Bikorwa bya
Bakwenda
Kwanjuura
Kitabbu kya Bikorwa bya Bakwenda kyolokya kitebe kya beikiriza ba Yesu̱ Ku̱ri̱si̱to nka ku̱kyatandi̱ki̱i̱ri̱ mu rub̯uga lwa Yeru̱salemu̱, kyagaliha kyadwa mwisaza lya B̯uyudaaya, Samali̱ya, hamwei̱ na mu bicweka bindi byensei̱ bya mu nsi, nka Yesu̱ kuyaalingi aweereeri̱ beegeseb̯wa baamwe atakabbeeri̱ kutemba mwiguru (1:8).
Kitabbu kiki, kyahandi̱i̱ki̱i̱rwe Lu̱u̱ka munyakuhandiika de na kitabbu kya Makuru Garungi nka ku̱gaahandi̱i̱ki̱i̱rwe Lu̱u̱ka. Bitabbu bibi bibiri, Lu̱u̱ka yaabi̱handi̱i̱ki̱i̱ri̱ Teofi̱i̱ro (1:1-4), munyakubba Muyonaani. Bei̱tu̱ kandi kiteekerezeb̯wa kubba yaabi̱handi̱i̱ki̱ri̱ naali de na kigyendererwa kya ku̱sobosesya bantu bensei̱, Bayonaani na Bayudaaya, babisome kihe bantu bakwikiririza mu Yesu̱ ku̱gu̱mya bintu bibaali babeegeseerye (1:1). Lu̱u̱ka ateekerezeb̯wa kubba yaahandi̱i̱ki̱ri̱ kiki kitabbu naali mu rub̯uga Antyoki̱ya.
Kitabbu kiki kituha kyakuwoneraho kya kitebe kya beikiriza ba Ku̱ri̱si̱to kinyakubanza; kandi de, ni̱ki̱twolokya bantu banyakwikiririzanga mu Yesu̱ nka ku̱bei̱calengi̱. Mu kitabbu kiki heicalamwo kyakuwoneraho kya bakwenda ba Yesu̱ Ku̱ri̱si̱to, kituha kwesiga maani ga Mwozo Mu̱syanu̱ mu ku̱saasaani̱a Makuru Garungi ga Yesu̱ Ku̱ri̱si̱to hali bantu bandi.
Bicweka Bi̱handu̱ bya mu kiki Kitabbu nka Ku̱bi̱honderegeeni̱
(i) Mwozo Mu̱syanu̱ nei̱za hali beegeseb̯wa ba Yesu̱ Ku̱ri̱si̱to, na kitebe kya beikiriza baamwe nikitandika kuhanda 1:1—8:1
(ii) Kitebe kya beikiriza ba Yesu̱ Ku̱ri̱si̱to ni̱ki̱ku̱ru̱mbwa kandi nikikutandika kugaliha 8:2—12:23
(iii) Pau̱lo naali mu lub̯ungo lwamwe lwa kubanza lwa ku̱tebya Makuru Garungi 12:24—14:28
(iv) Lukuratu Lu̱handu̱ lwa bakwenda na bahandu̱ ba Bayudaaya nilucwamwo bintu bya beikiriza ba Yesu̱ Ku̱ri̱si̱to bahyaka bi̱bakwetaagi̱si̱b̯wa ku̱doosereeryanga 15:1-35
(v) Pau̱lo naagyenda mu lub̯ungo lwamwe lwakabiri lwa ku̱tebya Makuru Garungi 15:36—18:22
(vi) Pau̱lo naagyenda mu lub̯ungo lwamwe lwakasatu lwa ku̱tebya Makuru Garungi 18:23—20:38
(vii) Pau̱lo naakwatwa mu rub̯uga lwa Yeru̱salemu̱ 21—26
(viii) Pau̱lo naatwalwa mu rub̯uga Rooma 27—28
1
Yesu̱ Naaragura ha Kwi̱za kwa Mwozo Mu̱syanu̱
1 Waki̱ti̱i̱ni̱sa Teofi̱i̱ro, mu kitabbu kyange kya kubanza ki̱nyaaku̱handi̱ki̱i̱ri̱, nyaaku̱manyi̱si̱i̱rye bintu byenseenya bya Yesu̱ bi̱yaakoori̱, na bi̱byo bi̱yeegeseerye 2 kudwera ki̱mwei̱ ha kiro kya Ruhanga ki̱yaamu̱twali̱i̱ri̱mwo mwiguru. B̯uyaali atakagyendi̱ri̱ mwiguru, hab̯wa maani̱ ga Mwozo Mu̱syanu̱, yaaweereeri̱ bakwenda baamwe bayaali akomi̱ri̱ bintu bibakuteekwa kukora. 3 Mu biro makumi ganei, binyakuhondera kuwonawona na ku̱kwa kwamwe, Yesu̱ yei̱zengi̱ mirundi minene ni̱yeezolokya hali bab̯wo bakwenda baamwe. Mu biro bi̱byo, yaabananu̱ki̱si̱i̱rye mu mi̱li̱ngo minene, nka kwali mwomi. Kandi de, yataho na kubaweera bigambu bikukwatagana na b̯ukama b̯wa Ruhanga. 4 Kiro ki̱mwei̱, Yesu̱ b̯uyaali naakudya na bakwenda baamwe, yaabaragi̱i̱ri̱ naakoba, “Mutaruga mu rub̯uga Yeru̱salemu̱, bei̱tu̱ mwicalemwo mulindiire, ku̱doosya Bbaabba Ruhanga b̯walibaha Mwozo Mu̱syanu̱, nka ku̱nyaabaweereeri̱ ku̱yeeragani̱si̱i̱rye kukora. 5 Yohaana Mu̱bati̱zi̱ yaabati̱zengi̱ bantu na meezi̱, bei̱tu̱ mu biro bi̱dooli̱ kuruga hataati̱, Ruhanga akwi̱za kubabatiza na Mwozo Mu̱syanu̱.”
Ruhanga Naatwala Yesu̱ Mwiguru
(Mari̱ko 16:19-20; Lu̱u̱ka 24:50-53)
6 Hei̱nyu̱ma, Yesu̱ b̯u̱yaarombi̱ri̱ na bakwenda baamwe murundi gundi, bab̯wo bakwenda baamu̱b̯u̱u̱lya, “Mukama weetu̱, b̯wi̱re b̯wamu b̯u̱doori̱ b̯wa kwi̱ryaho b̯ukama b̯weihanga lyʼI̱saleeri̱?”
7 Bei̱tu̱ Yesu̱ yaabei̱ri̱ri̱mwo naabaweera, “Kili kwahi kintu ki̱handu̱ nywe kwega b̯u̱su̱mi̱ b̯wa Bbaabba Ruhanga b̯u̱yaategeki̱ri̱ mu b̯u̱sobozi̱ b̯wamwe ha bintu bindi bilibbeeraho. 8 Bei̱tu̱ Mwozo Mu̱syanu̱ b̯wali̱kabei̱zaho, alibaha maani gakumpeera b̯u̱kei̱so mu rub̯uga lwa Yeru̱salemu̱, mwisaza lya B̯uyudaaya, mwisaza lya Samali̱ya, hamwei̱ na mu bicweka bindi byensei̱, bya mu nsi.” 9 Yesu̱ b̯u̱yaamaari̱ kubaza bi̱byo bigambu, Ruhanga yaamutwala mwiguru bakwenda baamwe bali̱ngi̱ri̱i̱ri̱. Kasi hei̱za kikaka kyamubbumba, baalekaho kumuwona.
10 B̯ubaali bacakali̱ngi̱ri̱i̱ri̱ hakyendi̱ naakugyenda, baamaari̱ gawona badulu babiri, banyakubba balweri̱ bilwalu bi̱syanu̱, beemereeri̱ heehi̱ nabo. 11 Badulu bab̯wo baab̯u̱u̱li̱i̱rye bab̯wo bakwenda, “Hab̯waki nywe Bagalilaaya mucakagyenda mu mei̱so na kwemeera kulingiira hakyendi̱? Kiro ki̱mwei̱, yogwo Yesu̱, wa Ruhanga gyatweri̱ mwiguru, akwi̱za kwi̱ra mu mu̱li̱ngo gwogwo, gu̱mu̱mu̱woneeri̱mwo naakutwalwa mwiguru.”
Mati̱ya Nibamukoma Kwi̱ra mu Kiikaru kya Yu̱da
(Matayo 27:3-10)
12 Bab̯wo badulu b̯u̱baagyendi̱ri̱, bakwenda ba Yesu̱ baaruga ha lusahu lu̱beetengi̱ Zayi̱tu̱u̱ni̱, bei̱rayo Yeru̱salemu̱. Lu̱lwo lugyendu lwei̱janjanengi̱ nka ki̱lomi̱ta gi̱mwei̱.*1:12 Mu Luyonaani, lugyendu lwa biragiro bya Bayudaaya lu̱byei̱ki̱ri̱zengi̱ muntu kulibata ha kiro kya Sabbaato. 13 B̯u̱bei̱ri̱ri̱yo, baagyenda mu ki̱si̱i̱ka kya hakyendi̱ wa nnyu̱mba ki̱bei̱calengi̱mwo. Banyakukigyendamwo baali Peeteru na Yohaana, Yakobbo nʼAndereya; Fi̱li̱po na Tomasi, Baturumaayo na Matayo; Yakobbo wondi munyakubba mu̱tabani̱ wʼAlifaayo na Si̱mooni̱ mulwanirira ihanga lyamwe, na Yu̱da mu̱tabani̱ wa mudulu wondi gi̱beetengi̱ Yakobbo. 14 Mirundi minene, baba bensei̱ baarombengi̱ nibasaba Ruhanga na mutima gu̱mwei̱. Baasabengi̱ na Mali̱ya maa Yesu̱, na bakali̱ bandi banyakwikiririzanga mu Yesu̱, hamwei̱ na baab̯u Yesu̱.
15 Kiro ki̱mwei̱, kitebe kya bantu banyakwikiririzanga mu Yesu̱, banyakudwanga nka ki̱ku̱mi̱ na gabiri baali beecooki̱ri̱ hamwei̱. Ha b̯wi̱re b̯u̱b̯wo, Peeteru yeemereeri̱ yaabaweera, 16 “Bei̱ra bange, Binyakuhandiikwa bi̱byo bya Mwozo Mu̱syanu̱ bi̱yaaheeri̱ mukama Dau̱di̱ kadei na kadei, ahandiike hali Yu̱da, bilina kudwereera. Yogwo Yu̱da, yooyo munyakwebembera bantu banyakukwata Yesu̱. 17 Yu̱da, yaali mwi̱ra weetu̱. Yesu̱ yaali amu̱teeri̱ho akore natwe, gugu mulimo gwa ku̱tebya Makuru Garungi.”
18 (I̱nyu̱maho, Yu̱da yaali agu̱u̱ri̱ musiri na sente, zi̱yaatu̱ngi̱ri̱ kuruga mu kikorwa kibiibi ki̱yaakoori̱, kya kudiirisana Yesu̱. Hei̱nyu̱ma, yeeku̱u̱ti̱i̱ri̱ hansi, yaahu̱li̱ka nda, mala gaamwe gensei̱ gaahuluka hanzei, yaakwa.1:18 Matayo 27:3-8 19 Makuru gakukwatagana na kikorwa ki̱kyo kya Yu̱da ki̱yaakoori̱, gaasaaseeni̱ mu rub̯uga lwenseenya lwa Yeru̱salemu̱. Kinyakurugamwo, gu̱gwo musiri baagweta ibara Akeli̱dama, mu lukobo lwab̯u, ki̱ku̱manyi̱sya, Musiri gwʼIbbanga.)
20 Peeteru yaab̯u̱ni̱i̱rye yaakoba, “Bibi byobyo bintu bya Dau̱di̱ bi̱yaahandi̱i̱ki̱ri̱ hali Yu̱da mu kitabbu kibeeta Zabbu̱li̱, naakoba,
“ ‘Leka Nnyu̱mba gyamwe, gibbe kifurukwa;
Kadi muntu omwei̱, ataligiicalamwo.’1:20 Zabbu̱li̱ 69:25
Kandi de Dau̱di̱ yaakobi̱ri̱,
“ ‘Muntu wondi, atwale kiikaru kyamwe.’1:20 Zabbu̱li̱ 109:8
21-22 Nahab̯waki̱kyo, tukuteekwa kukoma muntu yei̱ra mu kiikaru kya Yu̱da, yei̱za kukora natwe mulimo gwa ku̱tebeerya bantu bandi, Ruhanga nka ku̱yaahi̱mboori̱ Mukama Yesu̱. Yogwo muntu, akuteekwa kubba mudulu munyakwicala natwe b̯utwali na Yesu̱, kurugira ki̱mwei̱ mu b̯u̱su̱mi̱ b̯wa Yohaana b̯u̱yaabati̱ri̱zengi̱mwo bantu, kudwera ki̱mwei̱ ha kiro kya Ruhanga ki̱yaatwali̱i̱ri̱mwo Yesu̱ mwiguru.”
23 Mwomwo bantu banyakubba beecooki̱ri̱, beikiraniza na Peeteru, baaleeta mabara ga badulu babiri, banyakubba basemereeri̱ kutwala ki̱kyo kiikaru. Omwei̱ muli bo, yaali Yozefu̱, gi̱beetengi̱ Barasaba, bandi gi̱beetengi̱ Yu̱si̱to. Wondi, baamwetengi̱ Mati̱ya. 24 Mwomwo bensei̱ hamwei̱ baasaba Ruhanga nibakoba, “Mukama Ruhanga, weewe weegi̱ri̱ mitima mya bantu bensei̱. Twolokye, mu baba badulu babiri, muntu gyokomi̱ri̱mwo, 25 kukora gugu mulimo nka mukwenda, mu kiikaru kya Yu̱da ki̱yaati̱gi̱ri̱, naakagyenda mu kiikaru kibiibi ki̱mu̱doori̱.” 26 B̯u̱baacu̱u̱hi̱i̱rye; ibara linyakukomwamwo, lyali lya Mati̱ya. Kuruga kiro ki̱kyo, Mati̱ya yaabba mukwenda, hamwei̱ na bab̯wo bakwenda i̱ku̱mi̱ nomwei̱.