Bbaruha Gyakasatu Ginyakuhandiikwa
Yohaana
Kwanjuura
Bbaruha gigi gyegebeerwe nka Bbaruha gya Yohaana gyakasatu, gyahandi̱i̱ki̱i̱rwe mukwenda Yohaana. Bei̱tu̱ Yohaana yeezeta kwahi mu̱handi̱i̱ki̱, kyonkei yeezeta mu̱handu̱ wa kitebe kya beikiriza ba Yesu̱ Ku̱ri̱si̱to. Yaagi̱handi̱i̱ki̱i̱ri̱ mwikiriza wa Yesu̱ Ku̱ri̱si̱to akwetwa Gaayo, munyakubba naali mwebemberi̱ wa beikiriza ba Ku̱ri̱si̱to (1:1).
Mu bbaruha gigi mu̱handi̱i̱ki̱ akuhaariiza Gaayo hab̯wa birungi byensei̱ bi̱baakoleeri̱ beikiriza ba Ku̱ri̱si̱to bandi. Kandi de aku̱manyi̱sya kitebe kya beikiriza ba Ku̱ri̱si̱to beegyendereze mudulu gibakweta Di̱yotereefe, ali na bikorwa bibiibi, atahondera bya Yohaana mwebemberi̱ byaragira.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Ntandiko gya kitabbu 1:1-4
(ii) Yohaana ni̱yeekambi̱sya kandi naaragira Gaayo atangiire kurungi beikiriza ba Ku̱ri̱si̱to bei̱ra baamwe 1:5-8
(iii) Di̱yotereefe nibamusalira musangu 1:9-10
(iv) Demetu̱ri̱yo nibamubazaho kurungi 1:11-12
(v) Byakumaliira 1:13-15
1
Bi̱ramu̱kyo
1 Gyagya mu̱handu̱,
nkuhandiikira we Gaayo, munywani wange gi̱nyendya mu mananu.
2 Munywani wange, nkukusabira aleke obbe na b̯womi b̯urungi, kandi de nti bintu byenseenya bikugyendere kurungi, nka kwoli kurungi mu mwozo.
3 Nyaasemereerwe hoi̱ bamwei̱ ha beikiriza ba Ku̱ri̱si̱to bei̱ra beetu̱ b̯u̱bei̱zi̱ri̱ nibakatuweera nka kwokwekambiranga mananu kandi noogahondera kwo. 4 Tindi na kintu kikusobora kumpa kusemererwa kukwijanjana na kwegwa baana bange nka kubakuhondera mananu.
Kufangaho Baheereza ba Mukama
5 Munywani wange, oli mwesigwa mu bintu byokukoora beikiriza ba Ku̱ri̱si̱to bei̱ra baamu, naab̯uwaakabba otabeegi̱ri̱. 6 Beikiriza bab̯wo baweereeri̱ kitebe kyensei̱ kya beikiriza ba Ku̱ri̱si̱to ha ngonzi zooli nazo. Ki̱kwi̱za kubba kirungi we kubabboheera mu lugyendu lwab̯u mu mu̱li̱ngo gu̱ku̱si̱i̱mwa Ruhanga.
7 Baabyokeerye lu̱lwo lugyendu hab̯wa kuweera bantu bigambu bya Ku̱ri̱si̱to kandi baacwamwo b̯uteikiriza b̯u̱sagi̱ki̱ kuruga hali muntu yensei̱ munyakubba atali mwikiriza wa Ku̱ri̱si̱to. 8 Nahab̯waki̱kyo twe beikiriza ba Ku̱ri̱si̱to tukusemeera ku̱tati̱i̱rya bantu nka bab̯wo, aleke tusobore kukoranga nabo mulimo gwa ku̱saasaani̱a mananu.
9 Ndi na bintu bi̱nyaahandi̱i̱ki̱i̱ri̱ kitebe kya beikiriza ba Ku̱ri̱si̱to, bei̱tu̱ Di̱yotereefe, yogwo yendya kwebembera bantu bensei̱, eikiriza kwahi bintu bindagira.
10 Nahab̯waki̱kyo kiro nkwi̱za, ndi̱bei̱zu̱kya bintu bibiibi byakukora, na bi̱byo bibiibi byakutubazaho. Asambi̱ri̱i̱ri̱ kwahi hahwo hasa, bei̱tu̱ asuula naakutangiira beikiriza ba Ku̱ri̱si̱to bei̱ra beetu̱ kandi de naagaana na bab̯wo bendya kubatangiira, kandi de naababinga mu kitebe kya beikiriza.
11 Munywani wange, oteikirizanga kuhondera bikorwa bibiibi, bei̱tu̱ ohonderenge bikorwa birungi. Muntu akora bintu birungi abba wa Ruhanga, kandi yogwo akora bintu bibiibi takawonanga Ruhanga.
12 Demeti̱ri̱yo, bantu benseenya bamubazaho kurungi, na mananu nago nigamuheera b̯u̱kei̱so. Twedede tumubazaho kurungi kandi de okyegi̱ri̱ nti b̯u̱kei̱so b̯wetu̱ b̯uli b̯wa mananu.
13 Ndi na bintu binene byaku̱ku̱manyi̱sya; bei̱tu̱ kandi, nkwendya kwahi ku̱koresya kalaamu na wiino kubikuhandiikira. 14 Nku̱ni̱hi̱ra kukuwona b̯wangu kandi tu̱kwi̱za kubaza mei̱so na mei̱so.
15 B̯u̱si̱nge b̯wa Ruhanga b̯ubbe nawe. Banywani baamu baku̱ramu̱ki̱i̱rye. Otu̱ramu̱ki̱i̱rye b̯uli omwei̱ mu banywani beetu̱.