Lamatuaꞌ Yesus Hara-lii malolen
tungga
Mateos
1
Lamatuaꞌ Yesus bei-baꞌi nara
(Lukas 3:23-38)
1-2 Susura ia dui soal Yesus Kristus, Atahori fo Lamatualain helu-fuli memaꞌ eniꞌ a maꞌahulun fo nae haitua nemaꞌ a. Eni, mane Daud no baꞌi Abraham tititi-nonosin.
Reken mia baꞌi Abraham losa mane Daud, hambu bei-baꞌiꞌ sanahulu haa. Bei-baꞌiꞌ naa ra tutungga nara, taꞌo ia:
Abraham anan Isak,
Isak anan Yakob
Yakob anan Yahuda no odꞌi-aꞌa nara,
3 Yahuda anan Peres no Sera (sira inan, naran Tamar),
Peres anan Hesron,
Hesron anan Ram,
4 Ram anan Aminadab,
Aminadab anan Nahason,
Nahason anan Salmon,
5 Salmon anan Boas (Eni inan naran Rahab),
Boas anan Obet (eni inan, naran Rut),
Obet anan Isai,
6-11 Isai anan Daud.
Mia Daud losa leleꞌ atahori Israꞌel ra nenenggariꞌ risiꞌ Babel, hambu bei-baꞌiꞌ sanahulu haa fai, naeni:
Daud anan Soleman (eni inan naa, feꞌesaꞌan Uria saon).
Soleman anan Rehabeam,
Rehabeam anan Abia,
Asaf anan Yosafat,
Yosafat anan Yoram,
Yoram anan Usia,
Usia anan Yotam,
Yotam anan Ahas,
Ahas anan Heskia,
Heskia anan Manase
Manase anan Amos,†Susura dedꞌea Yunani ruma suraꞌ Amos, ma ruma fai suraꞌ Amon.
Amos anan Yosias,
Yosias anan Yekonya no odꞌi nara leleꞌ ara nenenggariꞌ mia Babel.✡2 Mane-maneꞌ ra 24:14-15; 2 Israꞌel no Yahuda Dudꞌuin 36:10; Yermia 27:20
12-16 Leleꞌ ara nenenggariꞌ mia Babel losa Yesus, hambu bei-baꞌiꞌ sanahulu haa fai, naeni:
Yekonya anan Sealtiel,
Sealtiel anan Serubabel,
Serubabel anan Abihut,
Abihut anan Elyakim,
Elyakim anan Asor,
Asor anan Sadok,
Sadok anan Akim,
Akim anan Eliut,
Eliut anan Eliasar,
Eliasar anan Matan,
Matan anan Yakob,
ma Yakob anan Yusuf.
Yusuf ia, sao Maria. Maria mana bonggi Yesus Kristus.
17 Dadꞌi eniꞌ a mia Abraham losa Daud, hambu bei-baꞌiꞌ sanahulu haa; mia Daud losa ara nenenggariꞌ risiꞌ Babel hambu bei-baꞌiꞌ sanahulu haa; boe ma mia Babel losa bonggi Kristus, hambu bei-baꞌiꞌ sanahulu haa boe.
Maria bonggi Lamatuaꞌ Yesus
(Lukas 2:1-7)
18 Maria bonggi Yesus naa, dudꞌuin taꞌo ia:
Maria no Yusuf nenehengge-nee basaꞌ ena. Ruꞌa se nda feꞌe sungguꞌ raꞌabꞌue onaꞌ masaoꞌ ra sa, te tao-tao te Maria nairu mia Lamatualain Dula-dꞌale Meumaren ena.✡Lukas 1:27 19 Leleꞌ Yusuf nahine, boe ma ana nae noꞌe naꞌetuꞌ sira ruꞌa se neꞌebꞌue nara. Te ana nda nau tao naꞌamamaeꞌ Maria sia atahori hetar matan sa, huu ralan meumareꞌ. De ana nae naꞌetuꞌ no neeneeꞌ a.
20 Boe ma tetembaꞌ sa, leleꞌ ana feꞌe duꞌa neu-nema, ma nalamein. Sia meit naa, nita Lamatualain aten mia sorga nema nafadꞌe nae, “Wee, Yusuf! Ho ia, mane Daud tititi-nonosin. Afiꞌ mumutau sao mala Maria. Te anaꞌ mana sia tein rala naa, mia Lamatualain Dula-dalen. 21 Dei fo, Maria bonggi ana touꞌ esa. Ho musi babꞌae naran, Yesus, te dei fo Eni mana fee masoi-masodꞌaꞌ neu Lamatualain atahori nara mia sala-kilu nara.”‡Naraꞌ Yesus naa sosoan nae, “Lamatualain fee atahori masoi-masodꞌaꞌ ✡Lukas 1:31
22 Dei fo dalaꞌ ia dadꞌi taꞌo naa, huu Lamatualain nafadꞌe basa eniꞌ a lele uluꞌ a. Ana pake mana ola-olan Yesaya de suraꞌ nae,
23 “Hei rena, o! Hambu ana fetoꞌ sa feꞌe nda sao sa,
te tao-tao te mairuꞌ ena.
De ana bonggi Ana touꞌ sa.
Ara babꞌae naran, Imanuel.”
(Sia dedꞌea Ibrani, ‘Imanuel’ sosoan:
Lamatualain naꞌabꞌue no nggita.)✡Yesaya 7:14
24 Yusuf nalamein basa, boe ma ana fela. Ma ana tungga Lamatualain hehelu-fufulin neuꞌ ena. Ana haꞌi nala Maria dadꞌi saon, 25 te ana nda sungguꞌ no Maria sa losa ana bonggi. Ana bonggi basa ma, Yusuf babꞌae anaꞌ naa naran, Yesus.✡Lukas 2:21
*1:6-11 Susura dedꞌea Yunani malole manaseliꞌ, suraꞌ Asaf. Hambu susura ruma fai suraꞌ rae, Asa. Atahori ia, onaꞌ atahori fo feꞌe mana nemaꞌ sia Sajara Israꞌel no Yahuda.
†1:6-11 Susura dedꞌea Yunani ruma suraꞌ Amos, ma ruma fai suraꞌ Amon.
✡1:6-11 2 Mane-maneꞌ ra 24:14-15; 2 Israꞌel no Yahuda Dudꞌuin 36:10; Yermia 27:20
‡1:21 Naraꞌ Yesus naa sosoan nae, “Lamatualain fee atahori masoi-masodꞌaꞌ
✡1:23 Yesaya 7:14