9
Lamatualain tengga nala atahori Israꞌel ra
1 Hita fo mana nenefutu-paꞌaꞌ to Kristus, olaꞌ tetebꞌes. Dadꞌi au nda olaꞌ peko-lelekoꞌ neu nggi sa. Au rala ngga nafadꞌe au nae, Lamatuaꞌ Dula-dalen mana nalalao rala ngga. 2-3 Au ufadꞌe taꞌo ia: rala ngga susa-sona. Au medꞌa beran taꞌo naa, huu usunedꞌa atahori ngga ra. Au nau fo nusa Yahudi nggara*Nusa Yahudi naa, onaꞌ nusa Israꞌel, naeni atahori Yahudi mana leo sia rae Israꞌel, ma sia mamana-mamanaꞌ laen boe. Te leo Yahuda nda onaꞌ nusa Yahudi sa. Huu leo Yahuda naa, naeni, esa mia leo Israꞌel ka sana hulu ruaꞌ ra. o nenefutu-paꞌaꞌ ro Kristus, te hetar nda ramahere E sa. Onaꞌ au bisa soi dalaꞌ fee se, au sadꞌia oꞌe fo Lamatuaꞌ huku-dꞌoki au, fo nggati se. Ma au o sadꞌia oꞌe fo Lamatuaꞌ naꞌadꞌodꞌooꞌ au mia Kristus, naa fo atahori nggara bisa nenefutu-paꞌaꞌ ro E. 4 Tao-tao te sira, atahori Israꞌel, naeni nusaꞌ esa mana onton seli. Lamatuaꞌ soꞌu nala se dadꞌi eni ana nara eniꞌ a lele uluꞌ a. Ana natudꞌu koasan manaseliꞌ neu se. Ana hengge-nee hehelu-fufuliꞌ mataꞌ-mataꞌ no se. Ana fee hohoro-lalanen neu se. Sira mana rahineꞌ beꞌutee neu E, ma tao ues fee neu E. Ana helu-fuli nae natudꞌu rala malolen neu se.✡Kalua mia Masir 4:21; 14:22 5 Sira laoꞌ mia bei-baꞌi tara, naeni: baꞌi Abraham, baꞌi Isak, ma baꞌi Yakob (atahori haꞌi naraꞌ ‘Israꞌel’ mia e). Ma Kristus, fo Lamatuaꞌ helu-fuli memaꞌ mia lele uluꞌ a fo nae haitua nemaꞌ naa, laoꞌ mia hita nusa Yahudi ra bei-baꞌi tara. Kristus naa o, naeni Lamatualain mana parenda basa-bꞌasaꞌ e. Dadꞌi nandaa mete ma soꞌu rananaru E losa doo nduꞌu-dꞌoon neu. Tebꞌe!✡Dudꞌuit Fefeuꞌ a 32:22-32
6 Onaꞌ mae atahori Israꞌel hetar nda feꞌe simbo Kristus sa, te atahori nda bisa olaꞌ rae, Lamatuaꞌ hehelu-fufulin naa nda dadꞌi sa. Ma afiꞌ duꞌa mae, basa atahori mana laoꞌ mia bei-baꞌi Israꞌel naa, dadꞌi nusa Israꞌel fo Lamatuaꞌ tengga nala dadꞌi Eni atahorin. 7 Conto onaꞌ, atahori hetar laoꞌ mia bei-baꞌi tara, baꞌi Abraham. Te basa se nda Abraham tititi-nonosin fo Lamatuaꞌ tengga nalaꞌ ra sa. Huu Lamatuaꞌ nafadꞌe basa Abraham nae, “Tititi-nonosim fo au uhineꞌ ra, akaꞌ mana laoꞌ mia Isak ana nara.”✡Dudꞌuit Fefeuꞌ a 21:12
8 Sosoan nae, mia maꞌahulun losa oras ia, nda basa tititi-nonosiꞌ mana laoꞌ mia hita atahori Yahudi ra baꞌin Abraham, dadꞌi Lamatualain ana nara. Akaꞌ tititi-nonosin mana laoꞌ mia Lamatuaꞌ hehelu-fufulin fee neu Abraham, fo Lamatuaꞌ reken se dadꞌi eni ana matetu nara. 9 Huu Lamatuaꞌ hengge-nee hehelu-fufuliꞌ nae, “Mbei ma too mana nemaꞌ ia, Au baliꞌ uma. Leleꞌ naa, sao ma Sara bꞌonggi ana touꞌ sa ena.”✡Dudꞌuit Fefeuꞌ a 18:10
10 Nda taꞌoꞌ a naa sa. Huu hita baꞌi Isak na no saon Ribka bonggi rala ana duaꞌ ra. 11-12 Leleꞌ Ribka nda feꞌe bꞌonggi nala se sa, ara nda feꞌe tao dala maloleꞌ do dala deꞌulakaꞌ sa. Mae taꞌo naa o, Lamatuaꞌ nafadꞌe memaꞌ soꞌal Ribka ana duaꞌ mana dea neu naꞌahulu a nae, “Dei fo aꞌa ka tao ues fee odꞌin.” Lamatuaꞌ nafadꞌe taꞌo naa, fo natudꞌu nae, mete ma Eni tengga nala atahori esa ena, Eni nahine nae pake atahori na fo tao taꞌo bee. De Lamatuaꞌ tengga nala odꞌi ka fo dꞌadi atahorin. Ana nda parlu nahati fo mete sobꞌa odꞌi ka nae tao taꞌo bee sa boe, huu Lamatua nahine memaꞌ ena.✡Dudꞌuit Fefeuꞌ a 25:23 13 Huu Lamatuaꞌ olaꞌ sia Susura Meumaren soꞌal ana duaꞌ naa ra nae,
Au tengga ala Yakob,
te au nda simbo Esau sa.”✡Meleaki 1:2-3
14 Dadꞌi ata feꞌe tae saa fai? Mbei ma hambu ruma rae, “Lamatuaꞌ nda naꞌetuꞌ dedꞌeat no matetuꞌ sa, do?” Nda bisa sa! 15 Huu mia lele uluꞌ a Lamatualain nafadꞌe neu baꞌi Musa nae,
“Au utudꞌu susue ngga neu atahori fo Au tengga alaꞌ ra.
Ma Au kasian neu atahori fo Au dudꞌu ao ngga.”✡Kalua mia Masir 33:19
16 Dadꞌi atahori naa nda medꞌa Lamatuaꞌ susuen sa huu eni hihii-nanaun, do huu eni tatao-nonoin. Te huu Lamatuaꞌ mesaꞌ ne mana nae natudꞌu susuen neu atahori naa. 17 Huu sia Susura Meumareꞌ a, Lamatuaꞌ olaꞌ no mane Masir nae, “Au soꞌu nggo dadꞌi maneꞌ, huu Au ae pake koasa ngga fo labꞌan nggo fo atahori hetar rita. No taꞌo naa, basa atahori sia raefafoꞌ ia soꞌu rananaru Au nara ngga.”✡Kalua mia Masir 9:16
18 Dadꞌi mete ma Lamatuaꞌ nae natudꞌu kasian neu atahori esa, na, Ana taoꞌ a. Ma mete ma Ana nae tao atahori sa ralan manggatee, na, Ana o tao boe.✡Dui Seluꞌ Dala Masodꞌa 7:7-9
Lamatuaꞌ bisa natudꞌu Eni susuen, te Ana o nda simbo deꞌulakaꞌ sa boe
19 Naa! Mete ma hambu atahori nda simbo au rae, “Mete ma taꞌo naa, Lamatuaꞌ nae tao dalaꞌ esa, seka bisa labꞌan E? Nda hambu sa, to? Dadꞌi, taꞌo bee fo Eni nae mbia salaꞌ neu nggita? Naa nda matetuꞌ sa!”
20 Mete ma hambu ruma duꞌa taꞌo naa, na au utaa, taꞌo ia: “Duꞌa mae ho ia, seka?! Ho mae olaꞌ labꞌan Lamatuaꞌ, do?” Afiꞌ taꞌo naa! Huu sia Lamatuaꞌ Susura Meumaren nenesuraꞌ nae, “Mete ma atahori tao saa esa na, taꞌo bee de saa fo ana taoꞌ naa natane baliꞌ atahori mana tao e nae, ‘Taꞌo bee de ho tao au taꞌo ia!?’ ”✡Yesaya 29:16; 45:9 21 Conto Onaꞌ mana tao huraꞌ. Mia rae huraꞌ bubꞌueꞌ esa, ana naꞌena hak fo nae tao nggusi makahahadꞌok esa fo atahori koa e. Ana o naꞌena hak pake rae bubꞌueꞌ naa fo tao neu mamana manggarauꞌ, tunggaꞌ a eni hihii-nanaun.
22 Onaꞌ naa boe Lamatualain. Ana naꞌena hak fo tao tungga hihii-nanaun. Nae natudꞌu neu basa atahori nae, Eni namanasa, ma nda simbo atahori tatao deꞌulaka nara sa. Ana o nau fo atahori bubꞌuluꞌ rae, Eni naꞌena koasa naen seli. Fo atahori rahine taꞌo naa, na Ana naꞌatataaꞌ Aon no atahori mana tao deꞌulakaꞌ mataꞌ-mataꞌ. Te atahori mana tao deꞌulakaꞌ ra, rahaniꞌ a fain fo rambalutu eto-etoꞌ 23 Ana tao taꞌo naa, fo nae natudꞌu neu atahori hetar oi, Eni nae natudꞌu susue lalain neu atahori ruma. Sira, fo Ana tengga nala memaꞌ, fo nae soꞌu nananaru se. Ma Ana nau atahori bubꞌuluꞌ rae, Eni mesaꞌ ne manaseliꞌ. 24 Huu hita ia ra, fo Ana tengga memaꞌ dadꞌi atahori nara. Hita ia ra, ruma mia atahori Yahudi, boe ma ruma mia nusa feaꞌ ra. 25 Feꞌesaꞌan, Lamatuaꞌ pake mana ola-olan Hosea, fo suraꞌ soꞌal atahori nda Yahudi ra oi,
Hambu atahori ruma dalahulun nda Au atahori ngga sa,
te Au ae oꞌe se ae,
“Hei, Au atahori nggara,’
Ma hambu nusa fo dalahulun Au nda sue sa,
te Au ae oꞌe se ae,
‘Hei, nusaꞌ fo Au sueꞌ a.’ ”✡Hosea 2:23
26 Ana o suraꞌ oi,
“Sia naa,
Sia mamanaꞌ fo Lamatuaꞌ nafadꞌe neu se oi,
Hei, nda dadꞌi Au atahori ngga sa!’
Dei fo Lamatuaꞌ mana masodꞌaꞌ a nae nafadꞌe nggi nae,
‘Ia naa, hei dadꞌi Au ana nggara ena!’ ”✡Hosea 1:10
Ana olaꞌ taꞌo naa, huu Ana kasian atahori nda Yahudi ra sa.
27 Lamatuaꞌ mana ola-olan laen, naeni Yesaya, olaꞌ nita soꞌal nusa Israꞌel ra leleo-lalao nara nae,
“Onaꞌ mae atahori Israꞌel ra dadꞌi naen seli,
onaꞌ saraꞌaeꞌ sia tasi suun,
te dei fo Lamatuaꞌ fee masodꞌaꞌ neuꞌ a sira hidꞌaꞌ a,
mia sala-kilu nara.
28 Te dei fo losa fai neneman,
fo Lamatuaꞌ naꞌetuꞌ dedꞌeat fee basa atahori sia ndule raefafoꞌ ia,
onaꞌ Ana nafadꞌe memaꞌ ena.
Te Ana nda nahati sa,
Huu Ana tao nabasaꞌ no lai-lai!”✡Yesaya 10:22-23
29 Dalahulun, Yesaya nafadꞌe soꞌal atahori Yahudi nae,
“Hita onton,
huu Lamatuaꞌ mana naꞌena koasa manaseliꞌ,
hela hita tititi-nonosi tara ruma hambu masodꞌaꞌ.
Huu mete ma nda taꞌo naa saa, na,
basa hendi hita ena,
onaꞌ atahori kota Sodꞌom no kota Gomora ra.”✡Yesaya 1:9
Hara-lii Maloleꞌ fee neu nusa Israꞌel mana nda rena neu Lamatuaꞌ sa
30 Dadꞌi ata feꞌe tae saa fai? Olaꞌ tae, atahori nda Yahudi ra mia bee-bꞌee, fo dꞌalahulun nda sangga fo rae maloleꞌ ro Lamatuaꞌ sa, ia naa maloleꞌ ro E ena, huu ramahere neu Yesus Kristus. 31 Tao-tao te atahori Israꞌel ra, sobꞌa tao tungga Musa hohoro-lalanen fo ara bisa malolole ro Lamatuaꞌ, te nda dadꞌi maloleꞌ ro E sa.
32-33 Saa de ara nda bisa maloleꞌ ro Lamatuaꞌ sa? Huu ara nau tao tungga akaꞌ a hohoro-lalaneꞌ naa, fo Ana simbo sira ona atahori rala ndoos, te ara nda ramahere neu Yesus Kristus sa. Dadꞌi onaꞌ ara raꞌatunu dai “fatu neꞌetunus”. Ia fo Lamatuaꞌ Susura Meumaren sosoan nae,
“Mete ia dei!
Te Au tao Atahori esa
sia lete Sion, sia kota Yerusalem.
Atahori naa onaꞌ fatu esa,
mana tao atahori raꞌatunu.
Te seka namahere neu E, na,
afiꞌ mae.”
Fatu naa, naeni Yesus. Te atahori Israꞌel ra nda simbo E sa. Naa onaꞌ ara raꞌatunu, boe ma raꞌaloli huu fatu naa.✡Yesaya 28:16
*9:2-3 Nusa Yahudi naa, onaꞌ nusa Israꞌel, naeni atahori Yahudi mana leo sia rae Israꞌel, ma sia mamana-mamanaꞌ laen boe. Te leo Yahuda nda onaꞌ nusa Yahudi sa. Huu leo Yahuda naa, naeni, esa mia leo Israꞌel ka sana hulu ruaꞌ ra.
✡9:4 Kalua mia Masir 4:21; 14:22
✡9:5 Dudꞌuit Fefeuꞌ a 32:22-32
✡9:11-12 Dudꞌuit Fefeuꞌ a 25:23
✡9:13 Meleaki 1:2-3
✡9:15 Kalua mia Masir 33:19
✡9:17 Kalua mia Masir 9:16
✡9:18 Dui Seluꞌ Dala Masodꞌa 7:7-9
✡9:20 Yesaya 29:16; 45:9
✡9:25 Hosea 2:23
✡9:26 Hosea 1:10
✡9:28 Yesaya 10:22-23
✡9:29 Yesaya 1:9
✡9:32-33 Yesaya 28:16