Bbaruha gya Pau̱lo Gyakabiri hali
Basosolanika
Kwanjuura
Bbaruha gyakabiri hali Basosolonika gyahandi̱i̱ki̱i̱rwe Pau̱lo, mukwenda wa Yesu̱ Ku̱ri̱si̱to (1:1), mu b̯wi̱re b̯u̱yei̱cali̱rengi̱mwo Koli̱nso. Yaagi̱handi̱i̱ki̱ri̱ harabi̱ri̱ho myaka 51 Yesu̱ Ku̱ri̱si̱to amaari̱ kubyalwa.
Mu biro bya Pau̱lo bi̱yaahandi̱i̱ki̱i̱ri̱mwo bbaruha gigi, beikiriza ba Yesu̱ banene baali batu̱ntu̱li̱i̱ri̱ bya kwi̱ra kwa Ku̱ri̱si̱to. Bantu bamwei̱ ba Sosolonika baateekerezengi̱ nti Ku̱ri̱si̱to yei̱ri̱ri̱ kadei, b̯u̱b̯wo kandi bamwei̱ bo nibakuteekereza nti, Ku̱ri̱si̱to nka kwali heehi̱ hoi̱ kwi̱ra, ki̱kwetaagi̱sya na kwahi bo kukora. Mu bbaruha gigi, Pau̱lo abaza hoi̱ ha kwi̱ra kwa Ku̱ri̱si̱to. Alamba beikiriza ha bintu bya ku̱ramya bi̱si̱sani̱ kandi naalamba bantu bensei̱ bakorenge milimo mwa kutunga bidyo. Yeekambi̱si̱i̱rye Basosolonika kubba basi̱gi̱ku̱ mu kwikiriza kwab̯u nab̯ubaakabba baali nibakuraba mu ku̱ru̱mbwa. Kandi de yaabeekambi̱si̱i̱rye balindiire bintu bi̱kwi̱za kubbahoona, ha mmaliira gya nsi, nibali naakugumisiriza.
Bicweka Bi̱handu̱ bya mu Bbaruha gigi nka Ku̱bi̱honderegeeni̱
(i) Bi̱ramu̱kyo 1:12
(ii) Pau̱lo naasi̱i̱ma Ruhanga hab̯wa beikiriza 1:3-12
(iii) Pau̱lo naabaza ha kwi̱ra kwa Ku̱ri̱si̱to 2
(iv) Pau̱lo naahab̯ura beikiriza ha nsonga gya kwicaara batakukora 3:1-15
(v) Bi̱ramu̱kyo bya kumaliira 3:16-18
1
Bi̱ramu̱kyo Kuruga hali Pau̱lo
Gyagya Pau̱lo, hamwenya na Silivaano, na Ti̱mi̱teo. Tu̱bahandi̱i̱ki̱i̱ri̱ bbaruha gigi, nywe kitebe kya beikiriza ba Yesu̱ ba mu rub̯uga lwa Sosolonika, beikiririza mu Ruhanga Bbaa weetu̱ kandi, mu Mukama weetu̱ Yesu̱ Ku̱ri̱si̱to. Tukubasabira mbabazi̱ na b̯u̱si̱nge b̯wa Ruhanga Bbaa weetu̱ na Mukama weetu̱ Yesu̱ Ku̱ri̱si̱to, biicale hamwenya nanywe.
Kucwerwa Musangu
Bei̱ra beetu̱, twe tu̱weeni̱ ni̱ki̱dwa-b̯u̱dwi̱ ku̱si̱i̱manga Ruhanga hab̯wenyu̱. Kandi ki̱tu̱mu̱si̱i̱mi̱ra, tu̱mu̱si̱i̱ma hab̯wakubba nzikiriza gyenyu̱ mu Ruhanga na kwendyangana kwenyu̱, bi̱gyendi̱ri̱ ni̱byeteerya-b̯weteerya mu mei̱so. Nahab̯waki̱kyo, titusobora kwicala tutakwehaariiza hab̯wenyu̱ hali bitebe bya beikiriza bya Yesu̱ bindi. Twehaariiza hab̯wakubba, bigambu bya Ruhanga bi̱mwei̱ki̱ri̱ri̱i̱zemwo mucakagyenda mei̱so na kubihondera, kadi nab̯umwakabba ni̱mu̱ku̱ru̱mbwa, kandi nimukuwonawona hab̯wa Mukama weetu̱ Yesu̱ Ku̱ri̱si̱to.
Kuwonawona ku̱kwo kwensei̱ kunyakubbaho, mukutwale kubba nka b̯u̱kei̱so b̯u̱kwolokya nti, Ruhanga acwa bintu bya b̯ulyo. Kubba mu kuwonawona, Ruhanga akwi̱za kubawona nka bantu basemereeri̱ kwingira mwiguru, mu b̯ukama b̯wamwe. Ruhanga yogwo acwa bintu bya b̯ulyo, yooyo akwi̱za kufubira bab̯wo bantu bensei̱ babbanga ni̱babawonawonesya, kandi, akwi̱za kutuha kuhuumula bi̱byo bizib̯u byensei̱ bitulibba tu̱rabi̱ri̱mwo. Bi̱byo byensei̱ bi̱kwi̱za kubbaho, Yesu̱ Ku̱ri̱si̱to b̯walibba naakwi̱za kuruga mwiguru, na bamalayika baamwe banyamaani. Ali̱si̱ri̱mu̱ka hansi nei̱zi̱ra mu mworo, kufubira bantu bensei̱ batamutamwo ki̱ti̱i̱ni̱sa, na bab̯wo basuula kuhondera Makuru Garungi, gakukwatagana na Yesu̱ Ku̱ri̱si̱to. Kifubiro kya Ruhanga aliha bab̯wo bantu, kilibba kifubiro kya ku̱bazi̱kya biro na biro. Makuru gaakyo nti, Ruhanga akwi̱za kubabinga mu mei̱so gaamwe, nabatoolaho kuruga ha ki̱ti̱i̱ni̱sa kya maani gaamwe. 10 Bi̱byo bintu byensei̱, bi̱kwi̱za kubbaho ha kiro ki̱kyo kya Ruhanga ki̱yaateekani̱ze Mukama weetu̱ Yesu̱ Ku̱ri̱si̱to, ku̱si̱ru̱mu̱ka ha nsi kuruga mwiguru, bamuhaariize kandi bamuhe ki̱ti̱i̱ni̱sa. B̯u̱b̯wo hooho bantu bensei̱ bamwikiririzamwo, balihuniira hoi̱ nibamuha ki̱ti̱i̱ni̱sa. Kandi nanywe nywankei, mu̱kwi̱za kubba mu bab̯wo bantu, hab̯wakubba mwei̱ki̱ri̱i̱ze kuhondera bigambu bya Mukama weetu̱ bi̱twabatebeerye.
11 Nahab̯waki̱kyo, twe kusaba kwetu̱ hali Ruhanga biro byensei̱ kwicala nti, Ruhanga awone nziicala gyenyu̱ nigili nka yo ku̱yaabeeti̱ri̱ kwicala kuraba mu Mukama weetu̱ Yesu̱ Ku̱ri̱si̱to. Kandi, tukusabanga Ruhanga nti, mu maani gaamwe, adoosereerye bintu byensei̱ birungi bi̱mu̱kwendya, na bikorwa byensei̱ birungi bi̱mu̱kwendya kukora, hab̯wakubba mwei̱ki̱ri̱ri̱i̱ze mu Mukama weetu̱ Yesu̱ Ku̱ri̱si̱to. 12 Tusaba yatyo, ibara lya Mukama weetu̱ Yesu̱ Ku̱ri̱si̱to, lihaariizib̯we muli nywe kuraba mu nziicala gyenyu̱, kandi, aleke mu̱tu̱nge ki̱ti̱i̱ni̱sa kya kwicala hamwei̱ na Yesu̱ Ku̱ri̱si̱to. Bi̱byo byenseenya, bikusoboka hab̯wa mbabazi̱ za Ruhanga na Yesu̱ Ku̱ri̱si̱to Mukama weetu̱.