Ana fee se masoi-masodꞌaꞌ mia sala-kilu nara. Te mae taꞌo naa o, Lamatualain Anan, feꞌe lenaꞌ basa se.
*1:1 a: Nara Ibrani ia, bangsa Yahudi nara laen na. Atahori Yahudi mana ramahere neu Yesus Kristus, atahori ra roꞌe se rae, “atahori Saraniꞌ Ibrani”, huu sira fea ro sira toronoo Yahudi nara fo mana feꞌe toꞌu rahereꞌ agama Yahudi atoran mbaran.
†1:1 b: Lamatualain nafadꞌe hehelu-fufuli nara, nendiꞌ dalaꞌ mataꞌ-mataꞌ. Conto onaꞌ: Ana nafadꞌe Abraham nendiꞌ hehelu-fufuliꞌ, neu Musa nendiꞌ hohoro-lalane agama, mbali Daud nendiꞌ sosodꞌa kokoa-kikioꞌ neu Yeremia nendiꞌ nekendandaaꞌ.
✡1:5 Sosodꞌat Koa-kioꞌ ra 2:7
✡1:5 2 Samuel 7:14; 1 Israꞌel no Yahuda Dudꞌuin 17:13
✡1:6 Dui Seluꞌ Dala Masodꞌa 32:43; Lukas 2:13-14
✡1:7 Sosodꞌat Koa-kioꞌ ra 104:4
✡1:9 Sosodꞌat Koa-kioꞌ ra 45:7-8
✡1:11-12 Sosodꞌat Koa-kioꞌ ra 102:26-28
✡1:13 Sosodꞌat Koa-kioꞌ ra 110:1