8
Yesu̱ Mu̱laami̱ Mu̱handu̱ wa Ndagaanu Gihyaka
1 Ki̱handu̱ mu bi̱byo bitukukoba kyokyo kiki: Tuli na mu̱laami̱ mu̱handu̱, munyakwicaara mu kiikaru kya ki̱ti̱i̱ni̱sa kinene hoi̱ kulema na Ruhanga mwiguru.*8:1 Bbai̱bbu̱li̱ zindi zi̱koresya: naali ha mukono gwa b̯udyo gwa Ruhanga 2 Yogwo mu̱laami̱ aheereza mu kiikaru ki̱tongoleerwe ku̱rami̱i̱ryamwo Ruhanga, ki̱kyo ki̱taateebeerweho bantu nka heema gya ku̱rami̱i̱ryamwo Ruhanga gya Mu̱sa gi̱yaabi̱mbi̱ri̱, bei̱tu̱ ki̱kyo kya Ruhanga yo yankeenya ki̱yaateeri̱ho mwiguru.
3 B̯uli mu̱laami̱ mu̱handu̱ yensei̱, ateeb̯waho kukora mulimo gwa kuhonga byonzira. Nahab̯waki̱kyo, mu̱laami̱ wa Ruhanga weetu̱ yogwo, yaali naakusemeera kubba na kintu kya kuhonga. 4 Abbenge naali mu nsi, yaaku̱bbeeri̱ kwahi mu̱laami̱ kadi kadooli̱; hab̯wakubba, haloho balaami̱ ba Ruhanga bandi bakuhonga bihongwa, nka biragiro kubiragira. 5 Mu bi̱byo byensei̱ bibakora, bahondera kyakuwoneraho kandi ki̱si̱sani̱, kya bi̱byo bikorwa mu kiikaru ki̱tongoleerwe kya mwiguru. Kyokyo Ruhanga yaahab̯u̱li̱i̱ri̱ Mu̱sa, Mu̱sa b̯uyaali naali heehi̱ ku̱bi̱mba heema gya ku̱rami̱i̱ryamwo Ruhanga. Ruhanga yaamu̱hab̯wi̱ri̱ naakoba: “Taho mutima kukora bintu byensei̱, noohondera kyakuwoneraho ki̱nyaakwolokeerye ha lusahu.”8:5 Kidemu 25:40
6 Kili kya mananu kukoba nti, Ku̱ri̱si̱to yaaheeb̯eerwe b̯uheereza b̯ukukira b̯wa balaami̱ ba kadei ki̱ti̱i̱ni̱sa; nka kiragaanu ki̱yaateeri̱ho kiteeraniza Ruhanga na bantu, nka kukikira mu b̯urungi, hab̯wakubba kyasi̱gi̱ki̱i̱ri̱ ha miragu mikukiraho mu b̯urungi. 7 Kubba, ndagaanu gya kubanza b̯u̱gyaku̱bbeeri̱ gitalinamwo nsobi̱, kyakwetaagi̱si̱i̱rye kwahi kukora ndagaanu gyakabiri.
8 Bei̱tu̱ Ruhanga yaaweeni̱ bantu baamwe nka ku̱baasobeerye, yaakoba:†8:8 Bbai̱bbu̱li̱ zindi zi̱koresya: yaaweera bantu
“Kasu̱mi̱ kadoori̱,
nkore ndagaanu gihyaka,
na Bei̱saleeri̱,
na ba luganda lwa Yu̱da.
9 Ndagaanu gitakwisana na gi̱di̱,
gi̱nyaakoori̱ na bahaaha baab̯u,
ha kiro ki̱nyaabakweti̱ ha mukono
nimbatoola mu nsi gya Mi̱si̱ri̱.
Bo batakate mitima myab̯u ha ndagaanu gyange,
kyokyo nagya, nyaabatooleeri̱ho mutima.”
10 Kandi de, Mukama yaakobi̱ri̱ nti:
“Gigi gyogyo ndagaanu gindikora na Bei̱saleeri̱:
bi̱byo biro b̯ubilimalikaho,
ndita biragiro byange mu biteekerezu byab̯u,
nimbihandiika mu mitima myab̯u;
kandi ndibba Ruhanga waab̯u,
nabo babbe bantu bange.
11 Tihalibbaho muntu alyegesya banywani baamwe,
rundi aliweera baab̯u yati: ‘Wona, weege nti ali Mukama.’
Hab̯wakubba bensei̱ balinzega,
kutandikira hali akukira b̯uto muli bo, ku̱doosya hali akukiirayo ki̱mwei̱ b̯u̱handu̱.
12 Kubba ndibaganyira bibii byab̯u
nimbula kwi̱ra ku̱bi̱i̱zu̱ka.”8:12Yeremi̱ya 31:31-34
13 Ruhanga b̯wabazi̱ri̱ ha ndagaanu gihyaka, b̯u̱b̯wo adi̱bi̱i̱rye gi̱di̱ gikadei. Kandi kintu kyenseenya b̯ukidiba nikikahanda, kibba ki̱si̱geeri̱ kumalikaho.